Федеральная лезгинская
национально-культурная автономия

Лезги Газет: Лезгивал, стхавал, садвал, гьахъвал патал

ФЛНКА-дин тарихдиз сиягьат Лезги халкьдиз, СССР-да яшамиш хьайи маса миллетриз хьиз, алатай асирдин 80-йисарин эхирра хайи культура ва чIал хуьнин мураддалди общественный тешкилатар арадал гъидай мумкинвал хьана. И йисара Дагъустандани Азербайжанда яшамиш жезвай лезгияр садзавай хейлин тешкилатар, гьерекатар, фондар кардик акатна. СССР чкIайдалай кьулухъ гзаф миллетрин, гьа жергедай яз лезги халкьдин гьални садлагьана дегиш хьана. Кьилди къачуртIа, асирралди санал яшамиш хьайи лезги халкь Россиядинни Азербайжандин арада гьукуматрин сергьятар тухунин нетижада кьве патал пай хьана. Хайи халкьдин тIал алай месэлаяр гьялунин макьсаддалди 1997-йисалай РФ-дин жуьреба-жуьре субъектра чкадин ва регионрин, 1998-йисалай федеральный автономияр регистрация ийиз гатIунна. 1999-йисуз чи миллетдин векилри Москвада лезги халкьдин культурадин федеральный автономия (ФЛНКА) арадал гъана ва регистрация авунвай членрин арада Тюмендинни Красноярскдин лезгийрин автономияр гьатна. 2007-йисалай адак “Москвадин лезгияр”, Калининградда авай лезгийрин автономияр акатна. Алай вахтунда ФЛНКА-дин къурулушда авай автономийрин жергейра Рязанда, Москвадин областда, Санкт-Петербургда, Ярославлда, Челябинскда, Сыктывкарда, Украинадин Харьковда авай лезгийрин автономияр ава. ФЛНКА-ди лезги халкьдин уьмуьрда важиблу роль къугъвазва. Автономиядин вилик акъвазнавай кьилин месэлайрик хайи чIал, культура, адетар хуьн, абур вилик тухун акатзава. И макьсаддалди кьиле тухузвай гьар са гьерекат РФ-дин “Миллетрин культурайрин автономияр” закондал асаслу хьана тешкилзава. Вилик эцигнавай месэлаяр гьялун патал абуру гьукуматдин ва общественный организацийрихъ, РФ-дин Федеральный Собранидихъ, РФ-дин Президентдин ва Гьукуматдин Администрациядихъ галаз сих алакъаяр хуьзва. Мярекатдин иштиракчияр 9-ноябрдиз Москвада Большая Якиманка куьчеда авай Президент-Отелда ФЛНКА-дин IV Съезд кьиле фена. Аниз лезгийрин общественностдин векилриз, регионрин автономийриз, Кьиблепатан Дагъустандин районрин кьилериз, РФ-дин Президентдин ва Гьукуматдин Администрациядин къуллугъчийриз, РФ-дин Госдумадин ва РД-дин Халкьдин Собранидин депутатриз, исполнительный властдин федеральный органрин векилриз, алимриз, экспертриз, СМИ-рин векилриз ва хейлин масабуруз теклифнавай. Съездда 37 делегатди ва 50-далай виниз мугьманри иштиракна. Абурун жергейра Красноярскда авай лезгийрин автономиядин регьбер, “Монолитстрой” холдингдин генеральный директор Мамед Абасов, Вирироссиядин лезги жегьилрин союздин руководитель Энвер Абдуллаев, тарихдин илимрин кандидат, РАН-дин востоковеденидин Институтдин араб уьлквейрин тарихдин сектордин заведующий Аликбер Аликберов, экономикадин илимрин доктор, Плеханован тIварунихъ галай РЭА-дин кафедрадин заведующий Асали Асалиев, “Руэнержигруп” компанидин Президент Азад Бабаев, ФЛНКА-дин Президент Ариф Керимов, Тюменда авай лезгийрин автономиядин регьбер Вагиф Керимов, тарихдин илимрин кандидат Энвер Кисриев, ФЛНКА-дин Президентдин куьмекчи Руслан Къурбанов, МГУ-дин психологиядин кафедрадин заведующий, “Москвадин лезгияр” автономиядин регьбер Мадрудин Мегьамед-Эминов, РД-дин Халкьдин Собранидин депутат Эдуард Хидиров, машгьур карчи Асанбуба Нуьдуьрбегов, ФЛНКА-дин депертаментдин руководитель Амил Саркаров, “Настоящее время” газетдин генеральный директор ва кьилин редактор Милрад Фатуллаев, генерал-майор Тагьир Эминов, юридический илимрин доктор Абдулжабар Юнусов, талыш халкьдин “Талышдин сес” газетдин кьилин редактор, филологиядин илимрин кандидат Фахраддин Аббасов, Харьковда авай лезгийрин “Самур” обществодин регьбер Агъаверди Адилов ва гьа и обществодин член Къадир Адилов, РФ-дин Президентдин Администрациядин къецепатан политикадин управленидин руководитель Михаил Белоусов, РФ-дин Президентдин СКФО-да авай департаментдин векил Дмитрий Грабилин, РАН-дин философиядин институтдин директор, академик Абдусалам Гьуьсейнов, “Нафта-газ сервис” карханадин генеральный директордин заместитель Решад Къулиев, “Лезги халкьарин виридуьньядин конгресс” общественный гьерекатдин председатель Мегьамед Мегьамедов, РФ-дин Президентдин Управленидин къецепатан политикадай ва диаспорайрихъ галаз тухузвай кIвалахрай советник Андрей Ротэрмель ва хейлин масабур авай. Дагъларин уьлкведай Съезддин кIвалахда филологиядин илимрин доктор Фейзудин Нагъиева, “Гьажи Давуд” общественный гьерекатдин председатель Надир Агьмедова, “Настоящее время” газетдин кьилин редактордин заместитель, ФЛНКА-дин Дагъустанда авай векил Руслан Гереева, “Новое дело” газетдин кьилин редактор, авар халкьдин общественный гьерекатдин член Марко Шагьбанова ва “Лезги газетдин” махсус корреспондент Мегьамед Ибрагьимова иштиракна.

Месэлаяр ва нетижаяр 9-ноябрь. Экуьнин сятдин 10. Президент-Отелда уьлкведин жуьреба-жуьре регионрай атанвай мугьманар кIватI жезва. Абур ФЛНКА-дин векилри отелда кардик квай тавханада кьабулна. Сятдин цIусадаз IV Съезддин кIвалах башламишна. РФ-дин Гимн ягъайдалай гуьгъуьниз ФЛНКА-дин Президент Ариф Керимова делегатар ва мугьманар тебрикна ва делегатри сесер гуналди Съезддин председателвиле Ариф Керимов, секретарвиле Сабир Мамедов, мандатный комиссиядин членарвиле Энвер Абдуллаев, Абдулжабар Юнусов, Кемран Мамедов хкяна. Съезд кьиле тухун патал председателдин куьмекчивиле Энвер Кисриев тайинарна. Сифте гаф лезги интеллигенциядин агъсакъал, академик Абдусалам Гьуьсейноваз гана. - Гьуьрметлу лезгияр! Гьуьрметлу делегатар ва мугьманар! - башламишна ада. - СССР чкIайдалай кьулухъ лезгияр, гьукуматрин арада сергьятар чIугун себеб яз, кьве патал пай хьана. Асул гьисабдай лезгийрин тарихдин кьисмет гьамиша Россиядихъ галаз сих алакъада ава. Алай вахтунда лезгияр дуьньядин гзаф уьлквейриз чкIанва. Кьилинди, гьина аватIани, абуру хайи чIал, культура, чIехи бубайрилай атанвай адетар хуьн, абуруз гьуьрмет авун я. Алай вахтунда Урусатда миллетчийри кьил хкажнава, абуруз кавказвияр аквадай вилер авач. Им пис терефрикай сад я. Чун вири са уьлкведин гражданинар я ва гьар садахъ - гьам урусдихъ, гьамни лезгидихъ - сад хьтин ихтиярар ава. Ихьтин шартIара чи арада садвал хьуни лезгийрин общественный уьмуьрда важиблу роль къугъвазва. Лезгийрин садвилин къуватрикай кар алайди ФЛНКА я. Ада вири лезги халкьдин патай еке гьуьрмет къазанмишнава. Автономияди арадал гъанвай “Лезги лувар” фондуни чи халкь вилик тухузвай жуьреба-жуьре проектриз, бажарагълу жегьилриз куьмекар гузва. Зи мурад ФЛНКА-дихъ гележегда мадни еке агалкьунар ва лезги халкьдин дережаяр авайдалайни кьакьан хьун я. Ша чна и кардик вирида, сад хьана, чи пай кутан!

А.Гьуьсейнован рахунрилай гуьгъуьниз Энвер Кисриева РФ-дин Госдумадин милли политикадин Комитетдин председатель Гьажимет Сафаралиева ракъурнавай телеграмма кIелна ва нубатдин гаф ФЛНКА-дин Президент Ариф Керимоваз гана: - Гьуьрметлу делегатар ва мугьманар! - лагьана ада, - ФЛНКА-дин эхиримжи Съезддилай гуьгъуьниз РФ-да ва дуьньяда кьиле фейи бязи дегишвилери чи автономиядин кIвалахдизни таъсирна. Абурукай хейлинбур чун паталди писбур хьана. Кьилди къачуртIа, РФ-динни Азербайжан Республикадин сергьятрин жигьетдай 2010-йисуз кьабулнавай икьрар ва 2011-йисуз кьиле фейи ратификация лезгияр патал акьалтIай чIуруди я. Нетижада чи ватанэгьлияр яшамиш жезвай кьве хуьр (Храх-Уба ва Урьян-Уба) вафасуз кьисметдин къармахра гьатна. Амма Россиядин властри лезгийрин месэлаяр кваз кьазвач лугьун, зи фикирдалди, дуьз туш. Россиядин властрин къурулушринни ФЛНКА-дин арада авай алакъаяр къвердавай мягькем жезва. Мадни шад жедай кар ам я хьи, эхиримжи вахтара лезги миллетдин къанажагъдин дережаяр хкаж, иллаки акьалтзавай несилдин векилар ватанпересар яз тербияламиш жезва. Жегьилар дуьз рекьелай алат тавун патал ФЛНКА-дини датIана женг тухузва. III Съезддилай кьулухъ къенин йикъалди ФЛНКА-дин Советди 20-далай артух заседанияр кьиле тухванва. ФЛНКА РФ-дин регионар вилик тухунин Министерстводин Консультативный советдин гьамишалугъ член я ва ада РФ-дин Президентдинни Гьукуматдин Администрациядихъ, Госдумадихъ, министерствойрихъ, РД-дин руководстводихъ, Дагъустандин шегьерринни районрин администрацийрихъ галаз сих алакъаяр хуьзва. ГьакIни ФЛНКА-дин Президент РФ-дин Президентдин патав гвай миллетрин арада алакъайрин Советдин член я ва и жигьетдай кьве комиссиядин кIвалахда иштиракзава. Вири и крари ФЛНКА вилик финиз таъсирзава. Къейд ийин, чи автономиядихъ Москвада хсуси офис хьанва. Ам Старая Басманная куьчеда ава. И дарамат чав РФ-дин Гьукуматди чкIанвай гьалда аваз яргъал йисара кирида вуганвай. Бязи къуватриз ам чавай къакъудиз кIанзавай, гьатта серенжемарни кьабулзавай. Дарамат чи гъиле амукьун патал ФЛНКА 20-далай виниз суддин гьерекатра иштиракуниз мажбур хьана. Месэладал нукьтIа эцигун патал са шумуд йис герек атана. Гуьгъуьнлай чна дараматда капитальный ремонтдин кIвалахар кьиле тухвана. И карда куьмекар гайи гьар са касдиз автономиядин руководстводи сагърай лугьузва. Абурун ва чи алахъунар себеб яз къе лезгийрихъ Москвадин центарада пуд мертебадин офис хьанва. Чна ана кIвалахиз кьве йис тамам жезва.

2010-йисан 22-октябрдилай ФЛНКА-дихъ хсуси сайт-информациядинни аналитикадин портал хьанва (FLNKA.RU). Юкьван гьисабдалди ана вацра 15-далай виниз аналитикадин тах квай макъалаяр чапзава. Сайтдал тежрибалу пешекаррикай ибарат тир десте, регионра авай штатдик квачир мухбирар машгъул я ва анай лезгийрин культурадиз, тарихдиз, географиядиз талукь макъалаяр кIелиз жезва. И мукьвара чи сайт РФ-дин сайтрин арада 8-чкадал акъатнава. Им еке агалкьун я. ФЛНКА-дин визитный карточкадиз элкъвенвай 

Интернетда авай и къуватди датIана “Кавказдин политика” информациядин агентстводихъ, “Настоящее время” газетдихъ, Храх-Убадин жегьилрин официальный сайтдихъ, “Азад Кавказ” форумдихъ, “СПЕКТР” аналитикадин порталдихъ, “Лезги газетдихъ”, “Азад Лезгистан” гьерекатдихъ, Интернетда авай Лезги радиодихъ, “ЛезгиЯР” порталдихъ галаз амадагвилин алакъаяр хуьзва.

ФЛНКА-ди илимдин жигьетдайни хейлин кIвалахар кьиле тухванва. 2008-йисан 15-майдиз ФЛНКА-ди РФ-дин регионар вилик тухунин министерстводин куьмекдалди “Кавказдин Албания ва лезги халкьар: тарихдинни культурадин ирс ва алай аям” лишандик кваз илимдин международный симпозиум кьиле тухвана. Ихьтин форум Россияда сифте яз тешкилнавай ва ам себеб яз гуьгъуьнлай Бакудани Ереванда тайифайрин культурайрин ирсинай конференциярни кьиле фена. Винидихъ къейд авур симпозиумди Кавказдин Албаниядин тарихдал машгъул Украинадин, Швейцариядин, Австриядин, Франциядин, Москвадин, Санкт-Петербургдин, Дагъустандин алимар-албанистар сад авуна. Симпозиумда Синайский полуостровдилай албан чIалаз талукь палимпестар жагъурай ва идалди албанистикада икьван чIавалди малум тушир цIийи чин ачухай гуржийрин машгьур алим Заза Алексидзеди иштиракна. “И симпозиумда иштиракдай мумкинвал хьунал зун кьадарсуз шад я. Ам вини дережада аваз тешкилнава”,- къейднай 2008-йисуз З.Алексидзеди. Симпозиумдал Азербайжандин бязи алимри ракъурнавай докладар кIелнатIани, Азербайжандин илимрин академиядин тарихдин институтдин директор Якьуб Магьмудова и мярекатдиз Азербайжандин алимриз са гьихьтин ятIани себералди теклифнач лугьуз наразивална. Къейд ийин хьи, чна къунши республикадин хейлин алимриз теклифнавай, амма абур атанач. Симпозиумдилай гуьгъуьниз Азербайжандин СМИ-ра “Кавказдин Албаниядин тарих, культурадин ирс, фольклор, памятникар гужуналди лезгийрин кIвачихъ ягъиз кIанзавай” лугьудай делилар пайда хьана. Шукур Аллагьдиз, ФЛНКА-дин векилрилай симпозиумдин вири иштиракчийрихъ, гьа жергедай яз Азербайжандихъ галазни алакъаяр дуствилинбур хъийиз алакьна.

Мукьвара “Албаниа Кавказика” тIвар алаз кьве томдикай ибарат тир кIватIални чапдай акъатда. Храх-Уба ва Урьян-Уба хуьрерин месэлаяр гьялун патал ФЛНКА-дин Президент 2011-йисан 19-июлдиз Москвадин мэрияда гьа чIавуз уьлкведин премьер-министр тир Владимир Путинахъ галаз гуьруьшмиш хьана. А вахтунда сифте яз лезги халкьдин тIал алай месэлаяр вини дережада аваз веревирд ийидай мумкинвал хьанай. Са йис алатайла, 23-24-августдиз, Саранскда РФ-дин Президентдин патав гвай миллетрин алакъайрин Советдин сад лагьай заседание кьиле фена. И мярекатдани ФЛНКА-дин руководстводи лезги халкьдин месэлаяр къарагъарнай. И гуьруьшрин нетижада мукьварал Храх-Уба ва Урьян-Уба хуьрерин хсусиятдиз зарар хьайи агьалийрин яшайишдин шартIар хъсанарун патал махсус программа кардик акатда. И месэладиз Россиядин бюджетдай 900 миллиондилай виниз пул чара ийида. 2011-йисан 21-июндиз ФЛНКА-дин теклифдалди РФ-дин Общественный палатада сифте яз “Россиядин кьве патал пайнавай миллетар: ихтияррин статус” темадай веревирдер кьиле фена.

2011-йисан 29-апрелдиз Тюменда ФЛНКА-ди РФ-дин регионар вилик тухунин министерстводихъ галаз санал межрегиональный конференция тешкилна. И гьерекатрин нетижада ФЛНКА-диз Россиядин дережада аваз лезги халкьдин тIал алай месэлаяр раиж ийидай мумкинвал хьана. 2012-йисан 18-июндиз Москвада “РФ-динни Азербайжан Республикадин арада авай сергьятар себеб яз кьве патал пай хьанвай лезги ва авар халкьарин месэлаяр ва абур гьялдай рекьер” лишандик кваз кьиле фейи международный конференциядал РФ-дин ва Азербайжандин гьукуматриз, РФ-дин Госдумадиз, РФ-дин МИД-диз, РФ-дин ФСБ-дин сергьятрин къуллугъдиз ва РД-дин Гьукуматдиз лезги ва авар халкьарин месэлаяр гьялун патал 30-далай артух теклифар ва веревирдер рекье туна.

Важиблу месэлайрин арада агъадихъ галайбур ава:

- Азербайжан Республикада лезги ва авар халкьарин чIалариз регионрин чIаларин ихтияррин статус гун;

- Азербайжан Республикадин Къусар ва Закаталы шегьерра РФ-дин консульствояр ачухун;

- Азербайжан Республикада Гьукуматдин куьмекдалди лезги ва авар чIаларалди телерадиовещание кардик кутун ва и чIаларалди газетар чапдай акъудун;

- Азербайжан Республикадин властри нахско-дагестанский чIаларин хизандик акатзавай халкьарин культураяр, чIалар хуьн ва вилик тухун патал гьукуматдин махсус программа кьабулун;

- 1997-йисан 4-июндиз РФ-дин Госдумади кьабулнавай 1465-II-нумрадин Къарардал асаслу яз, лезги ва авар халкьарин ихтияррин жигьетдай кардик квай РФ-динни Азербайжан Республикадин икьрар кьилиз акъудун.

Къарагъарнавай месэлайрай са бязибуруз гьукуматдин властдин къурулушри жавабарни гана. ИкI, Азербайжан Республикада яшамиш жезвай чи ватанэгьлийрин ихтиярар хуьнин ва хайи чIалар, культураяр вилик тухун патал Бакуда авай Россиядин векилханадиз федеральный бюджетдай пулдин такьатар чара авуна.

Алай вахтунда Дагъустанда 2013-2017-йисара къецепатан уьлквейра яшамиш жезвай ватанэгьлийриз куьмек гун патал тайин макьсаддихъ элкъуьрнавай программа кьабулзава. Идалай гъейри, ФЛНКА-ди авар халкьдин общественно-региональный гьерекатдихъ галаз санал мад са международный конференция тешкилун патал гьазурвилер аквазва.

ФЛНКА-ди Ислам диндин ва мусурманрин вилик чпин хиве авай пак везифа кьилиз акъудун патал Кьиблепатан Дагъустандин районра ва Хасавюрт райондин Къурушрин хуьре мусурманар патал ифрат кьиле тухвана. Белиж поселокда мискIин хкажун патал ФЛНКА-ди 3 миллион манат пул чара авуна. Алай вахтунда “Милли кадрияр” проектни кардик акатнава. Адан куьмекдалди диндин образование къачун патал са жерге лезги жегьилар къецепатан уьлквейрин диндин вузриз рекье твада. Вири харжияр ФЛНКА-ди вичин хивез къачунва.

ФЛНКА-ди гьар йисуз Москвада лезгийрин Яран сувар вини дережада аваз тешкилзава. Эхиримжи йисара сувар кьиле тухудайла, автономиядин руководстводи вадар аваз кIелзавай студентриз ва яру дипломралди вузар акьалтIарнавай жегьил пешекарриз гьуьрметдин грамотаяр ва пулдин пишкешар гана.

ЦIинин йисан гатуз лезги культура, илим ва образование вилик тухун патал “Лезги лувар” тIвар алай фонд тешкилнава. Алай вахтунда ам пулдин такьатралди таъминарунин кIвалах давам жезва. Вич ФЛНКА-дилай аслу туширди тир и фондунин куьмекдалди лезги халкьдин хейлин месэлаяр гьялиз жеда. Мисал яз, культура вилик тухун патал кьабулзавай проектар финансламишун, ктабар акъудун, илимдин ахтармишунар кьиле тухун патал грантар тешкилун, бажарагълу жегьилриз ва спортсменриз спонсорвал авун. Фонд тешкилдалдини ФЛНКА-ди винидихъ къейд авунвай хилер вилик тухун патал хейлин серенжемар кьабулнай.

150 йис тамам хьанвай Ахцегьрин школадиз алай аямдин техникадалди тадаракламишнавай классар багъишна. Жегьил лезги спортсменар 10 агъзур доллардин кьадарда аваз пулдин премийриз лайихлу хьана. Лезгийрин операдин жегьил манидар Селим Аллагьяроваз музыкадин рекьяй тежриба хкажун патал 15 агъзур евродин кьадарда авай грант чара авуна. И пулар бизнесмен, ФЛНКА-дин Советдин член Азад Бабаева вичин хивез къачунай.

Алава яз, Азад Бабаевани Токай Керимова К-1 стилдай лезги машгьур спортсмен Жаббар Аскероваз 20 агъзур доллардин кьадарда аваз пулдин куьмек гана.

“ООН-дани лезгидин сес жедайвал…” Зи эрзиман - зи рикIин рагъ Халкьдихъ хьун я азад нефес. Лезгистандихъ - хъхьанвай сагъ! - ООН-дани жедайвал сес. Азиз Алем.

Ни фикирдай, лезгийрин машгьур шаир Азиз Алема 1963-йисуз кхьей “Зи рамсабриз” шиирдавай и цIарар, зур асир алатайла, чи халкьдин кьисметдин вилик гьа къе кхьей цIарар хьиз акъваз хъийидайди?! Дуьз лугьузва халкьдин камалди, халис шаирдиз вичин халкьдин кьисметдикай, пакагьан йикъакай виликамаз хабар жеда. Шаирди и цIарар кхьей вахтунда ООН-да лезгидин сес хьун гьакъикъатдивай яргъа авай мурад тиртIа, гила а мурад уьмуьрдиз кечирмишдай вахт алукьнава...

Идан гьакъиндай Съезддал кIватI хьанвайбуруз Ариф Керимова гайи муштулухди шагьидвалзава. Мукьвара ООН-дин сайтда лезги халкьдикай делилар пайда жеда. Алай вахтунда ФЛНКА-дин делегацияди 2012-йисан 29-ноябрдилай 1-декабрдалди Женевада кьиле фидай ООН-дин Генеральный ассамблеяда иштиракун патал гьазурвилер аквазва. И мярекатдал ФЛНКА-див ам ООН-диз кьабулнавайвилин гьакъиндай шагьидвалдай шагьадатнама ва вичин нубатда ФЛНКА-ди ООН-дин руководстводив чи автономиядин пайдах вахкуда.

ФЛНКА-дин Советда дегишвилер Съезддал ФЛНКА-дин Президент хкягъунин сечкияр кьиле фена. Делегатрин вилик кьве касдин - Ариф Пашаевич Керимован ва Ризван Забитович Ризванован - кандидатураяр эцигна. 37 делегатдикай 35 касди рейсадвилелди сесер гуналди, ФЛНКА-дин Президентвиле нубатдин сеферда Ариф Керимов хкя хъувуна. ФЛНКА-дин цIийиз хкя хъувур Советдик 16 член акатнава. Автономиядин Уставдик кухтур дегишвилерин гьакъиндай Амил Саркарова доклад авуна. “Халкьдихъ рикI куз хьанайтIа...” ФЛНКА-дин IV Съезддал хейлин делегатар, мугьманар рахана. Кьилди къачуртIа, вичин рахунра генерал-майор, ФЛНКА-дин Советдин член Тагьир Эминова къейдна:

- Играми делегатар, иштиракчияр! Заз Ариф Керимоваз вич нубатдин сеферда ФЛНКА-дин Президентвиле хкя хъувун мубаракиз кIанзава. Ам кар алакьдай тешкилатчи, гъавурда авай пешекар, халис ватанперес тирди и йисара автономияди кьиле тухванвай кIвалахри къалурзава. Лезги общественностдин векилар вири гьахьтинбур хьанайтIа, чи халкьдин хейлин месэлаяр гьялна акьалтIарнавай. Кьиблепатан Дагъустандин районрин кьилери, РФ-дин Госдумада ва РД-дин Халкьдин Собранида авай чи депутатри лезгийрин тIал алай месэлайриз саки фикир гузвач. Чна абуруз виридаз къенин мярекатдиз теклифнавай. Къведа лагьана хиве кьунатIани, гьайиф хьи, садни атанач. Эгер гьар са райондин кьилин, гьар са депутатдин рикI халкьдихъ куз хьайитIа, чи къуват екеди жеда, арада авай садвални - мягькем. Гьар са регьбердин идеология эвелни-эвел хайи халкьдин культура, чIал вилик тухуникай, халкьдик къалабулух кутазвай месэлаяр гьялдай рекьер жагъуруникай ибарат хьана кIанда…

Съезддал гьакIни ФЛНКА-дин Пайдахдин ва Гербдин месэлаярни веревирдна, къарар кьабулна. (Ам чна газетдин къведай нумрада чапда). ФЛНКА-дин Съезддал автономиядин тIварцIихъ хуш келимаяр талышрин, эрменийрин, аваррин автономийрин векилри лагьана. Дагъустандай РД-дин Гьукуматдин тIварцIихъай РД-дин Халкьдин Собранидин депутат Сейфуллагь Исакьова тебрикдин телеграмма рекье тунвай. Съезддин кьвед лагьай пай Урусатдин меркездин са ресторанда давамар хъувуна. Къуй чи халкьдин месэлаяр гьялдай рекьер ачух, мумкинвилер артух хьурай!

Выпуск № 46 (10535)

Лезги Газет

Дайджест