ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Машгьур муаллимдихъ галаз акун

27-лагьай январдиз Докъузпара райондиз вичихъ чlехи агалкьунарни кьетlен тежриба авай лезги чlаланни эдебиятдин муаллим Шамсудин Шихкеримович Магьамдаров атанвай. Къейдна кlанда хьи, ихьтин гуьруьш тешкилуник кьил кутурди ФЛНКА-дин тешкилатдин Ахцегь районда авай векилар я.

Стlал Сулеймана вичин девирда лезги эдебият, чlал, эл вири уьлкве тирвал, дуьнья тирвал машгьур авур хьиз, Шамсудин муаллимдини 2013-лагьай йисуз, вичин пешекарвилин устадвилелди, кьакьан дережадин тежрибадалди лезги чlал машгьурна. Ам Дагъустандин муаллимрикай сифте яз Вирироссиядин «Хайи чlалан лап хъсан муаллим» конкурсда сад лагьай чка кьуналди гъалиб хьана. Куьруь гафаралди лагьайтlа, лезги муаллимди уьлкведин вири халкьарин вилик Дагъустандихъ, лезгийрихъ образованидин рекье вини дережадин лайихлу пешекарар авайди, зурба чlал авайди субутна.

Конкурсдин гъалибчидихъ галаз чи райондин мектебра кlвалахзавай лезги чlалан муаллимрин гуьруьш Усугъчайдин мектебда кьиле фена.

Шамсудин Магьамдарова Стlал Сулейманан райондин Герейханов хуьруьн 1-нумрадин юкьван мектебда кlвалахзава. Адахъ галаз зун алатай йисуз Кьасумхуьрел кьиле фейи лезги чlалан гегьенш конференциядал таниш хьанай. Акьалтзавай несилдик жуван чlалаз, ватандиз, халкьдиз вафалу хьунин гьиссер кутаз алахъзавай, алакьзавай пешекар муаллим хьиз таниш я ам чаз.

Гуьруьшдал муаллимди вичин тежрибадикай, конкурс кьиле фейи тегьердикай, хайи чlалан тарсар гузвай муаллимдин везифайрикай, аялрин фикир тарсарал желб авунин карда ишлемишна кlани тадаракрикай, вичиз хас тирвал, фасагьатдаказ, дамах гвачиз ихтилатна. Сифте нубатда ада кlватl хьанвай вири муаллимриз хуш келимаяр лагьана. Идалай кьулухъ вичин агалкьунрихъ галаз алакъалу яз телевиденидин къуллугъчийри гьазурнавай видеодин, тарсарин, мярекатрин чlукариз килигдай мумкинвал гана. 

Къалажухрин, Миграгъ-Къазмайрин, Усугъчайдин, Мискискарин, Цlийи-Каракуьредин, Аваданрин хуьрерин мектебрин муаллимри Шамсудин Магьамдарован маналу, таъсирлу ихтилатрихъ лезетдивди яб акалзавай. 

Малум хьайивал, алатай йисуз Москвада «Хайи чlалан лап хъсан  муаллим» конкурс кьиле тухун ва адан жюридани иштиракун Шамсудин Магьамдаровал тапшурмишна. «Анжах квелай алакьда и кар», - лагьанва адаз урусатдин филологиядин илимрин докторди. 

Ш.Магьамдарова чlал вилик тухунин рекье лайихлу кlвалахар кьиле тухузвай, вичиз конкурсда иштиракунин жигьетдайни куьмек гайи «Сулейман-Стальский район» МО-дин кьил Нариман Шамсудинович Абдулмуталибоваз чугъсагъул малумарна.  

Мярекатдин эхирдай Усугъчайдин СОШ-дин директор Т.Аразова, и мектебдин лезги чlалан муаллим А.Аслановади, Къалажухрин СОШ-дин лезги чlалан муаллим К.Ферзалиева Шамсудин Магьамдароваз гуьруьшмиш хьунай, метлеблу ихтилатар авунай сагърай малумарна.

Куругъли ФЕРЗАЛИЕВ

.

Дайджест