Лезги автономиядини Билбилхуьруьн мектебди “Самурдин авазар” тIвар алай акъажунар тухвана
Хел: 
5-февралдиз Мегьарамдхуьруьн райондин Билбилхуьруьн юкьван школада чIехи шаир Алирза Саидован тlварунихъ галай "Самурдин авазар” конкурс кьиле фена.
ФЛНКА-ди ва рагьметлу шаирдин руш Эмина Саидовади тешкилай конкурсдин кьилин макьсад Дагъустандин авторрин эсерар раиж авун, бажарагъ авай аялар дуьздал акъудун ва абуруз куьмек гун, алакьунар авай аялрал общественностдин фикир желбун тир. Ихьтин мярекат Билбилхуьруьн школада кьвед лагьай сеферда кьиле тухузва.
Ана школадин директор Мурад Саидова, ФЛНКА-дин векил Самур Саидова, шаир Гъулангерека, композитор Къагьриман Ибрагьимова, Чахчарин, Хтунрин, Тагьирхуьруьн, Самурдин ва Билбилхуьруьн юкьван школайрин муаллимрини чlехи классра кlелзавай аялри иштиракна.
Мярекат ачухай Эмина Саидовади лагьана: "Зи буба Алирза Узеировича жегьил шаирриз гьамиша вичелай алакьдай куьмекар гайиди я. Ада абуруз шиирар кхьинин рекьяй чирвилер, куьмекар гудай, меслятар къалурдай. Ам рикlел хуьнин, бубадин кар давамарунин лишан яз, за и кlвалах гъиле кьунва. Къе чи мярекатдиз Белиждин гимназиядин дидед чlалан муаллим, шаир, РД-дин лайихлу муаллим, чи ученица хьайи Гъулангерек Ибрагьимовадиз ва композитор Къ.Ибрагьимоваз теклифнава”.
Ахпа ада мярекат кьиле тухун школадин чlехи классра кlелзавай Алина Алиевадал ва Селем Абасовадал ихтибарна.
Мярекатда конкурсантри Алирза Саидован, Седакъет Керимовадин, Гъулангерк Ибрагьимовадин ва аялри чпи яратмишнавай эсерар устаддиз кlелна, билбилхуьруьнви шаир Гъулангерекан "Кlанда заз рагъ” ктаб презентация авуна, шаирди вичин эсерар кlелна.
Нетижада эсерар устаддиз кlелунай 1-чкайриз Эмина Шихалиева ва Гуьлмарьям Абасова (Билбилхуьр), 2-чкайриз Лида Агьмедова (Чахчар) ва Эльзана Мирзаметова (Билбилхуьр), 3-чкайриз Ангелина Ибилкьасумова (Тагьирхуьр) ва Халил Къазимегьамедов (Самур) лайихлу хьана.
Чпин эсерар кlелайбурун арада жюриди Секинат Османовадин (Самур), Марьям Шихмурадовадин (Билбилхуьр), Лида Агьмедовадин (Чахчар). Минара Сарухановадин (Билбилхуьр) ва масабурун яратмишунриз хъсан къимет гана.
Школадин директор М.Саидова мярекатда иштиракай виридаз сагърай лагьана ва конкурсда гъалиб хьайибурузни призерриз ФЛНКА-дин патай грамотаярни лезги авторрин ктабар гана.
Ибурулай алава яз С.Саидова сад лагьай чкайриз лайихлу хьайибуруз ФЛНКА-дин эмблема алай футболкаяр, шаир Гъ.Ибрагьимовади призерриз вичин ктабар пишкешна.
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Дербент райондин Белижда Чlехи Гъалибвилин 70 йисаз талукьарнавай мярекатар кьиле фена
“Лезги газетдин” ФЛНКА-дин векилрихъ галаз алакъаяр пара хьурай
Къейд эцигун