ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Президентдин Чарчин цIарцIеваз Пакадин йикъахъ умудлу яз

Россиядин Федерациядин Президент Владимир Путина Федеральный Собранидиз кIелай чарчихъ телевизордай, радиодай гьам чи ва гьам къецепатан уьлквейрин миллионралди инсанри яб акална. Дуьньяда чIехибурукай сад тир государстводин Кьил Владимир Путина гьам къенепатан ва гьам къецепатан политикадиз талукь яз Россияди кьунвай рекьикай ачухдиз лагьана.

Чин кьун тавуна лугьун, эхиримжи варцара дуьньяда ва уьлкведа кьиле физвай вакъиайри, арадал къвезвай гьалари чи инсанрик секинсузвал кутунвай. Украинада кьиле физвай вакъиайрай, цавай самолет яна гадарунин тахсир Россиядин хиве туна, Евросоюзди, США-ди Россиядин Федерациядин аксина санкцияр кьабулна. США-ди басрухар гуналди нафтIадин уьлквейри адан къиметар агъузардай чкадал гъана.

Идахъ галаз алакъалу яз Россиядин манатни ужуз хьана. Къе са доллардин къимет 53, са евродин къимет 65 манат хьанва. Икьван агъуз дережадиз манат садрани аватайди туш. Доллар виниз акъатунихъ галаз алакъалу яз чи базарра, туьквенра авай вири шейэрин къиметарни хкаж хьанва.

Владимир Путина вичин Чарче чи халкьдик гъалаба кутазвай вири и месэлайрикай ачухдиз лагьана. Ада къейд авурвал, са бязи уьлквейриз Россия къуватлу, къудратлу хьун, уьлкведа промышленность, хуьруьн майишат ва маса хилер пайгардик ахкатун, государстводихъ вичин мурадар, къастар, сиясат хьун залан акъвазнава.

ЦIийи Россияди вири уьлквейриз дуствал, амадагвал теклифнатIани, виликан "къайи дяведин” иесиярни дустарай кьунатIани, анжах санал ва амадагвилелди кIвалахунин шартIар тешкилнатIани, Россия гьамиша усал яз акуна кIанзавай уьлквеяр мад чаз "къайи дяведин” гьалар малумариз алахънава.

Малайзиядин самолет ягъуникай багьна кьуна, санкцияр кьабулна. И кар хьаначиртIа, абуру са маса багьна жагъурдай. Къуй чир хьурай, гьихьтин кьуьруькар абуру акъудайтIани, Россия абурун кIиринай фидач.

Абуру лап ягьсузвилелди Россиядин Федерациядиз акси сиясат тухузватIани, чаз къурху хьун лазим туш. Алай вахтунда Россиядихъ вичин аслу туширвал, азадвал, халкьарин итижар хуьдай, душманриз лап вини дережадаваз жаваб гудай къуват, такьат, армия, вири жуьредин яракьарни ава.

Уьлкве авайдалай мадни абад, мублагь хьун, хайи Ватандин азадвал, аслу туширвал хуьн гьар са агьалидилайни аслу я, - лагьана Президентди.

И кар патал гьар сада вичин къуллугъдин, пешедин везифаяр намуслувилелди, гьакъисагъвилелди кьилиз акъудун, халкьдиз менфят хкатдай крар гзаф авун, тарашунриз, тахсиркарвилериз рехъ тагун лазим я. Гьайиф хьи, алай вахтунда государстводивай гзаф кIанзавай, амма умуми девлетрик вичин зегьметдин пай кутаз такIанбур гзаф жезва.

И нукьсандикай азад хьана кIанда. Иллаки гьукумдин, властдин идарайра, къайдаяр хуьдай органра ва къурулушра къуллугърал алайбур, акционервилин обществойрин, фирмайрин, компанийрин, холдингрин регьберар. Президентди къецепатан уьлквейрин банкара чпин капиталар эцигнавайбурузни абур хайи ватандиз хкун теклифна. Уьлкведин садвал, аслу туширвал кIанзавайбуру гьа и кар авун герек я.

Президентди инанмишвилелди ва кьетIивилелди лагьана хьи, къецепатай Россиядин тумунал кьуьл илисиз кIанз ийизвай гьерекатрихъ са метлебни жедач. Ида гена чун мадни мукъаят хьуниз, гьар са хиле крар вилик тухуниз, четинвилериз дурум гуниз куьмекда. Къенепатан продукция артухардай шартIар арадал гъида.

Эгер куьрелди лагьайтIа, Президентди вичин Чарче гьар са агьалидиз пакадин йикъахъ умуд ва вири крар хъсан хьун патал гьунарлу зегьмет чIугуниз эвер гузва.

Лезги Газет

Дайджест