Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

“Лезги газетдин” ФЛНКА-дин векилрихъ галаз алакъаяр пара хьурай

 

1-февралдиз "Лезги газетдин” редакцияда ФЛНКА-дин Дагъустанда авай жегьилрин департаментдин векилар багъри газетдин коллективдихъ галаз гуьруьшмиш хьана. Мярекат республикада ФЛНКА-дин векил тир  Мегьамед  Алиева  ачухна ва газетдин коллектив вичихъ галаз атанвай жегьил активистрихъ галаз танишарна. Абурун арада РД-дин диндин управленидин гьаждихъ галаз алакъалу месэлайрал машгъул отделдин къуллугъчи, ери-бине Сулейман-Стальский райондин Агъа СтIалдилай тир Бейбалаев  Талиб  Бейбалаевич,  Махачкъалада авай хуьруьн майишатдин университетдин студент, ери-бине Герейханован хуьряй тир  Рамазанов  Ариф  Вакъифович,  ДГПУ-дин физкультурадин факультетдин студент, ери-бине Кьурагь райондин Хуьрехуьряй тир  Исаев  Давуд  Мегьамедханович  авай.

- Къейд авун лазим я, ФЛНКА-дин Дагъустанда авай векилханада жегьилрин департамент кардик кутуна гзаф вахт туштIани, ина чпихъ жуьреба-жуьре хилерай алакьунар авай 25 жегьил тупламиш хьанва, - башламишна суьгьбет  Мегьамед  Алиева. - Абурун виридан макьсад гьарда вичелай алакьдайвал хайи халкьдиз куьмекар гун я. И гъвечIи муьгьлетда чалай чIехи кIвалахар бажармишиз хьанвачтIани, тешкилатдин кIвалах вилик фин патал чи гапIалди ийизвай алахъунри са гьихьтин ятIани цIирер гъизвайди ашкара жезва.

Алатай йисуз чна лезги поэзиядин классик, чIехи камалэгьли, Дагъустандин халкьдин шаир СтIал Сулейман рикIел хкунин лишан яз, республикадин Расул Гьамзатован тIварунихъ галай  Милли библиотекада чIехи мярекат кьиле тухванай. Аниз лезги халкьдин интеллигенциядин векилриз, меркездин вузра кIелзавай лезги студентриз ва гьакIни хайи литературадал рикI алай гзафбуруз теклифнай. Им чи жегьилрин департаментди тешкилай сад лагьай кIвалах я. А чIавуз чаз "Лезги газетдин” коллективдини чпелай алакьдай вири жуьрейрин куьмекар ганай. И кардай, гаф кватай чкадал, чаз квез,багъри газетдин коллективдиз, сагърай лугьуз кIанзава.

Анлай инихъ ФЛНКА-ди республикада тухванвай мярекатрин кьадар тIимил туш. Кьилди къачуртIа, алатай йисуз чна Докъузпара райондин Усугъчай хуьре Кукваз Ражабан тIварунихъ галай милли музыкадин фестиваль тешкилна. Дербентда мартдин вацра Яран сувариз талукь чIехи мярекат тухвана. Кьиблепатан Дагъустандин са шумуд районда жегьилрин парламентрихъ галаз форумар ва тренингар кьиле тухвана. ГьакIни Дербент ва Махачкъала шегьерра кардик квай реабилитационный центрайра мергьяматлувилин серенжемар тешкилна. Мусурманрин пак варз тир Рамазандин вацра винидихъ къалурнавай районра ва Хасавюрт райондин ЦIийи Къурушрин хуьре ифтарар (сив хкуддай тIуьнар) гана. Гьелбетда, чна авунвай крарин сиягь мадни давамариз жеда, - лагьана ада.

Мегьамед Алиеван гафарай мадни малум хьайивал, алай вахтунда ФЛНКА республикадин шегьерра яшамиш жезвай лезги аялриз Кьиблепатан Дагъустандин са районда лагерар тешкилунин къайгъуйрик ква.

- И кардин кьилин макьсад шегьерра чIехи жезвай акьалтзавай несилар багъри ерийрихъ галаз танишарун, хайи чIалал, культурадал ашукьарун, абуруз лезги халкьдин тарихдикай чирвилер гун я, - лагьана Мегьамеда. - Садазни сир туш, алай вахтунда шегьерра яшамиш жезвай лезги хизанар, иллаки акьалтзавай несилрин векилар, хайи чIалавай, культурадивай яргъа жезва. Гьатта чал дидед чIал ерли чин тийизвай жегьил лезгиярни дуьшуьш жезва. Ихьтин вахтунда винидихъ тIвар кьунвай лагерар кардик кутунихъ еке метлеб ава. Амма гьелелиг а лагерь гьи районда кардик кутадатIа, тайин хьанвач. И месэладин патахъай чна алай вахтунда лезги районрин кьилевай ксарихъ галаз меслятар ийизва. 

Гаф кватай чкадал къейд ийин хьи, акьалтзавай несилар дидед чIалал желб авуниз ФЛНКА-ди кьетIен фикир гузва. Чи сайтди гила лезги чIалалдини кIвалахзава. Анай материалар кьуд чIалалди кIелдай мумкинвал хьанва: ингилис, урус, лезги, азербайжан. "Вучиз лезги тешкилатдин сайтда азербайжан чIал тунва?”, - икI лугьуз хабар кьазва гзафбуру. И кардин себеб ам я хьи, къуба патан гзаф лезгийриз, гьайиф хьи, лезги ва урус чIаларал кIелиз, кхьиз чизвач. Гьавиляй чун сайтда азербайжан чIал  кардик кутуниз мажбур хьанва,  - къейдна М.Алиева.

Гуьруьшдал тайин хьайивал, ФЛНКА-ди алай вахтунда лезги халкьдихъ ва лезги чIалан дестедик акатзавай миллетрин уьмуьр аваданламишунин мураддалди, кар алай са шумуд проект гъиле кьунва. И жигьетдай образованидиз талукь проектни важиблубурукай сад я.
- И мукьвара чи тешкилатдин делегация Кьиблепатан Дагъустандин са шумуд райондиз мугьман хьана. Анра чна районрин кьилер образованидин проектдихъ галаз танишарайдалай кьулухъ, мектебра муаллимрихъ ва чIехи классра кIелзавай жаванрихъ галаз гуьруьшмиш хьана. И проектдин макьсад вуч я лагьайтIа, ФЛНКА-дин руководстводихъ цIинин йисалай гатIунна Кьиблепатан Дагъустандин районра агалкьунар аваз школа акьалтIарзавай, яшайишдин жигьетдай дарвал авай хизанрай тир жаванар (гьар райондай кьве кас) Москвада, Санкт-Петербургда ва Ярославлдин областда вузрик кутунин ният ава. Гьа ихьтин ксар тайинарун патал чна мектебра кIелзавай жаванрив махсус суалар авай анкетаяр ацIуриз туна. Гила а анкетайрин бинедаллаз чна гележегдин студентар хкяда, - лагьана Мегьамеда.

ФЛНКА-дин РД-да авай векилханади, иллаки жегьилрин департаментди кьиле тухузвай кIвалахрикай, адан вилик акъвазнавай месэлайрикай редакциядиз мугьман хьанвай Бейбалаев Талиба, Рамазанов Арифа, Исаев Давуда чпин фикирарни лагьана. Абуру къейд авурвал, ФЛНКА-ди неинки кьилди са лезги миллетдин, гьакIни лезги дестедик акатзавай амай халкьарин (агъул, табасаран, рутул, цIахур). къайгъуйризни кьетIен фикир гузва. 

Мугьманриз дикъетдивди яб гайидалай кьулухъ "Лезги газетдин” кьилин редактор  Агъариза  Саидов  суьгьбетдик экечIна:
- Гьуьрметлу мугьманар, сифте нубатда заз куьн атуналди чи коллектив шад хьанвайди раиж ийиз кIанзава. Багьа мугьманриз лезгийри "Куьн атурай, рагъ атурай” лугьуда. Гьелбетда, экуь мурадар, михьи ниятар гваз хайи халкьдин къайгъу чIугвадай ватанэгьлияр майдандиз экъечIайла, чун кьадарсуз шад жезва. Вучиз лагьайтIа чи газетди тухузвай кIвалахдин кьилин макьсадни ватанэгьлийрин гележег экуьди авун я. Чаз аквазвайвал, ФЛНКА-ди кьунвай рехъни гьа ихьтинди я. Хайи халкьдин къайгъуйрал машгъул тешкилатда куьн хьтин жегьил къуватар пайда хьуни чи руьгь хкажзава. Къе чи редакциядиз мугьман хьанвайди кьуд кас ятIани, гележегда чи коллектив куь департаментда зегьмет чIугвазвай вири жегьилрихъ галаз таниш жедайдак за умуд кутазва.

Гьелбетда, хайи халкь патал ийизвай кIвалахдин яцIа авай ксариз чпин мурадар, фикирар уьмуьрдиз кечирмишун гьамиша регьят акъваззавайди туш. Иллаки халкьдин къайгъуда авай ватанпересриз манийвилер гудайбур, абурун чархара лашар тваз алахъдайбур гзаф жедайди я. Къуй ихьтин дуьшуьшрал куьн расалмиш тахьурай, халкьдин рекье куьне къачузвай гьар са кам кьезилди, манийвилер галачирди хьурай. Амма четинвилерал расалмиш хьайитIа, куьн а имтигьанрай сабурлудаказ, уьтквемдаказ, лайихлудаказ, кьилинди гьахълудаказ экъечIдайдахъ чун кIевелай инанмиш я. Чир хьухь, "Лезги газетдин” коллективни квез алакьдай вири жуьредин куьмекар гуз гьамиша гьазур я.

Чаз аквазвайвал, ФЛНКА-ди лезги дестедик акатзавай муькуь халкьарин къайгъуйризни фикир гузва. Им лап хъсан кар я. Са шакни алачиз, и карди лезги дестедик акатзавай халкьар садзава, битавзава.

Мад са кар къейд тавуна жедач, алай девирда пулдин такьатар галачиз гьич са кIвалахни гъиле кьаз жезвайди туш. Чаз чизва, ФЛНКА-дизни пул гудай махсус чешме авайди туш. Гьаниз килигна Ариф Пашаевича тешкилатдин кIвалах вилик фин патал спонсорар желбзава. Имни регьят крарикай туш.

Къуй Ариф Керимов кьиле аваз ФЛНКА-дин коллективдихъ кIвалахдин рекье мадни еке агалкьунар хьурай! Халкьдин рекье къачузвай камарин еришар гележегда мадни йигинбур хьурай, - лагьана Агъариза Узаировича.

Гуьгъуьнлай анал рахай "Лезги газетдин” кьилин редактордин заместитель Шихмурад Шихмурадова, жавабдар секретарь Даир Бейбалаева, литературадин отделдин редактор Мердали Жалилова атанвай мугьманриз абуру халкь паталди ийизвай мергьяматлу, менфятлу крарай чухсагъул лагьана ва ФЛНКА-дихъ гележегда мадни еке агалкьунар хьун чпин эрзиман мурад тирди къейдна.

Мугьманри "Лезги газетдин” коллективдиз чеб хушдиз кьабулунай сагърай лагьана. Багъри газетдин кIвалах вилик фин патал алакьдай вири жуьредин куьмекар гуз чебни гьазур тирди къейд авуна. Иллаки газетдин сайтдин кIвалах алай аямдин технологиядин шартIарив кьадайвал туькIуьрун патал куьмекар гун хиве кьуна. ГьакIни мугьманри газетдин коллективдиз алай йисан мартдин вацра Дербент шегьерда Лезги театрдин дараматда кьиле тухудай Яран сувариз талукь мярекатдиз атун теклифна.

Муса Агьмедов

.

Лезги Газет

.

Мумкин я ваз килигиз кIан хьун:

Машгьур муаллимдихъ галаз акун

Жабар Аскеров: “Спорт зун патал уьмуьр я…”

СтIал Сулейман чилин гзаф агалкьунар авай лезги чIалан муаллимдихъ галаз рахун

Дербент - пуд диндин шегьер

“Настоящее Время” газетди цIийи фондуниз рак ачухзава

Къейдер (0)