Лезгияр сад ийизвай сувар
ЛММФДАдин векилар «Шарвили» эпосдин суварик уртах хьана
Хел: 
1-лагьай августдиз лезги эпос «Шарвилидиз» талукь тир 16-лагьай гьар йисан сувар кьиле фена. Идалай вилик хьиз, ам Кьегьалдин хайи хуьре – Ахцегьа – хьана.
«Халкьди Шарвилидин акуник чпин фикирарни хиялар кутуна, гьикI дуьнья хъсандаказ туькIуьр хьана кIанзавайди ятIа. Вичин хиял кьилиз акъуддайвал Шарвилидиз чIехи къуват ава, адаз са куьнихъайни, садахъайни кичIезвач, ам викегь я, адаз пара акьул ава.
Адаз кIвалахзавай инсанар, лежберар лап кIан я, гьабур патал ада женг чIугвазва. Ада вич ваъ, вири халкь, хайи чил хуьзва», - лугьудай Дагъустандин халкьдин шаир Байрам Салимова.
РикIел хкин, Байрам Салимова тIвар-ван авай шаир, кхьирхъан Забит Ризванов галаз алатай вишйисан 50-й йисариз кIватIайди я эпос гьам исятда авай къайдада, эдебиятдин патахъай ам иерни хъувурди я.
А вахтуна шаирар КцIар райондин СтIур хуьруьз фенай, КичIенсуван кIиник квай, гьана абуруз 83 йис хьанвай Алисман бубади ахъайнай Шарвили лугьудай кьегьалдикай кьисаяр. Ахпа абуру пара маса хуьрерайни кьисаяр кIватIна.
Сад лагьай сеферда эпос кьилдин ктаб хьиз лезги чIалал Махачкъалада 1999-й йисуз акъатнай, ахпа 2008-й йисуз урус чIалал, Ризван Ризванованни Агьед Агъаеван къуватралди.
Дербен шегьердин официал сайтди лугьузвайвал, «Шарвили» суварин мярекатар рехъ райондиз гьахьзавай мукьалай эгечIна. Анал чIехи мугьманар – Дагъустандин кьилин кьибле патан округда векил Мусафенди Велимурадов, Дагъустандин Халкьдин маджлисдин депутат Назим Апаев, Дербендин кьил Имам Яралиевни мсб. – кьуьлералдини лайзаралди кьабулна.
Пакамлай эгечIна Ахцегь хуьр иер майданрай, халкьдин манийрай, кьуьлерай ацIанвай. Ина лезги тIуьнарни, гьар жуьре устIарри авур затIар аквадай.
Спортдал рикI алай виридаз пара акъажунар кьиле фена. Къейдна кIан я хьи, и йисуз суварик са шумуд тIвар-ван авай лезги спортсмен уртах тир, гьабурук кваз Гьабиб Аллахвердиев, Радик Исаев, Альберт Селимов, Джабар Аскеров, Эльдар Гьасанов.
Советрин Союздин игит Валентин Эмирован тIвар алай паркуна чIехи концерт кьиле фена, гьанал атай чIехи мугьманрини, гьакIани гьабур кьабулай Ахцегь райондин кьил Осман Абдулкеримова чпин гафар лагьана.
Ахпа, гьар йисуз хьиз, лезги чIал, илим, меденият, спорт хкажун патал кIвалах авур инсанриз «Шарвили» премия гана, и йисуз адан кьадар 100 агъзур рубль тир. И йисуз премия къачурбурук Лезги автономиядин Президент Ариф Керимовни акатна.
И йисуз суварик ЛММФДАдин чIехи кIеретI квай, Автономиядин Дагъустанда векил Магьамед Алиев кьиле аваз. Суварик Ахцегь, Докъузпара, Рутул чилера Автономиядин векил, Ахцегь чилин жегьилрин парламентдин кьил Зейнидин Абилов, тIвар-ван авай гьукуматдинни жемятдин кархъан, Автономиядин активист Рамазан Мамедов, Ярославлдин вилаятдин лезгийрин автономиядин кьил Васиф Гьасанов квай.
«Зун лап шад тир лезги суварин руьгьдик акатиз, Лезгистандин гьар патарай кIватI хьайи лезгияр акваз. Сувар лап кьакьан дережада кьиле фена. И шад мярекатрихъ галаз санал Хрюг хуьре спортдин майданни туькIуьрна, гьакIани Ахцегьа тарихдин муьгъ цIийи хъувуна (Джиорсни Дебернарди – муьгъ эцигайбур)», - къейдна Магьамед Алиева.
Гъамуни кьадай кIвалах ам я хьи, и йисуз суварик лап тIимил квай Республикадин дережадин идарайра кIвалахзавай лезгияр. Я Анатолий Карибов, я Рамазан Джафаров, я Малик Баглиев, я мсб. авачир.
ЛММФДАдин корреспондентрин кIватIал
Сулейман Джафаров
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Машгьур муаллимдихъ галаз акун
Къейд эцигун