Лезги медениятдин чан
Москвада садавни гекъигиз тежер Седагет Керимовадин яратмишунрин няни хьана
Хел: 
25-лагьай ноябрдиз Москвадин халкьарин кIвале парабурун фадлай вил хьанвай мярекат кьиле фена - 11 йис алатайла кьулухъ тIвар-ван авай лезги медениятдин кархъан Седагет Керимовадин яратмишунрин няни хьана, гьадахъ галаз Лезги манидинни кьуьлуьн "Сувар" ансамблдин экъечIунни хьана.
Мярекат кьилиз акъудайбур тир Лезги миллетдинни медениятдин федерациядин дережадин автономия, Урусатдин Президентдив галай Дагъустандин гьамишан векилат, Азербайджан миллетдинни медениятдин федерациядин дережадин автономия.
Седагет Керимова язва "Самур" газетдин кьилин редактор, Лезги манидинни кьуьлуьн "Сувар" ансамблдин кьил. Адан талант пара патарай ацIайди я - ам тIвар-ван авай кхьирхъан, шаир, макьамрин кхьирхъан, жемятдин кархъан язва.
Мярекатдик виликай тIвар кьур организацийрин чIехибур, Седагет Керимовадин, "Сувардин" яратмишунрал рикI алайбур, Москвадин жегьилар уртах тир. Москвадин халкьарин кIвалин къулай цлара вишелай пара инсанар кIватI хьанай.
Мярекат эгечIдалди атайбурун вилик ЛММФДАдин кьил Ариф Керимова гаф лагьана. Ада къейдна, и мярекатдин къене чавай мад садра Седагет Керимовадин гекъигиз тежер кьван иер яратмишунрин дад къачуз жеда.
Ариф Керимов
"Седагет Керимовади вичин уьмуьр Азербайжанда лезги меденият, лезгийрин тIвар хкажуниз, абур лап вини дережадиз акъудуниз талукьна", - лагьана Керимова.
Мадни ада мубаракна "Сувар" ансамблдин къведай 2016 йисан январдиз жезвай 20 йисан юбилей.
"Чна умуд кутазва, и мярекат Азербайжанда авай чи халкьдин векилрихъ галаз медениятдин патахъай, руьгьдин патахъай алакъаяр кIеви авунин рекье тухузвай мярекатрин кIватIалдикай сад тирди", - тамамарна Керимова.
Ахпа ЛММФДАдин Президентди Азербайжан автономиядин чIехидаз - Мегьрибан Садигъовадиз - гаф гана:
"АзерРосди Лезги автономиядизни кьилди адан Президент Ариф Керимоваз пара сагърай лугьузва бегьер гудай кIвалах тухунал, ихьтин мярекатар, проектар кьилиз акъудунал. Абуру вини дережадин руьгьдин девлетар хкажзава, халкьарин арада алакъаяр кIеви ийизва".
Мегьрибан Садигъова
Урусатдин Президентдив галай Дагъустандин гьамишан векилатдин патай Дженнет Шамасова рахана:
"Лезги халкьди вичиз ихьтин руш аваз дамахзава. Гьадахъ галаз санал вири дагъустанвийри куьн Дагъустандин дамах яз кьазва, Азербайжанди - вичин дамах яз, Урусатди - вичин. Куьн хьтин инсанар вири дуьньядин дамах я".
Мярекатдин официал кьатI куьтягь хьайила, кIватI хьанвайбуру капар ягъиз, сценадал Седагет Керимова экъечIна.
Седагет Керимова
Нянидин къене ада лезги ,азербайжан, урус чIаларал са шумуд сеферда вичин шиирар кIелна, атанвайбурун виридан руьгь хкажна.СА УЬМУЬР ВУЧ Я КЬВАН
Са уьмуьр тIимил я, са рикIин къастар
КIандайвал хуьз, кьилиз акъудун патал.
Са уьмуьр тIимил я, жува кутур багь,
Бегьерда гьатайла агудун патал.
Са уьмуьр тIимил я, и дуьньяд крар,
Акьулдив, камалдив фагьумун патал.
Са уьмуьр бес жедач, гьахъни гьахълувал
КьатIана, дуьздаказ гьукумун патал.
Са уьмуьр куьруь я, са гатун йиф кьван,
Гьиссера ял туна, чир жеч фейи пад.
Жегьилвал фад атIай яру некъи я,
ПIузаррал амукьда адан верцIи дад.
Са уьмуьр вуч я кьван, аватIа эгер,
Ви хъуьтуьл гьиссериз ийидайд авхар.
Ашкъидкай галатайд хьана лагьайтIа,
ЧIалахъ жез тахьурай, махар я, махар.
Са уьмуьр мад кIандай, вил ацIудайвал,
Яраб вуч аматIа вилериз ахквар?
Секинвал ганач хьи, кат-галтугри заз,
Са уьмуьр вуч я кьван? Са вилин ахвар…
Сад лагьай мани "Сувар" ансамблдин пуд векилди - Рашад Ибрагьимов, Джавагьир Абдулова, Джамиля Залова - санал лагьана. И мани "Дагъвияр" тIвар алади тир, гьадахъ галаз санал экрандай видеони къалурзавай.
Джавахир Абдулова
Ахпа сад садан гуьгъуьнай "Самур" (Рашад Ибрагьимов), "Чан дидедин" (Джавагьир Абдулова), "Дагълар" (Джамиля Залова), "Жедайди туш" (Рашад Ибрагьимов), "Къарагъ дуьнья", "Баде" (Джавагьир Абдулова) манияр фена.
Мярекатдал лагьай эхиримжи манийрикай сад тир тIвар-ван авай, парабурун рикI алай "Шамилан дагъ", лап кIеви, иер ван авай Рашад Ибрагьимова лагьай.
Рашад Ибрагимов
Нянидин къене Седагет Керимовади атанвайбурун пара суалриз жавабар гана, лап чимидаказ рахана уьмуьрдикай, хизандикай, лезги медениятдикай.
Мярекат куьтягь жедалди са тIимил вахт амаз ЛММФДАдин Президент Ариф Керимова Седагет Керимовадизни кьилди "Сувар" ансамблдиз грамотаяр гана, гьабурун чи медениятдик, эдебиятдик, чIал хуьнуьк кутур кIвалах къейдзавай.
Джамиля Залова
Няни куьтягь хьана караокедал - атайбуру "Сувардин" векилрихъ галаз санал лагьана вирибуруз хъсан чизвай, рикI алай "Лезгинкадал илига" мани.
Алатай яратмишунрин няни Моквадин лезгийрин джемятдиз вири физвай йисан мярекатрикай виридалайни пара метлеб авайди тир, ада мад садра къалурна: чи халкь пайнаватIани, адан руьгь, меденият сад я.
ЛММФДА
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Дербент-2000: цивилизацийрин рекьерин хев
Къейд эцигун