Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Эбеди яз рикIера амукьда

И мукьвара Махачкъалада, Расул Гьамзатован проспектда авай 18-нумрадин кIвалерин цлал, Ватандин ЧIехи дяведин иштиракчи, Россиядин Федерациядин илимрин лайихлу деятель, Даггосуниверситетдин профессор Михаил (Малла) Вагьабован мемориальный кьул ачухуниз талукьарнавай митинг кьиле фена. Ана Дагъустандин Гьукуматдин Председателдин Сад лагьай заместитель Анатолий Къарибова, Махачкъаладин администрациядин кьилин заместитель Камил Изиева, ДГУ-дин илимдин кIвалахдин ва инновацийрин рекьяй проректор Назир Ашурбегова, ДГУ-дин философиядин ва психологиядин факультетдин декан Мухтар Яхьяева, М.Вагьабован ученикри, багърийри, кIвалахдин рекьяй юлдашри иштиракна.

РикIел хкин: Михаил Вагьабов, 90 йисан яшда аваз, 2013-йисан 21-февралдиз рагьметдиз фенай.

Муаллимдин ва дяведин иштиракчидин экуь къамат рикIел хуьнин лишан яз Махачкъалада ам яшамиш хьайи кIвалерин цлал мемориальный кьул алкIурунин Указдал РД-дин Кьили 2015-йисан 21-июлдиз къул чIугунай.

Митинг ДГУ-дин проректор Назир Ашурбегова ачухна ва кьилени тухвана. Ада зурба алим ва общественный деятель, Ватандин ЧIехи дяведин иштиракчи Михаил Вагьабован уьмуьрдин ва зегьметдин рехъ рикIел хкана.

-1946-йисуз ам СтIал Сулейманан тIварунихъ галай Дагъустандин государстводин педагогикадин институтдин тарихдинни филологиядин факультетдик экечIна. Сад лагьай курс агалкьунралди акьалтIарайла, Дагъларин уьлкведа юриствилин кадрияр кьит хьун себеб яз, ам республикадин Гьукуматдин къарардалди Азербайжандин госуниверситетдин юридический факультетдиз кIелиз ракъурна. 1952-йисуз чи ватандашди вуз агалкьунралди акьалтIарна. Дагъустандиз хтайла, ада госаппаратда жуьреба-жуьре къуллугърал, 1963-йисалай, саки зур асирдилай гзаф вахтунда ДГУ-да кIвалахна, — къейдна проректорди. Н.Ашурбегова Михаил Вагьабов уьлкведин ва республикадин машгьур исламоведрикай сад тирдини алава хъувуна. ИкI, ада исламоведенидин илимдик еке пай кутурди, идахъ галаз сад хьиз, ам вишелай виниз илимдин кIвалахрин, гьа гьисабдай яз религиоведенидин ва исламоведенидин месэлайрай монографийрин, гьакIни Ватандин ЧIехи дяведин тарихдикай макъалайрин автор тирдални фикир желбна.

— 2003-йисуз "Ислам ва алай аям” тIвар алаз чапдай акъатай кIвалахдай Михаил Вагьабоваз Дагъустан Республикадин Государстводин премия гана. ДГУ-дин Учёный советдин къарардалди профессор Вагьабов "Кеферпатан Кавказдин исламдин ахтармишунар” тIвар алай центрадин регьбервиле тайинарзава. Чи ватандашдин теклифдалди ДГУ-дин патав религиоведенидай, философиядин антропологиядай, философиядай докторвилин диссертацияр хуьдай Совет ачухзава. Ада исламоведенидай, ВАК-дин тIвар-ван авай журналрин сиягьдик акатай, Россияда сад лагьайди тир журнал ачухна,-давамарна ада.

Митингдал рахай Анатолий Къарибова Гъалибвилин суварин вилик квай йикъара чи республикадин общественный деятель, машгьур алим ва Ватандин ЧIехи дяведин иштиракчи Михаил Вагьабоваз са тIимил йикъарилай ЧIехи Гъалибвилин ирссагьибрин парад фидай куьчеда авай кIвалерин цлал мемориальный кьул ачухун лишанлу вакъиа тирди къейдна. Ада хабар гайивал, Михаил Вагьабован хтулрини, гъиле чIехи бубадин суьрет аваз, и парадда иштиракда.

ДГУ-дин декан Мухтар Яхьяева, 18 йисан яшара аваз М.Вагьабоваз Яру Армиядин жергейриз эвер гайиди рикIел хкана. Ватандин ЧIехи дяведин женгера, гьа гьисабдай яз 1942-1943-йисара Сталинграддин женгерани, активдаказ иштиракайди, гвардиядин штурмовой авиациядин полкуник кваз чи ватандаш Украинадин 1-фронтдик кваз дяведа хьайиди, ина адал залан хер хьайиди, госпиталдай ахъайнамазди, ам гьа вич авай полкуниз хъфин хъувурди къейдна. Дяведин йисара къалурай кьегьалвилерихъ галаз сад хьиз, адалай илимдин рекьени еке агалкьунар къазанмишиз алакьайди, гьамиша кIвенкIве хьайиди алава хъувуна.

— ДГУ-да профессор Михаил Вагьабовича кьил кутур гьам илимдин, гьамни педагогикадин крар къенин юкъузни вилик тухузва, — къейдна деканди.

Митингдин эхирдай рахай ДГМА-дин философиядин кафедрадин заведующий Тельман Къафарова, ДГУ-дин теориядин ва тарихдин, диндин ва культурадин кафедрадин доцент Садикь Саидова ва масабуруни чи ватандашдикай яргъалди суьгьбетарна. Михаил Вагьабович гзаф медени, гьамиша илимдин ахтармишунрин яцIа хьайи, герек чкайрал кIеви истемишунар ийидай, гьа са вахтунда инсанрив еке гьуьрметдивди эгечIдай кас тирди къейдна.

Профессордин хва Нариман Вагьабова вичин ва вири мукьва-кьилийрин тIварунихъай кIватI хьанвайбуруз, гьакIни Дагъустан Республикадин ва ДГУ-дин кьиле авай ксариз Михаил Вагьабовичан экуь къамат рикIел хуьнай, гьамишалугъ рикIера амукьдайвал авунай чухсагъул малумарна.

Лезги Газет

.

Мумкин я ваз килигиз кIан хьун:

15-апрелдиз Ахцегьа Шагьабас Исмаилован 95 йисан юбилейдиз талукь мярекат к ...

Дяведин игитдин юлдаш Къизил Ашуралиевадив кIвал къачудай куьмекдин свидете ...

Асландин рикI авай дагъви

Кьасумхуьруьнвияр ЧIехи дяведин цIаяра

Дуьньядин культурайрин, динрин тарихдин музей Дербентда ачухна

Къейдер (0)