Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

ЦIийикIа туькIуьр хъийизва

Ахцегь райондин Хуьруьгрин хуьре, инвесторрин куьмекни аваз, 400 касдиз чкаяр жедай Культурадин кIвалин дарамат ремонт авунин кIвалахар давам жезва. Хуьруьгрин хуьруьн советдин заказдалди ийизвай и кIвалахрин пудратчик эцигунрин "Елена” кархана я. Ремонтдин кIвалахрин къимет, сметадин бинедаллаз, 10 миллион манатдиз барабар я.

РикIел хкин, Хуьруьгрин хуьруьн Культурадин кIвалин дарамат, вири халкьдин мел-бигердалди, гьеле 1956-йисуз эцигнай. Алатнавай вири и йисарин вахтунда ремонтдин кIвалахар садрани авунвачир, нетижада ам михьиз куьгьне хьанвай, кIватиз башламишнавай. КIвалин къавар, полар, пенжерар, ракIарар михьиз чуьруьтмиш хьанвай, асул гуж ацалтзавай цларай сварар атанвай, сувагъар кIвахьзавай. Санлай къачурла, хуьруьн культурадин макан, жемятди мярекатар тухузвай ва ял язавай дарамат эхиримжи йисара лап усал гьалдиз атанвай.
 
Хуьруьн агьалийрин тIалабунралди, яшайишдин метлеб авай и объект райондин паркар ва ял ядай чкаяр аваданламишунин программадик кутуна. Амма, бюджетда и кардиз бес кьадар такьатар тахьун себеб яз, ремонтдин кIвалахрал паталай тир финансар желбна.

Ремонтдин кIвалахар 2016-йисан январдиз башламишна. Алай вахтунда дарамат цIийикIа туькIуьр хъувунин ва патав гвай Дагъустандин халкьдин шаир Хуьруьг ТIагьиран тIварунихъ галай парк аваданламишунин кIвалахрин чIехи пай тамамарнава. Пландин бинедаллаз, и кIвалахар алай вацран эхирдалди куьтягьун лазим я.
 
— Санлай къачурла, 720 кв.метрдин майдан авай Культурадин кIвале агъадихъ галай жуьредин кIвалахар тамамарзава: дараматдин къав, рак-дакIар, кIвалерин (тамашачийрин залдин, сегьнедин, дегьлиздин, артистар жедай кIвалин, директордин кабинетдин) чилериз ва къавариз янавай тахтаяр, электропроводка ва чимивал гудай система дегишарзава, гьакIни патарив гвай чкаяр гуьзелдаказ туькIуьрзава, — малумарзава Ахцегь райондин администрациядин капитальный эцигунрин рекьяй отделдин начальник Алихан Ибрагьимова.
Къейдна кIанда хьи, эцигунрин кIвалахар, дугъриданни, планда къалурнавайвал кьиле физва ва, бригададин прораб Сердер Эльдарован гафаралди, вахтунда кьилиз акъуддайвал я.

Лезги Газет

Дайджест

Мумкин я ваз килигиз кIан хьун:

“Лекьерин” кIвал

Игитдин Ватан: чIехи жезва, жегьил жезва!..

Шалбуздагъдин макьамарни везинар

Ахцегьрин райадминистрацияда важиблу месэлаяр гьялна

Ахцегьа МФЦ кардик акатна

Къейдер (0)