Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Дербент райондин Белижда Чlехи Гъалибвилин 70 йисаз талукьарнавай мярекатар кьиле фена


Дербент райондин Белиж поселокда Чlехи Гъалибвилин 70 йисаз талукьарнавай мярекатар кьиле фена Пакаман сятдин цlудаз поселокда Ватан фашизмдин чапхунчийрикай къутармишун патал чанар гайи  Малум тушир аскерриз хкажнавай памятникдал кlватl хьанвай Белиж поселокдин кьил  Рамиз  Гьабибулаева, поселокдин администрациядин кьил Несредин Ахундова ва маса юлдашри кьиле Дербент райондин кьилин везифаяр тамамарзавай  Мегьамед  Желилов авай са десте къаршиламишна. Инал вахтада акъвазнавай аялриз Гъалибвилин сувар тебрикна ва памятникдал цуьквер эцигайдалай гуьгъуьниз вири поселокдин сад лагьай нумрадин школадихъ рекье гьатна.

Школадин гьаятда дамахдив алукlнавай аялар, муаллимар, Ватандин Чlехи дяведин, зегьметдин ветеранар, диде-бубаяр, райондин школайрин директорар алаз Ватандин Чlехи дяведин иштиракчийриз памятник ва рикlел хуьнин Аллея ачухуниз талукьарнавай  мярекат шад гьалара кьиле фена.

Анал рахай М.Желилова Чlехи Гъалибвал пакдиз рикlел хуьзвай ва чпин бубайринни чlехи бубайрин кьегьалвилерал дамахзавай школадин коллективдиз Гъалибвилин 70 йисан юбилей тебрикна ва акьалтзавай несил Гъалибвал патал чпин чанарни гьайиф татай ксариз дериндай гьуьрмет авунин руьгьдаллаз тербияламишун чи пак буржи тирди къейдна.

Ачухай памятникдал М.Жалилова, Рамиз Гьабибулаева, райондин образованидин управленидин начальник Муьгьуьдин Къагьриманова, Дербент, Дагъустандин Огни шегьерринни Дербент  райондин  военный  комиссариатдин  отделдин  начальник Адил Къулиева ва масабуру цуькверин тажар ва кlунчlар эцигна.

Ахпа мярекатдал школада кlелзавай аялри шиирар кlелна, дяведин йисарин манияр лагьана, кьуьлер авуна.

Нумрайрин арайра анал рахай Дербент райондин администрациядин кьилин сад лагьай заместитель Али Хасбулатова, Р.Гьабибулаева, М.Къагьриманова, А.Къулиева ва масабуру мярекатда иштиракзавай Ватандин Чlехи дяведин ветеранар тир Гьамзат Къатмазоваз, Мешеди Алигьасановаз ва кlватl хьанвай виридаз сувар тебрикна.

Мярекатдин эхирдай А.Къулиева школадин директор Имара Заловадив акьалтзавай несилдиз ватанпересвилин тербия гунин рекье военный комиссариатдиз куьмек гунай Дагъустан Республикадин военный комиссариатдин рикlел аламукьдай медаль вахкана.

Атанвай мугьманрин дестеди  поселокдин Абас Исрафилован тlварунихъ галай гимназияда кьиле фейи Чlехи Гъалибвилин 70 йисаз талукьарнавай шад линейкада иштиракна.

Линейка гимназиядин директор Нариман Шихмегьамедова ачухна.

Мугьманри кlватl хьанвайбуруз Гъалибвилин сувар мубаракна. Ватандин Чlехи дяведа телеф хьайибурун руьгьериз гьуьрмет яз, са декьикьада кисна акъвазна. Гимназиядин гьаятда авай А.Исрафилован гуьмбетдал цуькверин тажар эцигна.

Анал гимназиядин муаллимрини аялри гьазурнавай маналу программа къалурна. Жегьил спортсменри пайдахарни гваз велопробегда иштиракна.

Къагьриман Ибрагьимов

.

Лезги Газет

.

Мумкин я ваз килигиз кIан хьун:

Машгьур муаллимдихъ галаз акун

Дербент - пуд диндин шегьер

Яран сувар Кьиблепатан Дагъустанда

“Самурда зул” сувар

Яран сувар Кьиблепатан Дагъустанда

Къейдер (0)