Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Дагъустанда СКФО-дин субъектрин кьилер гуьруьшмиш хьана


12-январдиз Дагъустан Республикада Кеферпатан Кавказдин Федеральный округдик квай регионрин руководителрин гуьруьш кьиле фена. Ам СКФО-да Россиядин Федерациядин Президентдин патай тамам ихтиярар ганвай Векил Сергей Меликован регьбервилик кваз тухвана.

РД-дин Кьилин ва Гьукуматдин Администрациядин пресс-къуллугъдин ва информациядин управлениди хабар гузвайвал, мярекатдин иштиракчияр Дагъустандин гзаф миллетрин векилрикай ибарат халкьдин тIварунихъай тебрик авур Дагъустандин Кьили чи региондиз атунин теклиф кьабулай мугьманриз рикIин сидкьидай сагърай лагьана. Рамазан Абдулатипован гафаралди, ихьтин гуьруьшри субъектрин кьилериз неинки садаз-сад мадни хъсандиз чир жедай, гьакIни алай макъамда виридалайни хци месэлаяр веревирддай, абур гьялунин умуми рекьер, саналди тир гьерекатрин вариантар тайинардай мумкинвал гузва.

"Чун официальный совещанийрал мукьвал-мукьвал гуьруьшмиш жезва, амма и дуьшуьшда чна алакъа хуьнин маса къайда хкягъун кьетIна. За гьисабзавайвал, и гуьруьш чун патал менфятлуди жеда. Виридалайни кьилинди лагьайтIа, адакай чи регионрин халкьар патал, чи умуми кIвалах патал менфят хкатда. Россиядин патарив жуьреба-жуьре къуватри гьалар къизгъинарзавай, санкцияр кардик кутазвай девирда и кар иллаки менфятлу я. За гьисабзавайвал, къе чахъ чи регьбердин патарив жуван тупламишвал къалурдай, властдихъ кар бажармишдай къуват авайди къалурдай мумкинвал ава.

Зун СКФО-дин хейлин республикайра хьана. Гьар са руководителдихъ къачуз жедай тайин тежриба ава. Чи гуьруьшда Сергей Алимовича иштирак авун - им чна веревирд авун пландик кутунвай са жерге месэлаяр Гьамишалугъ векилханади властдин федеральный органрихъ галаз тухузвай кIвалахдани фикирда кьадайвилин заминвилерикай сад я. Идалайни гъейри, чи арада авай алакъайрин дережа бес кьадар винизди туширди, чахъ саналди тир экономический, культурадин проектар тIимил авайди лап ашкара я. Фикирар ачухдаказ лугьуз жезвай шартIара хейлин месэлаяр веревирд ийиз жеда. Зун инанмиш тирвал, ида чакай гьар садаз, чи регионриз ва чи Россиядиз еке менфят гуда”, - къейдна Рамазан Абдулатипова.

Вичин нубатдай яз Сергей Меликова и гуьруьшдихъ СКФО-да кIватI хьанвай месэлаяр веревирд авун патал еке метлеб авайди тестикьар хъувуна: "И мукьвара кьиле фейи вакъиаяр фикирда кьуртIа, чи къенин рахунрихъ хатасузвал таъминарунин барадай Кавказ патал важиблу метлеб ава. Гьакъикъатдани, географиядин жигьетдай са кьадар къакъатнаватIани, хейлин месэлаяр Кеферпатан Кавказдиз талукьбур я. Абур исламдив, маса динрив эгечIзавай тегьерриз, футфачивилин гьерекатар кьиле тухуз алахъуниз талукь я. Ибур хейлин кьадар мусурманар яшамиш жезвай Кавказ патал лап важиблу месэлаяр я. Чна  Россиядин гьар са гражданиндин инанмишвилериз, ам диндив эгечIзавай тегьердиз, милли, диндихъ галаз алакъалу гьиссериз гьуьрмет авун лазим я”.

Къецепатан уьлквейрин курортриз фин россиявийриз виликандалай са кьадар четин, багьаз акъваззавай асантди тушир экономический шартIара С.Меликова  регионда туризм вилик тухун патал шартIар яратмишун чарасуз тирди къейдна. "Чи гражданрин ва Кеферпатан Кавказдиз къвезвай мугьманрин хатасузвал таъминарунин барадай чун сад хьунилай гъейри, къе маса рехъ авач”.

Идалайни гъейри, Гьамишалугъ векилди СКФО-дин субъектрихъ хьиз къенепатан сих садвал уьлкведа маса гьич са региондани авачирди аннамишун лазим тирди къейдна. Идахъ галаз алакъалу яз, са регион вилик фин, маса региондиз акси акъвазун, са программайри маса программайривай пулдин такьатар къакъудун лазим туш.

С.Меликова къейдна: "СКФО-дин вири регионри уьлкведин Президентди вилик эцигнавай, вирибур патал сад тир везифа - Кеферпатан Кавказ пландин бинедаллаз, бегьерлудаказ вилик тухунин везифа кьилиз акъудзава”. Гьамишалугъ векилдин гьисабралди, Дагъустанда хейлин крар кьилиз акъудзава. Амма идахъ галаз сад хьиз, хейлин четинвилерни ацалтзава. "Вилик акъвазнавай месэлаяр гьялун патал чун тупламиш хьун герек я. Месэлайрин сан екеди я, гьакI хьайила хъсандиз кIвалахни авуна кIанда”, - малумарна С.Меликова. Ада вири дагъустанвийриз ЦIийи йисни мубаракна, абурухъ сагъламвал, хайи ерийрин хушбахтвал патал кIвалахда агалкьунар хьана кIанзавайди къалурна.

Кеферпатан Осетия - Алания Республикадин кьил Таймураз Мамсурова Дагъустандин векилрихъ галаз санал кIвалахунин рекьяй хъсан тежриба кIватIнавайди къейдна: "Чи арада дуствилин хейлин гуьруьшар кьиле фена, куь республикадиз атай гьар сеферда чи гуьгьуьлар ачух жезва. Дагъустандин Кьил Рамазан Абдулатиповахъ итижлу хейлин фикирар, планар ава”.

Ставропольский крайдин губернатор Владимир Владимирова къейд авурвал, "ихьтин майданар чарасуз герек я. Чахъ законар акъудунин барадай, хатасузвал таъминарунин, культурадин алакъаяр хуьнин, экономика вилик тухунин месэлайрай веревирддай саналди тир хейлин темаяр ава”. Къунши региондин кьили СКФО-дин вири субъектриз Ватандин ЧIехи дяведа Гъалибвилин 70 йис тамам хьуниз талукьарнавай серенжемра иштирак авун теклифна (а серенжемрик региондин республикайрин коллективар ветеранрин вилик саналди экъечIунар, выставкаяр, фестивалар, конкурсар тухун ва мсб акатзава).

Р.Абдулатипова и фикирдин тереф хвена ва къейдна: "Чна чи республикада Гъалибвилин ирссагьибрин Парад, гьакIни гьар йисуз "Россиядин кьилел дурнаяр” лишандик кваз конкурс кьиле тухузва. Чна санай-саниз делегацияр финин къайда кардик кутун герек я”.

Вичин нубатдай яз Карачаево-Черкесия Республикадин кьил Рашид Темрезова СКФО-да РФ-дин Президентдин патай тамам ихтиярар ганвай Векил Сергей Меликован регьбервилик кваз ЧIехи Гъалибвилиз талукь саналди тир серенжемрин асул терефар веревирддайдахъ инанмишвал къалурна.

Кабардино-Балкариядин кьил Юрий Кокова, кьилди къачуртIа, малумарна: "Аэропортунай Дагъустандин Гьукуматдин дараматрин патав кьван къведай рекье чна жуьреба-жуьре хейлин проектар, месэлаяр веревирдна. Хейлин рекьерай чи фикирар сад я. Зун инанмиш тирвал, и гуьруьшди уьлкведин руководстводини чи вилик эцигзавай везифаяр кьилиз акъудунин барадай чи саналди тир кIвалахдиз алава къуват гуда”.

Ингушетия Республикадин кьил Юнус-Бек Евкурова къейд авурвал, сада-садаз фикирар лугьун ва саналди тир гьерекатар алакъалу авун къе лап важиблу я. "СКФО-да чахъ парламентрин ассоциация ава. Ина чIехи нормативно-правовой актар кьабулзава, абур Госдумадивни агакьарзава. За гьа ихьтин ассоциация СКФО-дин субъектрин гьукуматрин дережада авазни тешкилун теклифзава. За чи ихьтин гуьруьшар кьиле фидай чIавуз яшайишдин ва инвестиционный важиблу объектар ачухунни лазим яз гьисабзава”, - малумарна къунши республикадин руководителди.

РД-дин Халкьдин Собранидин Председатель Хизри Шихсаидова и жуьредин гуьруьшар кьиле тухун - им СКФО-дин субъектрин кьилери чпин арада алакъаяр хуьнин цIийи жуьре тирди къейдна: "И саягъда алакъаяр хуьни чи дуствал мягькемарзава, саналди тир чалишмишвилералди чавай вири жуьрейрин манийвилер алудиз жеда. Чавай ихьтин чими, дуствилин гьалара кIватI жез алакьунни Россия гужлу тирдан, чи округ мягькемди тирдан гьакъиндай, чавай вилик акъваззавай вири месэлаяр гьялиз жедайдан гьакъиндай шагьидвалзава”.

Рамазан Абдулатипова эхиримжи 10-15 йисуз сифте яз алатай йис Дагъустанди террориствилин гьерекатар авачиз куьчуьрмишайди къейдна: "Им МВД-дин, ФСБ-дин, прокуратурадин, силисдин комитетдин саналди тир кIвалахдин нетижа я. Абуру виликдайни игитвилелди кIвалахиз хьайиди я. Чавай терроризм ва экстремизм кьабул тавунин барадай и органрин тереф халкьди гегьеншдаказ хуьнин гьалар таъминариз алакьна. Им чун патал важиблу гъалибвал я. Сентябрдиз терроризмдиз акси Милли комитетдихъ галаз санал чна терроризмдиз акси комиссиядин заседание кьиле тухвана. Идани и рекьяй тешкилнавай кIвалахдиз цIийи къуват гана”.


.

Лезги Газет

.

Мумкин я ваз килигиз кIан хьун:

Дуьньядин культурайрин, динрин тарихдин музей Дербентда ачухна

Гьикьван гзаф чIалар чир хьайитIа, гьакьван чун Гафунин деринра гьахьзава.. ...

Вирироссиядин гражданар кьабулдай югъ кьиле фена Дагъустанвийрин къайгъуда

Сергьятар гегьеншарзава

РФ-дин Общественный палатада - лезги чIал Милли чIалар хуьн

Къейдер (0)