Федеральная лезгинская
национально-культурная автономия

Яран сувар Кьиблепатан Дагъустанда

Дербент 20-мартдиз Дербент шегьерда, Гьукуматдин СтIал Сулейманан тlварунихъ галай Лезги муздрамтеатрдин чlехи залда, шегьердин администрациядин культурадин управлениди тешкилна, Яран суварин концерт кьиле тухвана.

Концертдиз килигиз Дербент шегьердин кьил Имам Яралиев, шегьердин администрациядин кьилин заместитель С.Азимов, администрациядин къуллугъчияр ва шегьерэгьлияр атанвай.

- Яран сувар, - лагьана шегьердин культурадин управленидин начальникдин заместитель А.Арухова, - къадим заманайрилай башламишна къенин йикъалди чи халкьди лап шад гьалара къейдзавай ва рикl алай сувар я. Къенин мярекат тешкиллувилелди тухунин мураддалди чна виликамаз гьазурвилер акунвай. Зун агъунва, къе чна гьазурнавай концертдин программадилай вири рази яз амукьда.

Концерт Дагъустандин искусствойрин лайихлу деятель
Насир Шагьмурадова регьбервал гузвай халкьдин алатрин оркестрди тамамарай шад макьамдалди ачухна. Гурлу капариз чи машгьур ашукь Рустам Къарибова, жаван манидар Ровшан Жигерова, Абудин Шерифова, Мая Алимурадовади, Шагьмурадовайрин дуэтди ва масабуру лагьай манияр, Дербент шегьердин "Дербент” ва Белиж поселокдин аялрин "Кавха” ансамблийри авур кьуьлер лайихлу хьана.

Санлай къачурла, концертдин программа тамашачийри хушдиз кьабулна. 20-мартдизни Дербентда Яран сувар гегьеншдиз къейдна. Йикъан сятдин цlикьведаз театрдин вилик квай майдандал шегьерэгьлияр ва мугьманар кlватl хьанвай. Кьуд патахъай милли авазрин ван къвезвай.

Кьиблепатан Дагъустандин районрай ва Дагъустандин Огни шегьердай атанвай яратмишунрин коллективри чпин майданар ачухнавай. Суварин мярекатра Москвада кардик квай ФЛНКА-дин президент
Ариф Керимова, ФЛНКА-дин Советдин член, Москвада эцигунардай компаниядин генеральный директор Альберт Шамсудинова, Ярославль региондин ФЛНКА-дин руководитель Васиф Гьасанова иштиракна.

Зун и мярекатдин режиссер Дагъустандин халкьдин артист
Мирзебег Къадировичахъ галаз майданриз килигзава. Адан гафарай малум хьайивал, театрдин вилик и мярекат тешкилиз Москвада кардик квай ФЛНКА-ди кьил кутуна. Милли сувар гурлу авун патал иниз чпин майданар гваз чи вири районрай делегацияр атана кlанзавайди тир.

Амма чаз акурвал, хъсан гьазурвал акуна, мярекатдиз атанвайбурун арада анжах Кьурагь райондин ва Дагъустандин Огни шегьердин делегацияр авай. Кьурагь райондин майдандал гзаф инсанар кlватl хьанвай. Кlватl жедачни бес, инал чlагъандин, кларнетдин, далдамдин ва Кьурагь райондин машгьур манидарри тамамарзавай авазар ва манияр, райондин культурадин управленидин начальник
Масан Асланов кьиле аваз милли парталар алаз кьуьлерзавайбурун десте, халкьдин кеспийрал машгъулбур: квар югъурзавайди, чхрадал гъалар ийизвайди, чи милли тlуьнрай ацlанвай чlехи стол.

Столдал лагьайтlа, тlач, хъчадин пичlекар ва хъчадин ирид афар, алугай, иситlа, шуьреяр, емишар, шараб ва мад маса шейэр алай. Виридахъ галаз чнани абурукай са бязибур дадмишна. Инал чал гьалтай чи таниш Къудрат Мегьамедова шегьерэгьлийриз ихьтин сувар тешкилнавайбуруз сагърай лагьана ва йисалай-суз Яран сувар тухунин дережа хкаж жезвайди ва Кьурагь райондин векилри майдандал гъанвай адетрин тlуьнри, абуру тамамарай халкьдин манийри, авазри ва кьуьлери суварал абур гъайиди къейдна.

Дагъустандин Огни шегьердин майдандихъай зуьрнейрин ван акъатнамазди, вирида анихъди еримишна. Анал Дагъустандин Огнида кардик квай республикадин циркинин искусствойрин школадин коллективди пагьливанрин, акробатрин, гьавадин гимнастрин, гьалкъаяр (обручар) гвайбурун вини дережада гьазурнавай гзаф нумрайрикай ибарат хъсан программа къалурна. Тамашачийри гурлу капаралди кьабулай гьар са нумра им, гьелбетда, а школадин директор К.Къурбанован ва коллективдин агалкьун я.

Суварик Ахцегь райондин ашукьрин "Шарвили” ансамблди, манидар
Таира Муспаховади, Докъузпара райондин кьуьлердай "Шалбуз дагъ” ансамблди, манидар Заира Чигниевади, ашукь Шемшира, Агъул райондай Амина Алиевади ва Гьуьриди гьакlни масабуру чlехи программа къалурна.

Сятдин пудаз суварин шадвилер театрдин чlехи залда давам хъхьана. Зал сиве-сивди ацlанвай. Ацукьдай чкаяр амачирбур фидай арайра кlвачел акъвазнавай. Мярекат театрдин фойедай залдиз зуьрнейрин аваздалди, гъилера хунчаяр авай лезги таватар ва квасаяр атуналди, абур тамашачийри гурлу капаралди къаршиламишуналди башламишна.

Анал рахай ФЛНКА-дин президент Ариф Керимова шегьерэгьлийриз ва мугьманриз Яран сувар рикIин сидкьидай тебрикна ва Дагъустандин халкьариз мягькем сагъламвал, кIвалахда агалкьунар, хизанра хушбахтвал ва ислягьвал хьун алхишна.

Театрдин коллективдин ва районрай атанвай искусстводин векилрин иштираквал аваз гьазурнавай концерт-тамаша "Яран сувар” са нефесдаллаз кьиле фена. Мярекатда квасайрин ролар тамамарай
Саидин Думаева ва Валера Сулейманова тамашачийрин гуьгьуьлар гзаф цицlи авуна.

Суварин концертда артистар тир
Агъахан Агъаханова, Фаризат Зейналовади, Эльмира Къарахановади, Казбек Думаева, Зарифа Къухмазовади, Даниял Къазиева, Мая Мурадхановади, Жасмина Гьабибулаевади ва Эминат Вагьабовади манияр лагьана ва тамашайрай чIукар къалурна, Бакудин М.Магамаеван тlварунихъ галай операдин театрдин солист, чи ватанэгьли Ришад Ибрагьимова, Заира Чигниевади, "АЯ КАМ” ансанмблди, Омар Меликова, Абдулла Мирзекеримова ва масабуру манияр тамамарна.

Мярекат устадвилелди Дагъустан Республикадин халкьдин, РФ-дин лайихлу артист
Абдуллагь Гьабибова кьиле тухвана.

* * * Яран сувар тешкиллу гьалара Гатфар-ханума иштиракуналди, спортдин акъажунар кьиле тухуналди Ахцегьани кьиле фена.

Яран сувар - Москвада 22-мартдиз Лужникра, "Россия” тIвар алай ГЦКЗ-да гурлудаказ Яран сувар кьиле тухвана. И мярекат РФ-дин Президентдин патав гвай республикайрин Гьамишалугъ векилханайрин иштираквал аваз Москва шегьердин регионри санал кIвалахунин, милли политикадин ва динрин организацийрихъ галаз алакъаяр хуьнин рекьяй Департаментдин теклифдалди тешкилнавайди тир.

Уьлкведин меркезда ирид лагьай сеферда кьиле тухвай и суварин мярекатда Навруз-байрам къейдзавай халкьарин векилри - татарри, узбекри, башкирри, таджикри, къиргъизри, къазахри, туьрквери, курдри, азербайжанвийри, дагъустанвийри иштиракна. Суварин мугьманрин арада чи республикадин хейлин векилар авай.

РД-дин Гьамишалугъ векилханадин патай мярекатда РД-дин Постпреддин заместитель Гьажимурат Кажлаева иштиракна. Россиядин эстрададин гъетерин иштираквал аваз гайи чIехи концертди и мярекат мадни жанлуди авуна.

КIватI хьанвайбур Лев Лещенкоди, Хасан Гьайдарова, Нохид Зейналпура, Сад лагьай каналда кардик квай "Голос” проектдин иштиракчи Фарид Аскерова, "Заман” дестеди ва масадбуру чпин бажарагъдалди гьейранарна. Суварик Дагъустандин кьуьлердайбурун "Бахтлу аялвал” тIвар алай ансамблди лайихлудаказ векилвална.

Ансамблдин иштиракчийри еке устадвилелди "Кавха” ва "Зи Дагъустан” кьуьлер тамамарна. Суварихъ галаз алакъалу яз махсус ярмаркани ачухнавай. Ина жуьреба-жуьре халкьарин сеняткарвилерин шейэрихъ галаз таниш жедай, милли хуьрекар дадмишдай мумкинвал авай.

Мярекатдикай Гьажимурат Кажлаева ихьтин келимаяр лагьана: "Гатфариз югъни йиф сад жезвай береда къейдзавай и экуь сувариз дуствилин кьилин суварни лугьуз жеда, вучиз лагьайтIа ана жуьреба-жуьре уьлквейрай ва республикайрай тир гзаф миллетрин векилри иштиракзава.

Сувар Москвада гьар йисуз къейд авунал зун шад я”. Мярекат, вири терефрихъай хъсандиз гьазурвал акуна, тешкиллудаказ кьиле тухунай Гь.Кажлаева Москвадин Гьукуматдиз сагърай лагьана.

.

Лезги Газет

Дайджест

Поделиться

Возможно Вам будут интересны:

СтIал Сулейманаз гуьмбет хкажна

Дербент - пуд диндин шегьер

Дербент - 2000. Вири къуватар желб ийин

Яран сувар Кьиблепатан Дагъустанда

“Самурда зул” сувар

Комментарии (0)


Официальный сайт FLNKA.RU © 1999-2021 Все права защищены.

Российская Федерация, г. Москва

Федеральная лезгинская национально-культурная автономия