СтIал Сулейманаз гуьмбет хкажна
Хел: 
18-майдиз Дагъустандин Дербент шегьер суварин гьавада авай. Инсанар цуькверин кIунчIар гваз, лугьуз-хъуьрез С.Сулейманан тIварунихъ галай Гьукуматдин Лезги Драмтеатрдин дарамат галайнихъ физвай. Адан вилик чи халкьдин зурба шаир СтIал Сулейманан гуьмбет ачухаруниз талукьарнавай шад мярекат кьиле физвай.
Гьар йисан 18-майдиз Дагъустанда СтIал Сулейманан поэзиядин сувар кьиле тухун адетдиз элкъвенва. Чара-чара шегьерра, районра, хуьрера халкьди чIехи шаирдиз икрамда, адан шиирар хуралай кIелда. ЦIи шаир дидедиз хьайи юкъуз адан гуьмбет ачухарун вири лезгийрин рикIяй хьана.
Дербент шегьердин регьберар, Магьачкъаладай атанвай мугьманар, шаирар, кхьирагар, журналистар мярекатдиз кIватI хьанвай вишералди инсанри гурлу капаралди кьабулна.
Дербент шегьердин округдин кьил Имам Яралиев Дагъустанда сифте яз «халкьдин шаир» гьуьрметдин тIварцIиз лайихлу хьайи СтIал Сулеймана Дагъустандин эдебиятда къугъвай чIехи ролдикай рахана. Ам четин кьисметдин инсан хьайиди, девирдин зидвилеризни, а чIавуз кьиле фейи гьахъсузвилериз килиг тавуна садрани гьахъ рекьелай элкъуьн тавурди къейдна.
Са береда советрин уьлкведилай цIар яна эхирни вад йисуз Дербентда яшамиш хьайи шаирди вичин сейли эсерар и шегьерда туькIуьрайди рикIел хкана. «Дербентдин 2000-йисан юбилейдиз гьазурвилер кьиле физвай вахтунда СтIал Сулейманаз ина гуьмбет хкажун дуьшуьшдин кар туш», – лагьай И.Яралиева гуьмбетдин скульптор, Дагъустандин халкьдин художник Гьейбат Гьейбатоваз ва архитектор Сергей Агудаеваз разивал къалурна.
Мярекатдал Дербент шегьердин контрольно-счетный палатадин седри Маил Ибрамхелилов, Дагъустандин медениятдин назирдин заместитель Мурад Гьажиев, РД-дин Халкьдин Межлисдин седридин заместитель Сейфуллагь Исакьов, Кхьирагрин КIватIалдин Дербентдин отделдин кьил Кичибег Мусаев, СтIал Сулейманан райондин кьил Нариман Абдулмуталибов, шаирдин хтул Лидия Стальская ва масабурни рахана. Гуьмбетдин яру лент атIана, адан кIвачерик цуьквер эцигайдалай кьулухъ театрдин коллективди гьазурнавай суварин концерт кьиле фена
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Къейд эцигун