Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Госдумадин депутатдихъ галаз жегьилрин гьалтун кьиле фена


26-мартдиз РФ-дин Государстводин Думадин депутат Мамед Абасов Москвадин Миллетрин кIвале уьлкведин меркезда авай дагъустанви жегьилрихъ галаз гьалтун хьана.

И мярекат Дагъустандин жегьилрин ассоциацияди (АМД) тешкилна. Ам ЛММФДА-дин куьмекни галаз кьиле фена. Мярекатда АМД-дин ва 
ЛММФДА-дин Жегьилрин департаментдин цIудралди активистри иштиракна. Гьалтун ахъадаказ хушвилин гьалара кьиле фена. Адан модератор ва спикер АМД-дин вице-президент  Камалдин  Саидов  тир.

Мярекат Дагъустандин жегьилрин Ассоциациядин кIвалах раиж авунилай башламиш хьана. КIватI хьанвайбуруз гьеле уьмуьрдиз бажармишнавай ва алай вахтунда кьилиз акъудзавай проектрихъ галаз таниш жедай мумкинвал хьана. Гьалтун кьиле фидай чIавуз жегьил активистар мугьманвилиз атанвай Госдумадин депутат Мамед Абасован  таржумагьалдихъ галазни танишарна. 

Гьалтунал карчийрин "Кьиблепатан Дагъустан” Ассоциациядин кIвалахдикай гегьенш рахунар кьиле фена. Лагьана кIанда хьи, и къурулуш Мамед Абасова тешкилна, ам адан регьберни я.

Ассоциациядин кIвалахдин асул терефар, адан мурадар вилик акъвазнавай везифаяр гьихьтинбур я? Ассоциациядин иштиракчияр гьихьтин ксар я? Адан къурулуш гьихьтинди я, ам финансламишунин чешмеяр гьихьтинбур я? Республикада ихьтин жуьредин маса тешкилатар авани? Гьалтун кьиле фидай чIавуз депутатдин вилик и ва са жерге маса суалар эцигна.

Мамед Абасова вичин вилик эцигай вири суалриз тамам жавабар гана. Ада гьакIни Ассоциациядин кIвалахдиз рикIивай итиж авунвай АМД-дин векилриз Дербентдиз атун теклифна, ина вичивай организациядин кIвалахдин кьетIенвилер тайин тир делилралди ахъайиз жедайди къейдна.

И Гьалтуниз Махачкъаладай атанвай Дагъустандин жегьил эцигунардайбурун ва архитекторрин Союздин руководитель Иса  Мегьамедова  гайи суалдални акъвазун герек я. Ам Махачкъала шегьерда алай вахтунда эцигунар кьиле тухунин принципар официальнидаказ тестикьарнавай къайдайрихъ галаз кьун тавуниз талукьди тир. 

Мамед Абасова къарагъарнавай месэладин важиблувал къейдна. "И месэла заз лап мукьувай чизвайди я. Чун вири адал гьар юкъуз расалмиш жезва. Зун куь организациядихъ галаз саналди кIвалахиз, квез куьмек гуз, гьакIни тайинарнавай нормайрал, законрал амал тавунин дуьшуьшрай кьил акъудиз гьазур я”, - къейдна депутатди.

Гьалтун кьиле фидай чIавуз Госдумадин депутатди Дагъустан Республикадиз къецепатан уьлквейрай инвестицияр желб авун чарасуз тирдакай лагьана. И барадай ада Дагъустандинни Туьркиядин арада тайин хьанвай алакъаяр чешне яз къалурна. 

Ногъайвийрин общинадин руководитель Желил  Оразбаева  ихьтин кьве терефдин алакъаяр Ногъай райондани кардик кутунин мумкинвилиз талукь месэла кудна. Ада мадни къейд авурвал, Ногъай ва Бабаюрт районра къишлахрал алай майишатриз кьилдин хуьрерин дережа гун пландик кутунва. Адан фикирдалди, и карди регионда гьалар къизгъин хьунал гъида.

Ногъай халкьдин активистдиз жаваб яз, Мамед Абасова и месэла эвелни-эвел экономикадихъ галаз алакъалу тирди къейдна. Чпин диде-бубайрин ери-бинеяр дагълух хуьрерай тир хейлин агьалияр и къишлахрин чилерал дидедиз хьана ва абуру и чкаяр чпин ватан яз гьисабзава.

"Дугъри я, гзаф ишлемишуникди чилин бегьерлувал агъуз аватзава, экологиядин жигьетдай гьалар пис жезва. Экономикадин жигьетдай арадал атанвай шартIарни къулайсузбур яз амукьзава. Эгер и месэлаяр вахтунда гьялнавайди тиртIа, чуьруькрин асул себебарни арадай акъатдай. Чиди гзаф миллетрин векилрикай ибарат республика я. Дегь девиррилай инихъ чи халкьар ана  ислягьвилелди яшамишни жезва”.

Депутатдиз "Гуьрчегвилин милли чешмеяр” проектдин автор, Францияда ИТАР-ТАСС агентстводин фотокорреспондент тир Наталья Ивановадини суал гана. Ам Дагъустан Республикадиз ва адан иллаки яргъаз къакъатнавай дагълух хуьрериз фидай мумкинвал жедани-жедачни, гьадаз талукьди тир. Мамед Абасова проектдин автор рушаз сиягьат тешкилун ва фикирдиз къачунвай проектдин сергьятра аваз гъиле кьунвай кIвалахар кьилиз акъуддай шартIар яратмишун хиве кьуна.

Госдумадин депутатдихъ галаз кьиле фейи гьалтуникай 
ЛММФДА-дин мухбирриз вичин фикирар  АМД-дин вице-президент Камалдин Саидова лагьана. "Гьалтуникай ва депутатдикай вичикай лап хъсан майилвилер амукьна. Завай инанмишвилелди лугьуз жеда хьи, ам чи дуст я. Чна гележегдани адахъ галаз санал кIвалахда. Са жерге серенжемар кьиле тухунин карда куьмекар гунин патахъай гьеле икьрардал атанва”.

Мярекатдикай АМД-дин президент Шамил Садрудинова икI лагьана: "Чи мугьмандин рикIин ахъавили, къуллугъдин дережадилай ва яшарилай аслу тушиз инсанрихъ галаз хуш рафтарвал авуни чун гьейранарна. За фикирзавайвал, гьалтун гзаф итижлуди хьана. Мамед Магьарамовича чи суалриз лап ахъадаказ жавабар гана”.

Мярекатдин эхирдай Мамед Абасован иштираквални аваз са гъвечIи фотосессияни кьиле фена.

.

Лезги Газет

.

Мумкин я ваз килигиз кIан хьун:

Амазма лезгияр Нева вацIал

Дагъустандин намусдин азадвилинни, динрин тешкилатрихъ галаз кIвалах тухунин рекьяй Комитетдин коллегия кьиле фена

Дагъустан цIийи хъувур кас

«Сулейманан вахт къвезва…»

КукIушрин кукIуш

Къейдер (0)