Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Асеф Мегьман рагьметдиз фена

 
23-июндиз чавай мидаим яз лезги халкьдин баркаллу хва, машгьур шаир, композитор, прозаик ва драматург, ДАССР-дин искусствойрин лайихлу деятель, РД-дин халкьдин артист Асеф Мегьман къакъатна.

Асеф Мегьманович Абдуллаев 1930-йисан 18-апрелдиз Азербайжан ССР-дин КцIар райондин ЭчIехуьре муаллимдин хизанда дидедиз хьана. Хуьруьн мектеб акьалтIарайдалай кьулухъ ада кIелунар Дербентдин педагогвилин училищеда давамарна. Кьуд йисни ирид вацра авиациядин кьушунра къуллугъ авуналди, Ватандин вилик вичин хивевай пак буржи намуслувилелди кьилиз акъудна. Училище куьтягьайдалай кьулухъ А.Мегьмана Азербайжандин мектебра муаллимвал авуна. Гуьгъуьнлай хейлин йисара Дагъустандин радиокомитетда лезги музыкадин передачайрин редакторвиле кIвалахна.

Асеф Мегьманан хейлин эсерар халкьдин рикI алай манийриз элкъвена. И карди шаирдиз гьам Азербайжанда, гьамни Дагъустанда еке машгьурвал багъишна. Адан шиирриз кхьенвай манияр Рагьимат Гьажиевади, Дурия Рагьимовади, Суьлгьуьят Гьажиевади, Айдунбег Камилова, Тарлан Мамедова, Роза Магьсумовади, Магьира Шириновади ва хейлин масабуру тамамарна. Гьеле аял чIавалай музыкадал рикI алаз чIехи хьайи Асеф Мегьмана 150-далай артух манияр, оркестрдин кьве сюита теснифна.

Лезги музыка вилик тухунихъ галаз санал, Асеф Мегьмана, бажарагълу шаир яз, лезги литература девлетлу хьуникни лайихлу пай кутуна. Эвел шаирди эсерар анжах азербайжан чIалал теснифзавай ва абур Бакудин газетра чапзавай. Дербентдин педагогвилин училищеда кIелзавай йисара ам лезги чIалал кхьиз гатIунна ва гуьгъуьнин йисара лезги чIалал кхьенвай адан хейлин ктабриз - "Дидедин рикI”, "ЯхцIур гатфар”, "Дамахда за”, "Лепеяр”, "Икрам”, "Виш гъезел”... экуь дуьньяни акуна.

Лезгийрин СтIал Сулейманан тIварунихъ галай муздрамтеатрди Асеф Мегьманан музыкадин "Зи Седеф”, "Шуршурали”, "ЦIарубегни Харубег” пьесаяр сегьнеламишна.

Асеф Мегьманан яратмишунар мукьвал-мукьвал Азербайжандин ва Дагъустандин газетризни журналриз акъатзавай. КIелзавайбуру адан шииратдин алем хушдиз кьабулзавай. И кар лезги са жерге литературоведри, критикри шаирдин яратмишунрикай кхьенвай макъалайрай ачухдиз аквазва.

Эхиримжи йисара Асеф Мегьмана лайихлу пенсияда ял язавай. Амма лезги музыкадивай, литературадивай къерех хьанвачир. Ам лезги культурадин уьмуьрда кьиле физвай межлисрал, мярекатрал аквадай, рахадай. 

"Лезги газетдин” редакциядин коллективди чIехи ватанперес Асеф Мегьман рагьметдиз финихъ галаз алакъалу яз, адан хизандиз, мукьва-кьилийриз, ярар-дустариз дериндай хажалат чIугуналди башсагълугъвал гузва. Асеф Мегьман заха, къени, мергьяматлу къилихрин, зарафатрал рикI алай, чарадан гьалдикай хабар кьадай инсан тир. Гьахьтинди яз ам чи рикIерани эбеди амукьда.  


ЛММФДАдин корреспондентрин кIватIал

.

.

Мумкин я ваз килигиз кIан хьун:

РикIериз экв чукIурзавайди

Ушел из жизни писатель и композитор Асеф Мехман

"Шагьдагъ" ансамблдин юбилей

Ада райондин тIвар машгьурна

Муаллимринни алимрин сихил

Къейдер (0)