Ада райондин тIвар машгьурна
Хел: 
Райондин 85 йис тамам хьунин лишанлу вакъиадин вилик чи рикIел, кIанзни-такIанз, сифте нубатда адан тIвар виниз акъудун, экономика мягькемарун, инсанрин яшайишдин дережа хкажун, культура ва спорт вилик тухун, къайда-низам мягькемарун патал намуслувилелди кIвалах авур талукь къуллугърин руководителрин, производстводин кIвенкIвечийрин тIварар, абурун баркаллу крар хкведа.
Ахьтинбурун жергедай яз заз къе вилик йисара вичин дурумлу зегьметдалди чи республикадилайни къеце машгьурвал къазанмишай ДАССР-дин Верховный Советдин депутат яз хьайи «Касумкентский» совхоздин звеновод, «Знак Почета» ордендин сагьиб Мазанова Мислимат Велиметовнадикай суьгьбет ийиз кIанзава.
Ахьтинбурун жергедай яз заз къе вилик йисара вичин дурумлу зегьметдалди чи республикадилайни къеце машгьурвал къазанмишай ДАССР-дин Верховный Советдин депутат яз хьайи «Касумкентский» совхоздин звеновод, «Знак Почета» ордендин сагьиб Мазанова Мислимат Велиметовнадикай суьгьбет ийиз кIанзава.
Мазанова Мислимат 1911-йисуз Кьасумхуьрел кесиб хзанда дидедиз хьана.
1930-1969-йисара Кьасумхуьруьн «III Интернационал» колхозда колхозчи яз ва «Касумкентский» совхоздани багъманчивилин звенодин звеновод яз кIвалахна.
Вичин автобиографияда ада икI кхьизва: «Зи дидени буба зун лап гъвечIизамаз регьметдиз фена, абур зи рикIел аламач. Зун зи мукьвабурун патав чIехи хьана. Абуру зун гьа жув хьтин са етим гададиз Абдуллагьдиз гъуьлуьз гана. За зи итимдихъ галаз санал сифте Самур хуьре са варлу касдин кIвалерал батраквал авуна. Анай Кьасумхуьрел хтайла чун 1930-йисуз анин «III Интернационал» тIвар алай колхоздик экечIна.
Чахъ 4 велед хьана. Зи уьмуьрдин юлдаш Абдуллагь 1941-йисуз дяведин фронтдиз фена, адаз анай элкъвена хтун кьисмет хьанач. Зи кьве аял дяведин четин, мекьи ва гишин йисара начагъ хьана кьена. Амай кьве хва - Зейнуллагьни Гьабибуллагь-кIвачел акьалдарун патал за абуруз дидевални авуна, гьакI бубавални. Сифте за колхозда колхозчи яз, адакай «Касумкентский» совхоз хьайила ана багъманчивилин бригададин звеновод яз кIвалахна.
Хъсан нетижаяр аваз зарбачивилелди кIвалах авунай зун сифте комсомолдиз , гуьгъуьнлай КПСС-дин жергейриз кьабулна.
Гьакъикъатдани, къаст эцигна, галатун тийижиз кIвалахзавай ва общественный уьмуьрда активвилелди иштиракзавай Мислимат Велиметовна Кьасумхуьруьн Советдин депутатвиле, 33-36-райпарт конференцийрин делегатвиле, КПСС-дин райкомдин 6-пленумдал бюродин членвиле, гьакIни Райсоветдин депутатвиле хкяна.
1959-йис кIвенкIвечи багъманчидин уьмуьрда лишанлуди хьана. М.Мазанова 5-сеферда эвер гайи ДАССР-дин Верховный Советдин депутатвиле хкяна. И карди адан руьгь ва жавабдарвал мадни хкажна.
Адан гзаф йисарин намуслу зегьметдиз Гьукуматди еке къиметни гана. 1965-йисуз СССР-дин Верховный Советдин Президиумдин Указдалди Мислимат Велиметовнадиз «Знак Почета» орден гана. Ам гьакI «За доблестный труд» медалдин, 1960 ва 1980-йисара гайи ДАССР-дин Верховный Советдин Президиумдин Гьуьрметдин грамотайрин ва маса наградайрин сагьиб тир.
Баркаллу уьмуьрдин сагьиб хьайи Мислимат Мазановадин тIвар ам чидайкьванбуру, адан невейри, регьметар гъуналди, еке гьуьрметдивди кьазва, адаз алхишзава, Дагъустандин Халкьдин шаир регьметлу Шагь-Эмир Мурадова вичин манидиз элкъвенвай са шиирда кхьизва: «Кьейилани регьметар гъун бахт я, бахт…»
Эхь, чун вири и дуьньядал мугьманар яз атана, вахт хьайила хъфизва. Амма чун, гьар сад, жувалай гуьгъуьниз мягькем гел туниз, баркалладин са кар-кIвалах авуниз мажбур я, невейриз чешне жедайвал.
Абидин Камилов
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Россиядин чIехи гражданин кьена
Анатолий Къарибоваз “Дагъустан Республикадин вилик лайихлувилерай” орден ганва. Мубаракрай!
15-апрелдиз Ахцегьа Шагьабас Исмаилован 95 йисан юбилейдиз талукь мярекат кьиле фена
Къейд эцигун