Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

15-апрелдиз Ахцегьа Шагьабас Исмаилован 95 йисан юбилейдиз талукь мярекат кьиле фена

 

Ватандин ЧIехи дяведин уртах, гьукуматдин ва джемятдин кархъан Шагьабас Исмаилован зегьметдинни женгинин баркаллу уьмуьрдикай куьруь гаф рахуналди, мярекат Ахцегь райондин регьбер  Осман  Абдулкеримова  ачухна ва ам кьиле тухун райондин информагентстводин начальник Максим  Алимовал тапшурмишна.

- Дагъустан Республикадин Кьил Рамазан Абдулатипован къарардалди ЧIехи Гъалибвилин 70 йисан суварин вилик йикъара зи рагьметлу бубадин 95 йисан ва ам кечмиш хьайидалай инихъ 30 йисан юбилейриз, экуь къамат несилрин рикIера хуьниз бахшнавай и мярекат райондин, республикадин дережада къейд ийиз хьун, гьелбетда, адаз гьахьтин теклиф гайи РД-дин агъсакъалрин Советдин председатель А.Умалатован, культурадин виликан министр А.Гьажиеван, чи гьуьрметлу агъсакъал А.Агьмедован, Ахцегь райондин кьил О.Абдулкеримован, алим Д.Агьмедован къуват я, - башламишна суьгьбет ветерандин хва, алим Александр Исмаилова. - Бубадин уьмуьрдинни женгинин рекьикай куьрелди лагьайтIа, Шагьабас Азизович 1919-йисан 5-декабрдиз КьакIарин хуьре зегьметкеш чIехи хизанда хьана. Ада Ахцегьрин мектебда, Дербентдин педучилищеда кIелна, муаллим ва комсомолдин къуллугъчи яз Агъула кIвалахна. 1940-йисуз гьанай хушуналди Яру Армиядин жергейриз фена. Адан дяведин рехъ Заполярьедилай башламишна, Норвегиядай, Польшадай, Германиядай яна, Берлинда бегьем хьана. Гвардиядин капитан Ш.Исмаилова душманрихъ галаз къати женгера Ватандин дяведин пуд орден, са жерге медалар, Верховный Главнокомандующийдин патай Гьуьрметдин грамота къазанмишна. 1947-йисалай ада КПСС-дин Махачкъаладин горкомдин инструкторвиле, Рутул райкомдин 1-секретарвиле ва 1954-йисуз Москвада КПСС-дин ЦК-дин патав гвай  ВПШ акьалтIарайдалай кьулухъ КПСС-дин Дагобкомдин отделдин заведующийвиле, секретарвиле, Министррин Советдин Председателдин заместителвиле ва 1967-йисалай  ДАССР-дин Верховный Советдин Председателвиле лайихлудаказ кIвалахна. 

Ахпа Александр Шагьабасовича Ватандин ЧIехи дяведин иштиракчияр хьайи вичин баркаллу имийрикай - Исмаилакай, Тажудинакай, Нагъидикай, Набидикай ва Нурудинакай куьрелди итижлу суьгьбетарна. Ада къейд авурвал, Исмаиловрин хизандай  6  стхадини кьве хтулди (ДАССР-динни РСФСР-дин лайихлу муаллим Зейнудин Азизагъаевани муаллим Бейдуллагь Мегьамедова) дяведа иштиракна ва ругудни хуруйрал орденарни медалар алаз хайи хуьруьз хтана. 

Ватанперес, кьегьал стхайрикай ЧIехи Гъалибвилин йикъав къе анжах сад - Исмаилов Наби агакьнава. ЧIехи яшаризни, сагъламвилин гьалдизни килиг тавуна, хайи Ватандин азадвални аслу туширвал хуьн патал ада къени вичин женг давамарзава. Акьалтзавай несил вичин кьегьал стхайрин чешнейралди, ватанпересвилин руьгьдаллаз тербияламишунин - кьетIен женг!        
  
Мярекатдал зегьметдин ветеран ва общественный деятель Абдулкъафар Агьмедов, Наби Исмаилов, РГВК-дин обозреватель Ханжан Къурбанов, райондин "Возрождение” фондунин президент Къардаш Мамалиев, агъсакъалрин Советдин председатель Къазимет Къазиметов рахана. Абуру, Исмаиловрин  кьегьал стхайрин экуь къаматар рикIел хкуналди, абурун дяведин, гуьгъуьнин йисарин ислягь зегьметдин уьмуьрдай итижлу делилар гана.
 
Шагьабас Исмаилов дяведилай гуьгъуьнин, чкIанвай уьлкведин экономика кIвачел ахкьалдарунин четин девирдани баркаллу краралди тафаватлу хьана. Ам Зегьметдин Яру пайдах, Знак Почёта кьве-кьве ордендин сагьиб я. 1980-йисуз Дагъустандин пагьливанар Олимпиададин къугъунра иштиракуниз гьазурунин гьакъисагъ зегьмет Халкьарин дуствилин ордендалди ва СССР-дин олимпийский комитетдин Грамотадалди къейдна. Запасда авай  полковник, тарихдин илимрин кандидат, СССР-дин журналистрин Союздин член, ДАССР-дин культурадин лайихлу работник ва СССР-дин ислягьвилин Фондунин Дагъустандин отделенидин председателдин тIвар несилрин рикIера гьамишалугъ яз амукьда. 

Мярекатдин нетижаяр кьуналди, райондин регьбер Осман Магьмудовича ЧIехи Гъалибвилин суварин вилик жегьилрихъ галаз ватанпересвилин манадин гуьруьшар тешкилунин метлеблувал къейдна ва машгьур ватанэгьлидин къамат рикIел хкунин мярекатда иштирак авур виридаз чухсагъул лагьана.

Эхирдай ихтилат кватай чкадал къейдин, дяведа хизанлухвилелди иштиракунай Дагъустанда Ахцегь район тафаватлу я. ИкI, Ахцегьай Т.ТIаироврин хизандай 8 хва (Азим, Гьамдуллагь, Исмаил телеф хьана, Абдулгьей, Эбейдуллагь, Гьажибала, Мавлудин, Зейдуллагь хтана, вах Ийишади  зегьметдин фронтда игитвилер къалурна), Пашаеврин хизандай пуд стхани кьве вах (военный духтур Сулейманни старший лейтенант Сейфедин телеф хьана, вахар Набисатни Такибат ва стха Буньям хтана, ада гуьгъуьнлай ДГУ-да физматдин кафедрадин заведующийвал авуна) фронтда хьана, Мурсаловрин хизандай 5 стхади - Аливердиди, Алавдина, Гуьлалиди, Ризехана, Мегьамед-СултIана, Дагълароврин хизандай пуд стхади - Абаса, Абдулмежида, Абдулатифа женгер чIугуна.

Дашдемир Шерифалиев

.

Лезги Газет

.

Мумкин я ваз килигиз кIан хьун:

Шалбуздагъдин макьамарни везинар

Дербент райондин Белижда Чlехи Гъалибвилин 70 йисаз талукьарнавай мярекатар кьиле фена

Дяведин игитдин юлдаш Къизил Ашуралиевадив кIвал къачудай куьмекдин свидетельство вахкана

Ахцегьа МФЦ кардик акатна

“Самурда зул” сувар

Къейдер (0)