Шалбуздагъдин макьамарни везинар
Хел: 
Алатай
гьафтедин жуьмя юкъуз Ахцегьа "Шалбуздагъдин макьамарни везинар” лишандик кваз
республикадин фестиваль кьиле фена. "Шарвили” эпосдиз бахшна, ам тешкилайбур
Дагъустан Республикадин культурадин министерство, Республикадин халкьдин
яратмишунрин кIвал (РДНТ), Ахцегь райондин администрация ва культурадин
управление тир. Сиве-сивди ацIанвай залди сифте нубатда Махачкъаладай атанвай
РДНТ-дин векилар мягьтеларна.
Дагъустандин халкьарин адетдин культура ва музыкадин яратмишунар хуьнин, кIанарунин, вилик тухунин, Дагъустандин районрин культурайрин идарайрин кIвалах активламишунин, милли манияр тамамарзавай, къадим музалатрал къугъвазвай бажарагълу жегьилар винел акъудунин мана-метлебдин и фестивалда Ахцегь, Докъузпара, Мегьарамдхуьруьн, Сулейман-Стальский, Кьурагь, Рутул, Агъул районрин халкьдин яратмишунрин коллективри иштиракна.
Мярекат "Ахцегь район” МРдин администрациядин кьилин заместитель Алмас ШУАЕВА райондин регьбер Осман АБДУЛКЕРИМОВАН патай тебрикдин чар кIелуналди ачухна. Ада къейдайвал, эхиримжи вахтара райондин культурадин уьмуьрда гьар жуьре мярекатрин кьадар артух хьанва Сегьнедал сифте Ахцегь райондин векилар - "ТIури” ва "Шарвили” ансамблар экъечIна.
Абуру милли адетралди "Дагъвийрин мехъер” кьиле физвай тегьер къалурна. Бубадин кIваляй свас акъудзавай тегьер, чамран ва сусан бубадин кIвалера мугьманри цIийи хизан кутазвайбуруз мубаракарзавай вахт тамашачийри гурлу капар ягъуналди кьабулна. Ахпа сегьнедал гагь са гагь маса районрин векилар экъечIиз, манияр лагьана, кьуьлерна.
Сулейман-Стальский райондин культурадин отделдин начальникдин заместитель, РД-дин культурадин лайихлу работник Ярагьмед Ярагьмедова вини дережада аваз тамамарай халкьдин милли мани тамашачийриз иллаки бегенмиш хьана. Фестивалдин вири иштиракчийриз РД-дин Культурадин кIвалин, РДНТ-дин ва "Ахцегь район” МР-дин администрациядин патай дипломарни къиметлу пишкешар гана.
Дагъви Шериф
"Лезги Газет", №49, хемис 3-лагьай декабрь, 2015-йис
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Вирироссиядин гражданар кьабулдай югъ кьиле фена Дагъустанвийрин къайгъуда
Къейд эцигун