ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

“Самурда зул” сувар

 

Культурадин йисан серенжемрин сергьятра аваз  21-ноябрдиз Мегьарамдхуьруьн райондин Культурадин дворецда "Самурда зул” лишандик кваз республикадин кьвед лагьай сувар кьиле фена. Адан лишандик кваз Мегьарамдхуьре Россиядин халкьарин адетдин культурадин центр ачухна. 

Чlехи мярекат РД-дин культурадин министерстводин Халкьдин  яратмишунрин кIвали ва Мегьарамдхуьруьн муниципалитетдин культурадин отделди тешкилна ва кьиле тухвана.

Республикадин "Самурда зул” кьвед лагьай суварин мярекатда "Мегьарамдхуьруьн район” муниципальный райондин администрациядин кьил  Гьабибулагь  Мурадалиева, РД-дин культурадин министерстводин Халкьдин  яратмишунрин кIвалин отделдин начальник  Минажат  Мурадовади,  Мегьарамдхуьруьн райондин кьилин патав гвай общественный Советдин председатель  Агъададаш  Нагъметулаева, райондин администрациядин управленийрин ва отделрин къуллугъчийри, хуьрерин КДЦ-дин работникри, райондин хуьрерин администрацийрин кьилери, общественностди, Сулейман-Стальский, Агъул, Ахцегь, Докъузпара, Къайтагъ,Рутул, Къизляр, Табасаран, Хив, Хунзах, Дербент районрин культурадин идарайрин милли алатрин ва хордин коллективри, гьевескар ва пешекар артистри  иштиракна.

Мярекат башламишдалди вилик адан иштиракчиярни тамашачияр гьа и серенжемриз талукь яз райондин культурадин дворецдин фойеда райондин школайрин аялрин яратмишунрин кlвалахрикай гьазурнавай гуьзел  выставкайрихъни экспозицийрихъ галаз таниш хьана. Тамашачийрин фикир Мегьарамдхуьруьн райондин аялрин яратмишунрин центрадин, искусствойрин школайрин,  педагогар  тир Л.Саидалиевадин, Д.Гьажиевадин ва масабурун чирвилер къачузвай аялрин гъилин яратмишунрал желб жезвай. Абур дикъетдалди ва яргъалди Россиядин халкьарин адетдин культурадин центрада кlватlнавай кьван лезги халкьдин жуьреба-жуьре хъенчlин, цурун ва буьруьнждин къапариз, халкьди майишатда ишлемишзавай алатриз, са шумуд жуьре чешнедин гамариз, халичайриз ва маса шейэриз килигна.

Фойеда кlватl хьанвай Дагъустандин гьар са пипlяй атанвай мугьманар  тебрикуналди, мярекат кьиле тухузвай "Мегьарамдхуьруьн район” МР-дин "Культурадин отдел” МКУК-дин  директор Эседуллагь Селимова РФ-дин Президент Владимир Путинан Указдалди 2014-йис Культурадин йис яз малумарнавайди рикlел хкана ва и серемжемрин сергьятра аваз районда тарихдинни культурадин ирс хуьнин, вилик тухунин ва пропаганда  авунин мураддалди хейлин мярекатар тухвайди къейдна.  - Къе районда гзаф гуьзел вакъиа кьиле физва: сад лагьайди, "Самурда зул” тlвар алаз республикадин - 2 сувар тухузва;  кьвед лагьайди, къе чна Россиядин халкьарин адетдин культурадин центр ачухзава, - давамарна ада. - И гьуьрметдин везифа кьилиз акъудун патал за сегьнедиз гьуьрметлу  Гьабибулагь Мурадалиеваз, Минажат Мурадовадиз ва Агъададаш Нагъметулаеваз теклифзава.
РХАКЦ ачухна ва ана авай экспонатриз килигайдалай гуьгъуьниз вири залдиз ахмиш хьана.

Алай аямдин къайдайрив кьадайвал, пара гуьрчегдиз туькlуьрнавай, сиве-сивди ацlанвай залда суварин концерт Россиядин халкьарин адетдин культурадин Мегьарамдхуьруьн центрадин художественный самодеятельностдин хорди "Мегьарамдхуьр” мани тамамаруналди башламишна.

"Самурда зул” суварин мярекат ачухун патал тамадади сегьнедиз Гьабибулагь Мурадалиеваз ва Минажат Мурадовадиз теклифзава.
Гьабибулагь  Мурадалиев:
- Гьуьрметлу дустар ва мугьманар, Мегьарамдхуьруьн райондин кьил Фарид Агьмедован ва зи патай за куьн тебрикзава. Малум тирвал, алатай йисан апрелдин вацралай башламишна, РД-дин Кьил Рамазан Абдулатипован теклифдалди, тайин мурадрихъ элкъуьрнавай проектдин сергьятра аваз, районрин культурадин идарайрин бинедал  Россиядин халкьарин адетдин культурадин центраяр ачухзава. Къе куьн ихьтин са центр чи райондани ачухунин шагьидар хьана. И центр акьалтзавай несилдиз итижлудаз, яратмишунрин алакьунар ачухдайдаз ва руьгьдин культура хкаждайдаз элкъуьн лазим я. Им чи виридан умуми ва асул кlвалах я ва ида чи уьлкведин диб мягькемаруниз къуллугъда. Виридан къуватар сад авуналди, чна чи райондиз хас тир лишанрин культура хуьда.

Минажат  Мурадова:
- Гьурметлу мегьарамдхуьруьнвияр, къенин мярекатдин иштиракчияр,  за квез рикlин сидкьидай къенин сувар мубаракзава. За умудзава, ина активдаказ аялриз Россиядин халкьарин адетдин культурадикай чирвилер гудай кружокар, студияр, объединенияр кардик кутада. Мегьарамдхуьруьн райондин гьевескар артистри гьамиша республикадин мярекатра активдаказ иштиракзава ва абуру а мярекатра лайихлу чкаярни кьазва. Квехъ культурадин хиле мадни хъсан агалкьунар жедайдахъ зун инанмиш я. 

Ахпа анал Гьабибулагь Мурадалиева культура хуьник ва вилик тухуник пай кутазвай райондин культурадин ва маса хилера яргъал йисара гьакъисагъ зегьмет чlугвазвай Хожа-Къазмайрин КДЦ-дин худрук Муъминат Амахановадив, ЦТКНР-дин директор Рафик Гьусейновав, Ярагъ-Къазмайрин КДЦ-дин директор Музлифат Гьасанбеговадив, ЦТКНР-дин манидарар Билал Эскендеровав, Назиля Саидалиевадив, Гъепцегърин КДЦ-дин библиотекадин заведующий Гъани Улубеговав, Хожа-Къазмайрин хуьруьн кьил Измир Исабеговав, Бут-Къазмайрин хуьруьн кьил Рафик Урдихановав гьуьрметдин грамотаяр вахкана.
Сегьнедиз гъилера гьар жуьре рангарин шарарни аваз  аялрин "Солнышко”  бахчадин десте экъечlзава. Абуру авур кьуьлуьниз ва лагьай манидиз залдавайбуру гурлу капар яна. Кьуьлердай "Мегьарамдхуьр” ва райондин ДК-дин милли алатрин  ансамблри, РД-дин культурадин лайихлу работник ашукь

Айдун  Мегьамедова, машгьур манидарар Седакъет Саидовади ва Билал Эскендерова, Советский хуьруьн итимрин "Ялцугъ”  хордин ва Хожа-Къазмайрин фольклордин ансамблри, далдамчийрин дестеди, милли парталар алаз сегьнедиз экъечlна, устадвилелди тамамарай нумрайри тамашачийрин рикIер шадарна. 

Эседуллагь Селимова суварин нубатдин иштиракчиярни музыкадин нумраяр малумаруналди, сегьнедиз Къизляр шегьердин Гьукуматдин терский казакрин манийрин ва Хунзах райондин кьуьлерин ансамблияр къвезва. Абуру лагьай частушкайрини авур кьуьлери залдик юзун кутуна. Ахпа сегьнедиз сад-садан гуьгъуьналлаз Давид Рагьимханов, Рита Абдурагьманова (Хив район), Эрзиман Османов (Сулейман-Стальский район), РД-дин лайихлу артист Вели Шагьбанов, Михаил Гьашимов (Рутул район), Ашукь Шемшир (Докъузпара район), Аминат Алиева (Агъул район), Рустам Рамазанов (Табасаран район), Абдулмуъмин Гьашумов (Ахцегь район), Хадижат Абдусаламова (Хунзах район), Арзу Керимханова (Дербент район) экъечlна. Абурун сад-садаз ухшар авачир ширин сесери залдавайбур гьейранарна. Тамашачийри сегьнедиз экъечlай гьар садаз гурлу капар яна.
Суварин мярекат адан вири иштиракчийриз РД-дин минкультурадин РДНТ-дин патай  дипломар, райондин администрациядин патай рикIел аламукьдай пишкешар гуналди ва мугьманар "Леки” банкетный залда къунагъламишуналди давам хьана.

Къагьриман Ибрагьимов

.

Лезги Газет

.