Шад хабар Нубатдин дережа
Хел: 
Россиядин къецепатан крарин министерстводин Махачкъалада авай векилханадин къуллугъчи Гьасан Мегьамедова хабар гайивал, и мукьвара Россиядин Федерациядин Президент В.Путинан Указдалди чи ватанэгьли, РФ-дин МИД-дин жавабдар къуллугъчи Ярагьмедов Азим Алаудинович Эритрея государствода Россиядин Федерациядин Чрезвычайный ва Полномочный посолвиле тайинарнава.
Дагъустандин тарихда къецепатан уьлкведин государствода дипломатвилин лап кьилин къуллугъдал дагъустанви тайинарнавай им кьвед лагьай дуьшуьш я. Са шумуд йис идалай вилик Рамазан Абдулатипов Тажикистан Республикада Россиядин Чрезвычайный ва Полномочный посолвиле тайинарнай.
Са рахунни алач, им пара шад ва дамах кутадай хабар я. "Лезги газетдин” редакциядин коллективди Азим Алаудиновичаз къуллугъдин рекьяй нубатдин дережа мубаракзава ва чи уьлкведин абадвал патал ийизвай кIвалахда мадни хъсан агалкьунар хьун кIанзавайди къалурзава.
РикIел хкин, Ярагьмедов Азим 1960-йисан 20-февралдиз Кьасумхуьрел дидедиз хьана. Ада хуьруьн юкьван школа, Краснодардин политехнический институт, Дагъустандин государственный университет куьтягьна. 1998-йисуз Россиядин къецепатан крарин министерстводин дипломатвилин академия акьалтIаруналди, политологиядин илимрин кандидатвилин тIварни къачуна. Ам азаддиз туьрк ва ингилис чIаларал рахазва.
Азим Ярагьмедова вичин зегьметдин рехъ 1983-йисуз Махачкъаладин ремонтдинни монтаждин заводда мастервилелай башламишна. Ахпа ада Избербашдин фу чрадай заводда кьилин инженервилин везифаяр тамамарна. Идалай гуьгъуьниз А.Ярагьмедова комсомолдин ва партийный идарайра кIвалахна. 1990-йисуз ам Дагъустан Республикадин Верховный Советдин депутатвиле хкяна.
1991-1993-йисара ада Дагъустан Республикадин къецепатан экономикадин кIвалахдихъ галаз алакъалу госкомитетдин председателдин заместителвиле кIвалахна.
1993-йисалай къенин йикъалди ада Россиядин МИД-дин къурулушда зегьмет чIугвазва. Адакай Азербайжанда, Тажикистанда Россиядин посольстводин советник хьана. 2006-2010-йисара А.Ярагьмедова Худжанд шегьерда (Тажикистан) Россиядин генеральный консулвилин везифаяр тамамарна.
А.Ярагьмедов Россиядин дипломатрин Ассоциациядин Президиумдин член я. Адахъ государстводин ва ведомстводин са шумуд награда, хизанда кьве хва ава.
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Россиядин чIехи гражданин кьена
Анатолий Къарибоваз “Дагъустан Республикадин вилик лайихлувилерай” орден ганва. Мубаракрай!
Къейд эцигун