Federal lәzgi
milli-mәdәni muxtariyyәti

Bakıda partlayış şoku

Metrostansiya yaxınlığında yarımçıq tikili partladı; ətraf binalara və obyektlərə zərər dəydi; 3 nəfər yaralandı

Fevralın 13-də Bakıda, "Azadlıq prospekti” metrostansiyası yaxınlığında partlayış baş verib. Əvvəlcə hansısa səbəbdən metrostansiyada partlayış olduğu xəbəri yayılıb. Lakin tezliklə bəlli olub ki, hadisə yaxınlıqdakı yarımçıq tikilidə baş verib. Tikili uçub, bundan başqa partlayışın gücündən yaxınlıqdakı binaların və "Şhənşah” şadlıq sarayının pəncərələri sınıb. Partlayış anında yaxınlıqdakı dayanacaqda dayanmış bir avtobusa da ziyan dəyib.
Rəsmi məlumatlara görə, hadisə nəticəsində 2 qadın və 1 kişi olmaqla, 3 nəfər yaralanıb. Onlar xəstəxanaya çatdırılıb.
İlkin versiyaya görə, partlayışa tikilinin zirzəmisində qaz sızması səbəb olub. 
Hadisə yerinə dərhal yanğınsöndürən maşınlar və təcili yardım briqadaları cəlb olunub.
Partlayış zamanı əzilən 13 saylı marşrut avtobusun Mübariz adlı sürücüsü hadisəni "Azadlıq” radiosuna belə təsvir edib: "Avtobusu dayanacaqda saxlamışdım. Birdən baş verən partlayışdan avtobusların şüşələri qırıldı. Bir qadın sərnişinin qolu sındı, təcili yardım apardı”.
Həmin avtobusun üstünə mişar daşı düşüb.
Partlayışdan ziyan görmüş binanın sakini Rahib Qasımov jurnalistlərə deyib ki, sakinlər yarımçıq tikilidə qazsızmasından narahatlıqlarını bir neçə dəfə ərazidəki fəhlələrə bildiriblər. Bir neçə dəfə binada xüsusi aparatla yoxlama aparıldığının da şahidi olublar.
Sakinlərdən biri Naza Həsənova: "İşdə idim, uşaq zəng etdi ki, partlayış olub. Mənzilimin pəncərələri qırılıb”.
Başqa bir şahid isə "Azadlıq” radiosuna hadisəni belə təsvir edib: "Elə bir səs gəldi ki, elə bildim yer yarıldı. Başımı sükanın arxasında gizlətdim”.
Təkrar partlayış ehtimalı istisna olunmadığından mülki şəxslər, o cümlədən jurnalistlər hadisə yerindən uzaqlaşdırılıb. FHN əməkdaşları sahəni mühasirəyə alıb.

.

azadliq.info

.