Federal lәzgi
milli-mәdәni muxtariyyәti

Hakimiyyət beynəlxalq aləmə müharibə elan etdi

Fuad Ələsgərov beynəlxalq təşkilatlarla əməkdaşlıqdan imtina təklifilə çıxış edib

Leyla Yunus: «Çox yaxşı ki, artıq gerçək simalarını gizlətmirlər»

Prezident Administrasiyasının Hüquq-mühafizə orqanları ilə iş şöbəsinin müdiri Fuad Ələsgərov YAP-ın Beynəlxalq əlaqələr komissiyasının ilk iclasında beynəlxalq təşkilatlarla əməkdaşlıqdan imtinaya çağırış edib.

"Trend”in bu barədə yaydığı məlumata görə, Fuad Ələsgərov deyib ki, "Freedom House”, "Human Rights Watch”, "Amnesty International”, "Transparency International” kimi təşkilatlarla əməkdaşlıq yox, "bu təşkilatların yürütdüyü ikili standartlara qarşı mübarizə aparmaq, Azərbaycanla bağlı yayılan yalan məlumatların qarşısını almaq" lazımdır: "Hesab etmirəm ki, bu təşkilatlarla əməkdaşlıq uğurlu ola bilər. Zənnimcə, biz mövqeyimizi dəyişməliyik”.

Sülh və Demokratiya Institutunun direktoru Leyla Yunus deyir ki, illərdir beynəlxalq təşkilatlara, əsasən də diplomatlara bu hakimiyyətin əsl simasını izah eləməyə çalışırlar.
Hüquq müdafiəçisinin sözlərinə görə, Avropa Şurası, Avropa Birliyi kimi təşkilatlarda təmsil olunanlara izah etmək istəyirlər ki, bu hakimiyyətdəkilərin əksəriyyəti Stalin kimi adamlardır. Onlar xalqı sıxmaqla ölkəni idarə edirlər, şəxsiyyətə pərəstişi geniş yayır: "Bu hakimiyyətdəkilər insan haqlarını tapdaq altına salanlardır. Indiyədək dialoqdan danışırdılar, indisə özləri dialoqdan imtina edirlər. Çox yaxşı ki, artıq gerçək simalarını gizlətmirlər. Biz indiyə qədər onların mahiyyətinin nədən ibarət olduğu barədə danışırdıq.

Indi özləri bu cür hərəkətlərilə, bəyanat və təkliflərilə hansı düşüncənin sahibi olduğu sübut edirlər. Yaxşı olar ki, bu hakimiyyət elə birbaşa şəkildə beynəlxalq aləmə müharibə elan etdiyi açıqlasın”.

.

azadliq.info

.