Rus Eng Az Lz
Мобил жуьре

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Регистрация авун
Ви тIвар
Пароль
Къекъюн

Фияви уьлкведин майданра

01 12 2014, 03:02
Килигун(ар): 1 396
Къейдер: 0
Хел: Lezgian / lezgi-avtonomiya


Алай йисан сифте кьилерилай башламишна, Кавказдин республикайра Кавказдин атлуйрин дивизиядин виш йисан юбилейдиз талукь мярекатар тешкилнавай. И мукьвара РАН-дин концертрин "Академический” чIехи залда кьиле фейи Кавказдин халкьарин медениятдин фестивални атлуйрин дивизиядин юбилейдиз талукьарнавай. Фестиваль Кавказдин халкьарин Россиядин Конгрессди (РКНК) ингье кьуд лагьай сеферда тешкилна.

Суварин гьалара кьиле фейи фестиваль Москвадин гьукуматдин, Ингушетия Республикадин гьукуматдин куьмекдалди "Россиядин офицерар” общественный тешкилатдихъ ва "Эльбрусоид” фондунихъ галаз санал кьиле тухвана. Фестивалдик РНКН-дик квай гзаф халкьарин ва диаспорайрин векилри чпин пай кутуна. Мярекатра ФЛНКА-дини (Федеральная лезгинская национально-культурная автономия) активвилелди иштиракна - Кавказдин халкьарин гъилин-тупIун шейэрин выставка тешкилна ва концертда иштиракун патал манидар Алиядиз теклифнавай. Чи халкьдин машгьур заргар Гуьлугълан Мамедярован гъилин-тупIун шейэрин выставка тешкилнавай. 

Фестивалда Ингушетия Республикадин Кьил Юнус-Бег Евкурова, РФ-дин Президентдин Администрациядин, РФ-дин Госдумадин, Федерациядин Советдин, Москвадин Гьукуматдин, Кеферпатан Кавказдин республикайрин векилри ва РФ-дин Президентдин патав гвай абурун гьамишалугъ векилханайрин къуллугъчийри, машгьур кавказвийри иштиракна.

ФЛНКА-ди тешкилнавай выставкада фияви, заргар Гуьлугълан Мамедярова авунвай гапурри, стакан твадай гимишдин къапари ва адан гъилин гьар жуьре шейэри фестивалдин вири иштиракчийрин фикир желбна. Ада арадал гъанвай жавагьиррай иштиракчийриз лезгийрин къадим нехишар, халкьдин меденият, тарих аквазвай. Дагъвийрин парталарни алукIна, къвалал гапурни алаз акъвазнавай Гуьлугълана тамашачийриз гьар са шейиникай, а шейэр ва абурал алай нехишар арадал атай тегьеррикай суьгьбетзавай. УстIардин гъилин-тупIун шейэри Ингушетия Республикадин Кьил Юнус-Бег Евкурован фикир иллаки желбна. Ю.Евкурова чи ватанэгьлидиз рикIел аламукьдай диплом, Гуьлугълана адаз хайи Фиярин хуьруькай вичи туькIуьрнавай ктаб багъишна. 

Къунши республикадин регьберди къейдайвал, чна, кавказвийри, чи Кавказ, чи ата-бубаяр, чи кьакьан дагълар Россиядин вири регионра лайихлудаказ къалурун лазим я.  

Суваррин концертдин сегьнедал чи машгьур манидар Алияди лезги чIалалди лагьай "Хайи ерияр” маниди виридаз таъсирна. 
Гьа и йикъара лезгийри москвавияр мад са мярекатдал гьейранарна. Москвадин государстводин фольклордин музыкадин "Урусрин мани” театрда кьиле фейи "Гзаф миллетрин Россия” форумдани чи ватанэгьлийри, ФЛНКА-дин векилри ва заргар Гуьлугълан Мамедярова иштиракна. 
И мярекат РФ-дин культурадин министерстводи "Россиядин миллетдин садвал мягькемарин ва Россиядин халкьарин этнокультура вилик тухун (2014-2020-й.)” федеральный кар алай программадин сергьятра аваз тешкилнавайди тир.

Йисан вахтунда РФ-дин культурадин министерстводин къаюмвилик кваз кьиле тухванвай мярекатрин нетижаярни кьур и форумда кьилдин экспозицияр яз "Кавказ - секинвилин кIвал”, "Казакрин станица”, "Крым Республика ва Севастополь”, "Татаррин региональный милли ва культурадин Москвадин автономия” авай.  

Выставка ачухунин шад мярекатда РФ-дин культурадин министрдин заместитель Владимир Аристархова, Россиядин халкьдин артистка, "Урусрин мани” театрдин регьбер Надежда Бабкинади, Россиядин регионар вилик тухунин министерстводин халкьарин арада алакъайрин рекьяй политикадин гьукуматдин Департаментдин директор Сергей Журавскийди, Федерациядин Советдин председателдин сад лагьай заместитель Александр Торшина ва гзаф масабуру иштиракна. 

"Кавказ - секинвилин кIвал” экспозиция арадал гъунин кардик, къейд авун лазим я, ФЛНКА-ди еке пай кутуна. Абурун теклифдалди выставкада чи халкьдин сейли заргар Гуьлугълан Мамедярова ва даргиви сеняткар Сакинат Исмаиловади иштиракна. Гуьлугълана вичи туькIуьрнавай, къадим нехишралди безетмишнавай крчар, гапурар ва маса затIар, Сакината гъили туькIуьрнавай нинияр, абурал алай  халкьарин милли ва Дагъустандин кьилдин хуьрерин агьалийрин парталар къалурзавай. 

Дагъустанви кьве устIардин гъиликай хкатнавай шейэри вири тамашачийрин фикир чпел желбзавай. 
Кавказдиз талукь выставкадин тешкилатчийриз ва иштиракчийриз Сергей Журавскийди, Александр Торшина ва Надежда Бабкинади хъсан къимет гана. С. Журавскийди фияви устIардиз рикIел аламукьдай диплом гана. ТIварцIин дипломдиз Сакинат Исмаиловани лайихлу хьана. 
Форумдин кIвалахда РФ-дин культурадин министр Владимир Мединскийдини иштиракна.

Дагъви Шериф

.

Лезги Газет

.

Сайтдин халисан уртах хьун патал регистрация авун кIан я.

Мумкин я ваз килигиз кIан хьун:

ЦIийи йисан вилик савкьатрин выставка

Дербент - 2000. Вири къуватар желб ийин

Сергьятар гегьеншарзава

РФ-дин Общественный палатада - лезги чIал Милли чIалар хуьн

Яран сувар Кьиблепатан Дагъустанда

Къейдер (0)
Къейд эцигун