Federal lәzgi
milli-mәdәni muxtariyyәti

Mirvari Qəhrəmanlı: Dövlət Neft Şirkəti əlsiz-ayaqsız bir quruma çevrilib

 

Neftçilərin Hüquqlarını Müdafiə Cəmiyyətinin sədri Mirvari Qəhrəmanlı "Amerikanın Səsi”nə müsahibəsində "Günəşli” yatağının dəniz platformasında neftçilərin itkin düşməsinin səbəblərindən və təhlükəsizlik tədbirlərindən danışıb.

Sual: "Günəşli” yatağındakı dəniz platformasında neftçilərin itkin düşməsinin səbəbləri nədir? Onları xilas etmək olardımı? 

Cavab: Yəqin ki, ən əsas səbəb yaradılmış dövlət komissiyası araşdırdıqdan sonra bilinəcək. İndidən əsas səbəbi demək tələskənlik olardı. Bizim ilkin aldığımız versiyalardan biri hələ təsdiqini tapmamış, daxildə təhlükəsizlik qaydalarına riayət olunmaması idi. Bunun nəticəsində külək qəzanın əmələ gəlməsinə stimul verib. İnsanları vaxtında azad etmək, oradan köçürmək olardımı? Sadəcə düşünürəm ki, ilkin təxliyə düzgün olmayıb. Camaat özünü itirib və təxliyə qaydalarına riayət edə bilməyib.

Sual: Azərbaycan Dövlət Neft Şirkətinin dəniz platformalarındakı təhlükəsizlik qaydaları ilə xarici neft şirkətlərinin platformalarındakı təhlükəsizlik qaydaları arasında fərqlər nədir? Niyə xarici neft şirkətlərinin dəniz platformalarında yanğınlar, insan ölümləri qeydə alınmır?

Cavab: BP şirkətinin təhlükəsizlik üzrə 8 qızıl qaydası var. Orada insan faktoru əsas amil təşkil edir. Bu qaydalara əməl etməyən bir xidmətlə, hətta hər-hansı podaratçı şirkətlə də kontrakt pozula bilər, işçi isə o dəqiqə işdən çıxarıla bilər. Fərq ondan ibarətdir ki, orada təhlükəsizliklə məşğul olan işçiyə, supervayzerə (rəhbər işçi-red) böyük səlahiyyətlər verilir. Onun işi dayandırmaq səlahiyyətləri var. Onun işi saxlamaq, stop işarəsinə hamı tabe olmalıdır. Azərbaycan Dövlət Neft Şirkətində isə heç kimin işi saxlamaq səlahiyyəti yoxdur. Baxmayaraq ki, küləkdir, nə hadisə olur-olsun, əgər təlükəsizlik üzrə nəzarətçi şəxs  stop versə, ona işi saxlamaq səlahiyyəti verməyəcəklər.  

Sual: Bəzi ekspertlər "Günəşli” yatağındakı dəniz platformasındakı qəzanı xarici təxribatlarla əlaqələndirir. Azərbaycan Respublikası dəniz platformalarında təhlükəsizliklə bağlı hansı tədbirləri həyata keçirir?

Cavab: Bunu sıfır hesab edirəm. Terroru, yaxud da hansısa hadisənin qəsdən törədilməsini istisna edirəm. Bu sahədə uzun müddət işləmiş təcrübəsi olan adam kimi bu halları istisna edirəm. Ora kənardan müdaxilə çox çətindir. Böyük bir texnika ilə oraya müdaxilə olunmalıdır. Orada işləyən insanların təxribat, terror etməsi qeyri-mümkündür. Çünki uzun müddət bir yerdə işləyənlər, ən ağır vəziyyətlərdə bir yerdə işləyənlər arasında kamikadze ola bilməz.

Sual: Rəsmi qurumlar insanların xilas edilməməsini dənizdə güclü dalğaının, yanğının olması ilə izah edirlər. Xilasedicilər böhranlı vəziyyətdə insanları xilas etmək üçün texniki vasitələrə, qurğulara, geyimlərə malikdirlərmi?

Cavab: Geyimlərini deyə bilmərəm. Sadəcə olaraq, ürək ağrısı ilə deyə bilərəm ki, əvvəllər, Sovetlər vaxtı Dövlət Neft Şirkətində olan donanma, gəmilər, deyərdim, heç indi BP şirkətində yoxdur. Dövlət Neft Şirkəti əlsiz-ayaqsız bir quruma çevrilib. Dövlət Neft Şirkəti hökumətin ikinci büdcəsinə çevrilib. Dövlət Neft Şirkətinin özü insanları təxliyə etmək üçün gərək nə Fövqəladə Hallar Nazirliyinə müraciət etsin, nə də BP-yə. Bunlar vaxt aparır. BP-nin təhlükəsizliklə bağlı istifadə etdiyi texnika sübut etdi ki, beynəlxalq təcrübəni öyrənməli, beynəlxalq standartlara cavab verən güclü texnikaya malik olmalıdır. Yoxsa belə qəzalardan bizim dəniz neftçiləri istisna deyil. İnsan həyatı, insan faktoru birinci amil olmalıdır.

.

www.contact.az

.