Gürcüstanın baş naziri Azərbaycanda matç zamanı baş verənləri təxribat adlandırıb
Category: 
Tbilisi/10.07.15/Turan BSPRESS: Gürcüstanın baş naziri İrakli Qaribaşvili ötən gün Qəbələdə futbol matçı zamanı Gürcüstanın "Dinamo” və Azərbaycanın "Qəbələ” komandaları arasında baş vermiş insidenti təxribat adlandırıb.
KİV-in məlumatına görə, Avropa Liqası təsnifat mərhələsinin cavab matçında azərbaycanlı azarkeşlər Gürcüstana ərazi iddialarına dair, əsasən "Borçalı qədim Azərbaycan torpağıdır” sözləri yazılmış bannerlər qaldırıblar. Sonra isə Gürcüstanın bayrağını yandırıblar.
İyulun 2-də isə oxşar insident Tblisidə sözügedən klubların matçında baş verib. Bir qrup azarkeş "Biz Zaqatalanı, Qaxı xatırlayırıq, 1921” sözləri yazılmış plakat qaldırıblar. Matçdan sonra Azərbaycanın bayrağını tapdalayıblar.
"Bu cür təxribatlar azarkeşlərə xasdır və təxribat qrupları bütün ölkələrdə var. Yəqin, xatırlayırsınız, göndərilən təxribat qrupları bizim adımızdan necə danışırdılar, indi də eyni hadisələr Azərbaycanın adından təkrarlanıb”, - İ.Qaribaşvili jurnalistlərə bildirib.
Gürcüstan hökumətinin rəhbəri qeyd edib ki, bu cür təxribatlar "Azərbaycanla dost münasubətlərə heç cür təsir göstərməyəcək” və adamlar buna fikir verməməlidirlər.
.
Maybe you are interested in:
Əfqanıstanın neft naziri Bakıda səfərdədir