Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Жабар Аскеров: “Спорт зун патал уьмуьр я…”


Алатай йисан эхирриз Махачкъалада, "Grand Plaza” тIвар алай алишверишдин центрада, РД-да авай ФЛНКА-дин жегьилрин департаментдин кьиле авай ксари лезги халкьдин еке умудар квай спортсмен, спортдин са шумуд жуьредай инанмишвилелди вичин къуватар ахтармишзавай Жабар Аскеровахъ галаз гуьруьш тешкилнавай.

Къейд авун лазим я хьи, ФЛНКА-дин жегьилрин департаментди и жуьредин гуьруьшар идалай виликни кьиле тухванай, и кар, чна умудзава, гележегдани давамарда. Машгьур спортсменрин уьмуьрдикайни спортдин рекьикай ва тежрибадикай суьгьбетри, абурун насигьатри жаванрин руьгь хкажзавайдал, абуруз спорт кIанарзавайдал, шак алач. Ихьтин мярекатрихъ ва серенжемрихъ винел акьалтзавай несилдиз ватанпересвилин тербия гунин рекьяйни еке менфят ава. Гуьруьш РД-да авай ФЛНКА-дин жегьилрин департаментдин руководитель Равидин Абдурагьимова ачухна ва кьиле тухвана. Ада Ж.Аскерован спортдин ва уьмуьрдин рекьикай куьрелди суьгьбетна. Гуьгъуьнлай мярекат "суал-жавабдин” тегьерда, хъсан тешкиллувал аваз тамам кьве сятда кьиле фена. КIватI хьанвайбуру Ж.Аскероваз спортдикай, гележегдин планрикай, хизандикай суалар гана. Малум хьайивал, чи ватандашди Австралиядиз хъфиз гьелелигда тади къачузвач, мукьвал вахтунда Махачкъалада, багърийрин патав, вичин муг кутадай ниятар ава.

Ж.Аскерован мукьвал гележегдин бягьс алай вацра Китайдин Шанхай шегьерда KUNLUN FIGHT — 36 тIвар алай турнирдин сергьятра аваз кьиле фида. Агъадихъ чна гуьруьшдай са шумуд суал ва Жабар Аскерован жавабар гузва.

Жабар, куьне пешекарвилин кикбоксинг хкягъунин себеб гьихьтинди я?

— Куьне зун пешекарвилин кикбоксингдал машгъул хьун хабар кьазвани? Пешекарвилин спортда жуван къуватар алцумун-им зи аял чIаван мурад тир жеди, зи хиялар гьамиша пешекарвилин спортдикай тир, за гьевескаррин спортдал са акьван гзаф фикир желб авурди туш. За бягьс тухунин тегьер тайский пешекарвилин боксдихъ ва кикбоксингдихъ галаз хъсан кьадайди тир. Гьевескаррин спортдал машгъул хьунин кьилин себебар — тIварар къазанмишдай, спортдин кукIушар муьтIуьгъардай мумкинвал хьун я. Гьа са вахтунда спортди къазанжияр гъана кIандайдини за аннамишнавай. Гьавиляй пешекарвилин спорт хкягъайла спорт уьмуьрда кIвалахдиз элкъвезвайди я — пул къазанмишдай, хизан хуьдай…

Куьне иштиракай сад лагьай акъажунар рикIел хкайтIа… Куь гьиссер гьихьтинбур тир?

— Зун датIана кикбоксингдал машгъул жезвай, спортдин и жуьре халкьдин арада иллаки гзаф машгьур тир, амма турнирар кикбоксингдай тухузвачир. Турнирар гзафни-гзаф гьевескаррин боксдай тешкилзавай. Зун а вахтунда Дербентда авай, боксдай школадин чемпионат тешкилнавай. Ана зани иштиракна. 28 кг-дин заланвал авайбурун арада за анжах са бягьс кьиле тухвана, зун гъалиб хьана. Са акьван рикIел аламукьдай гьиссер захъ авачир, рикIик еке къалабулух квачир, бягьс куьтягьна, зун экъечIна. А чIавуз зи 9 йис тир.

Жабар, са бязи спортсменри чпин гъалибвилер багърийриз, кIанибуруз, дустариз… бахшзава. И жигьетдай куь фикир гьихьтинди ятIа чир хьанайтIа кIандай… Куь гъалибвилер вуж (ва я вуч) патал я?

— Зун жуван хизан, жуван гележегдин жегьил хизан патал гъалибвилер къазанмишиз алахъзава: гьикI хьи спорт за пул къазнмишзавай чешме я. За вири гъалибвилер зун спортдиз гъайи зи бубадиз бахшзава.

Бягьсиниз экъечIдалди ва адалай кьулухъ куь гьиссер гьихьтинбур я? Рингдал куьне никай (ва я квекай) фикирзава?

— Виликрай бягьсинин вилик зак гъалибвал къазанмишунихъ ва я кумукьунихъ галаз алакъалу фикирри къалабулух кутадай. Гила ахьтин къалабулух амач, са тIимил теспачавал акатда, амма и гьалди жув гъиле кьаз, дуьм-дуьздаказ фагьум-фикир ийиз тазва. Рингдал за, ахпа гьайиф чIугван тийидайвал, жуван къуватрикай вири 100 %-дин менфятлувал къачуникай фикирзава. Бягьс акьалтIарайла, за жуван кIвалах тамамвилелди кьиле тухванваз хьайитIа, шадвалзава. Эгер кумукьнаватIа, жувакай хъел къвезва. Амма зун шад жезвай вахтар гзаф я. Бягьс кьиле физвай декьикьайра лагьайтIа, зи фикирда авайди анжах жуван къаршидиз экъечIнавай спортсмен я. Бягьсерилай гуьгъуьниз за жуван бубадикай фикирзава… Зи бубадиз сиясат авун хуш кар тир. За жуьреба-жуьре шегьерра ва уьлквейра бягьсер кьиле тухузва, бубадиз зи патав хьун гьикьван хуш жедайтIа…

Гуьруьшдин эхирдай спортсмендин гележегдин планрикай мадни чир хъхьана: спортдин рехъ акьалтIарайла, Жабар Аскерова вич политикада ахтармишун кьетIнава

Рагнеда Рамалданова

Лезги Газет

.

Мумкин я ваз килигиз кIан хьун:

Машгьур муаллимдихъ галаз акун

Лезгияр сад ийизвай сувар

Госдумадин депутатдихъ галаз жегьилрин гьалтун кьиле фена

“Лезги газетдин” ФЛНКА-дин векилрихъ галаз алакъаяр пара хьурай

КукIушрин кукIуш

Къейдер (0)