ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Экстремизмадиз «Ваъ» лугьузва!

Дербенда кефер патан Къавкъазда экстремизм тIимиларунин юкьв ахъа хьана

Хабарар гузвай сайтрин малуматрив кьурвал, гьабурук кваз «РИА» Дагъустан, гьафте вилик Дербенда кефер патан Къавкъазда экстремизма тIимиларунин юкьв («Центр профилактики экстремизма») ахъа хьана.

Сад лагьай сеферда ихьтин хабарар акъатайди тир октябрдин эхир кьилиз. Виликмаз лагьанвай цIийи идарадин кIвалахрин асул хилер, джемятда писвал твазвай шартIар тIимиларунин къайдаяр. Гила атанва хабарар, Юкьваз Республикадинни чкадин дережадин къуватдин, жегьилрин джемятдин векилар атанвай.

ГьакI, мярекатдал Дагъустандин вице-премьер Рамазан Джафаров, гьадахъ галаз санал Республикадин кьилив гвай меслятрунинни секинарунин комиссиядин  («Комиссия по примирению и согласию при главе РД») чIехиди язвай, шегьердинни чилин гьакиматрин («администрация») векилар ва масабур.

ЦIийи тешкилатдин кьил Севиль Новрузовади лагьайвал, Юкьван сад лагьай везифа язва экстремизмадикайни терроризмдикайни хкатай инсанар секин уьмуьрдиз хкин.

Вичин гаф лугьудайла, Рамазан Джафарова ихьтин юкьвар Махачкаладани Дагъустандин кефер пата ахъай жеда лагьана. Кьилди къейд авуна кIан я ихьтин юкьв хкягъна Дербенда ахъа хьайиди. Сифте вахтара секин тир Кьибле патан Дагъустан яваш-яваш мягькемвал («стабильность») авачир чкадиз элкъвезва, жегьилар радикал фикиррик акатзава, терактарни КТОяр артух жезва.

Юкьва кIвалахзавайбур гзафни-гзаф хатавилик квай жегьилрихъ галаз кIвалахунал алахъда. И кIвалахдик диндин кархъанар, муаллимарни психологар кутада.

Чун гъавурда акьуна кIанда хьи, жегьилар радикал патахъ физвайди кьилди са экстремизмадихъ ялзавайбур ава лугьуз ваъ, и кIвалах жезвайди я мадни абуруз чпиз чеб гьиниздатIа чин тийидайла, кIвалах, кар авачирла, сада сад масса къачун акурла, къуват гвайбуру чпиз кIандайвал ийиз акурла.

Вилаятдин МВДдин гьакиматдин малуматрив кьурвал, Дагъустанда чеб къалур тийиз 200 кас ава, яракь гвай къанундик квачир кIваталрик квай («незаконных вооруженных формирований»). Гьа гьакьванбу исятда ава Сирияда террористрин пата дяве тухуз.

 

Чи республикада 30 сайт кьван ава, экстремизмадин патахъ эверзавайбуруз ухшар тир. Исятда гьахьтин сайтрин кIватIал ракъурнава республикадин прокуратурадиз.

Магьамед Абдуллаев

ЛММФДАдин корреспондентри кIватIал

.

.