ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Сергьятар гегьеншарзава

Дагъустандин Кьили Кеферпатан Кавказдин СМИ-рин II Форумда иштираквал авуна

5-декабрдиз Дагъустандин Кьил Рамазан Абдулатипов Кеферпатан Кавказдин СМИ-рин II Форумда иштирак авун патал Пятигорскдиз атана. СКФО-дин регионрин руководителар тир Рашид Темрезовахъ, Таймураз Мамсуровахъ, Владимир Владимировахъ ва Юнус-Бек Евкуровахъ галаз санал Рамазан Абдулатипов форумдал къалурзавай экспозицийриз килигна.

Къейд авун лазим я хьи, форумдин сергьятра аваз округдин вири субъектар регионрин СМИ-рин тарихдин асул дережаяр ва алай макъамда медиахиле чпи къазанмишнавай кьилин агалкьунар къалуриз чалишмиш хьана. Санлай къачурла, форумдал СКФО-дин регионрин кьадардиз килигайвал, выставкадин 7 зона, 400 кв.метрдин чка чара авунвай.

Дагъустандин делегациядин медийный майдандал республикадин неинки печатдин, электронный СМИ-рихъ ва интернет-изданийрихъ галаз, гьакIни Дербентдин 2000 йисан юбилей къейд авуниз талукь проект кьилиз акъудзавай гьалдихъ галаз таниш жедай мумкинвал авай. Регионрин кьилериз Россиядин виридалайни къадим шегьердиз талукьарнавай фильмаяр къалурна. Экспозициядиз килигзавайбуруз Нарын-къаладин патав виртуальный шикилар ядай мумкинвални гана.

СКФО-дин субъектрин руководителрин фикир "Дагъустан” РИА-дин проектдини желбна. Ада махсус технологийрин куьмекдалди Дербентда виртуальный сиясат ийидай мумкинвал гузва. И проектдиз Россиядин Гьукуматдин Председателдин заместитель Александр Хлопонина ва СКФО-да РФ-дин Президентдин патай тамам ихтиярар ганвай Векил Сергей Меликова иллаки еке итиж авуна. Абуру выставкада республикади теклифнавай медийный инновацийриз виниз тир къимет гана.

Форум тешкилнавайбуру къейд авурвал, алай йисуз Дагъустан Республикадиз вири Россия патал лишанлу вакъиадихъ - Дербентдин 2000 йисан юбилейдихъ галаз алакъалу яз кьетIен фикир гузва. Кавказдин алай аямдин политикадин "Кавказ” центрадин директор Игорь Сопова къейд авурвал, Кеферпатан Кавказдин СМИ-рин  форумди вичин сергьятар ва тематика хейлин гегьеншарна.

* * *

Ахпа Кеферпатан Кавказдин СМИ-рин II Форумдин сергьятра аваз кар алай серенжем - "Кеферпатан Кавказ: гьакъикъат ва ам СМИ-ра ачухарун” лишандик кваз пленарный заседание кьиле фена.
Адан кIвалахда РФ-дин Гьукуматдин вице-премьер Александр Хлопонина, СКФО-да РФ-дин Президентдин патай тамам ихтиярар ганвай Векил Сергей Меликова, Россиядин Минкавказдин кьил Лев Кузнецова, округдик квай регионрин руководителри, "Кеферпатан Кавказдин курортар” ОАО-дин гендиректор Сергей Верещагина, федеральный ва регионрин СМИ-рин векилри иштиракна. Грозный шегьерда кьиле фейи бедбахтвилин вакъиайрихъ галаз алакъалу яз заседание Чечен Республикадин меркезда телеф хьайи къанун-къайда хуьдай органрин къуллугъчияр рикIел хуьн яз са декьикьадин кисна акъвазунилай башламиш хьана.

Мярекат ачухай Александр Хлопонина къейд авурвал, террористри Грозныйдин Печатдин кIвал гьужумдай чка яз хкягъуни массовый информациядин такьатрихъ еке къуват хьанвайдан гьакъиндай шагьидвалзава. А.Хлопонина малумарайвал, алатай йисуз регионрин СМИ-рин кIвалах аквадайвал дегиш хьанва, абуру Кавказда кьиле физвай вакъиайрикай делилар фикир желбдай жуьреда гуз башламишнава.

Сергей Меликова вичин рахунра властдиз ихтибар авунин темадал фикир желбна. Адан гьисабралди, им информационный хиле кар кьетI ийидай роль къугъвазвай лап важиблу месэла я.

"ЦIийи передачаяр туькIуьрун тIимил я, информационный майдан цIийи хъувун герек я. Идани гражданрини государстводи мадни сихдаказ санал кIвалахдай мумкинвал гудай. Власть мадни ачухди хьун герек я. Ша чна чаз ихтибар ийиз жедайди инсанриз къалурин. Вичин Чарче уьлкведин Президентди СМИ-яр бинеламиш хьун лазим тир принципар раижна: журналистар неинки къуллугъчияр, сифте нубатда жуван уьлкведин ватандашар хьун лазим я”, - малумарна Сергей Меликова.

Адан гафаралди, Кеферпатан Кавказда миллетрин арада авай алакъайриз талукь месэлаяр авач. И ва я маса дережада хцибур хьун мумкин тир кьилдин месэлаяр ава. Абурни округдин субъектра, гьам санлай уьлкведа гьялзава.

Полпреддин фикирдалди, журналистрилай кар бажармишиз алакьунин месэлани важиблуди я: "Гьар са кас тайин тир тематикадал машгъул хьун герек я: садаз спортдин месэлаяр хъсандиз чида, сад политикадин месэлайрай гужлу я, масадахъ регионда кьиле физвай вакъиайриз таъсирзавай къецепатан политический факторриз къимет гудай бажарагъ ава”.

Кеферпатан Кавказдин крарин рекьяй министерстводин кьил Лев Кузнецова, кIватI хьанвайбурухъ элкъвена, лагьана: "Кавказдиз атуни заз ина кьиле физвай вакъиайриз масакIа къимет гудай мумкинвал яратмишна. Зи гьисабрай, СМИ-ра Кавказ гзаф терефрихъай къалурун, адан гьам агалкьунар, гьамни гьялиз тахьанвай месэлаяр раиж авун герек я. Им лап важиблу кар я”.
Пленарный заседанидал СКФО-дин субъектрин кьилер ва региондин векилар рахана. Кьилди къачуртIа, Рамазан Абдулатипова ихьтин форум тухунин теклиф гунай РФ-дин Гьукуматдин вице-премьердиз, гьакIни тешкиллувилин серенжемар кьабулунай СКФО-да РФ-дин Президентдин патай тамам ихтиярар ганвай Векил Сергей Меликоваз ва адан заместитель Михаил Ведерниковаз сагърай лагьана.

Республикадин Кьили СМИ-рин рекьяй вилик акъваззавай хци месэлаяр санал веревирд авун ва санал гьялун патал мадни мукьвал-мукьвал кIватI хьанайтIа хъсан тирди къейдна. 

Эхирдай Дагъустандин Кьили республикада хъсан журналистар гзаф авайди, и карни СМИ-рин жуьреба-жуьре мярекатар кьиле тухудайла субут жезвайди къейдна.

Лезги Газет

.