Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Дуьньядин культурайрин, динрин тарихдин музей Дербентда ачухна

20-декабрдиз Дагъустандин Кьил Рамазан Абдулатипова Дербентда дуьньядин культурайрин, динрин тарихдин музей ачухунин шадвилин мярекатда иштиракна, хабар гана РД-дин Кьилин ва Гьукуматдин Администрациядин къуллугъдин ва информациядин управленидай.

Къейд авун лазим я хьи, Дагъустан вилик тухунин кар алай "Инсанвилин капитал” проектдин сергьятра аваз и надир жуьредин музей тешкилунин теклиф Рамазан Абдулатипова вичи гайиди я. Культурадин цIийи идара классический музейдин чешнедиз, гьа са вахтунда илимдин, просвещенидин къадим Дербентдин чилел агъзур йисаралди яшамиш жезвай жуьреба-жуьре миллетрин ва жуьреба-жуьре динрал амалзавай ксарин хейлин несилрин культурадинни тарихдин девлетлу ирс пропаганда ийидай мескендиз элкъуьн лазим я.

Музейди, дагъвийрин материальный ва руьгьдин культура вилив хуьналди Дагъустандин тарихда кIватIнавай дуьньядин динрин тарих умумиламишун, Дагъустандин халкьарин культураяр сад-садахъ галаз алакъада авайди, абур пайгардаказ вилик физвайди къалурун лазим я. Музейдин кьилин везифаяр Дербентдин, Дагъустандин, Россиядин, вири дуьньядин динрин культурадин ва искусстводин тарихдиз талукьарнавай документрин, шейэрин надир кIватIал арадал гъуникай, динрин культурайрин международный культурный центр ва илимдин лаборатория тешкилуникай ибарат я.

Шадвилин мярекат ачухай республикадин Кьили Дербент гьамиша жуьреба-жуьре цивилизацийрин центр яз хьайиди рикIел хкана. Ида мад сеферда тестикьарзавайвал, Дагъустан дуьньяда культурадин жигьетдай кьиле физвай гьерекатривай къерехда хьанач, идаз къаншар яз, ам гзаф вахтара гьа ихьтин гьерекатрин юкьва хьана: "Дербент - им культурадин ва руьгьдин лап зурба къуват санал кIватIнавай чка я. Россиядин Федерациядин мулкарал тарихда сифте яз чувудрин, хашпара динар ва ислам Дербентдай яна атайди я. Дербент - им вири культураяр ва цивилизацияр сад-садал гьалтзавай чка я”. Р.Абдулатипова къейд авурвал, ихьтин музей тешкилунин мурад дуьньядин вири динар са майдандал агудиз чалишмиш хьуникай ибарат я.

"Музей ачухунин кIвалах Дербентдин кьве агъзур йисан сувар къейд авунин сергьятра аваз кьиле физва.
Дагъустандин мусурманрин Духовный управленидин председателдин заместитель Агьмад Гьажи Кахаева кIватI хьанвайбуруз республикадин культурадин уьмуьрда хьанвай и вакъиа мубаракна, ачухзавай музейдихъ миллетрин ва жуьреба-жуьре динрал амалзавайбурун арада меслятвал мягькемарун патал кьетIен метлеб авайди къейдна: "Чна сада-садакай гзаф чирвилер къачудайвал, Халикьди чун жуьреба-жуьре халкьар яз халкьна. И центради чи халкьар сад-садав агудунин карда еке роль къугъвазва”.

Вичин рахунра Дербентдин Покровский килисадин настоятель отец Николая къадим Дербентдин, Дагъустандин накьварал жуьреба-жуьре миллетрин векилар ва жуьреба-жуьре динрал амалзавай ксар ислягьвилелди, сад-садан гъавурда акьуналди яшамиш жезвайди разивилелди къейдна.

Дербентдин мэр Имам Яралиева цIийи музей шегьердин гьакъикъи дувулар ва къамат лишанламишзавай кьетIен жуьредин мескенрикай сад тирди къейдна: "Дербентдин тIвар пак ктабра кьазва, адахъ къадим тарих ава, и карни материальный памятникри тестикьарзава. Музей ачухун - им чна вирида чи гьакъикъи бинеяр аннамишунин карда анжах сифтегьан кам къачун я; чун вири сад я, чи виридан кьилел алайди са Халикь я, чна чи хизанриз, шегьерриз, республикадиз ва уьлкведиз къуллугъзава”. Шегьердин кьили музей тешкилунин карда иштирак авур вирибурун тIварцIихъ разивилин келимаяр лагьана.

Къейд авун лазим я хьи, цIийиз ачухзавай культурадин идарадин амадагар яз майдандиз дуьньядин динрин музей (Санкт-Петербург), РАН-дин ДНЦ-дин тарихдин, археологиядин ва этнографиядин институт, Дагъустандин А.Тахо-Годидин тIварунихъ галай государстводин сад авунвай тарихдинни архитектурадин музей, Дагъустандин П.Гьамзатовадин тIварунихъ галай государстводин изобразительный искусствойрин музей, Дербентдин государстводин тарихдинни архитектурадин ва художественный музей -заповедник, халкьарин дуствилин музей (Махачкъала), Дербентдин администрация, Дагъустандин мусурманрин духовный управление, мискIинар, килисаяр, соборар, республикадин синагогаяр экъечIна.

Музейдин гегьенш экспозицияди дуьньядин вири динар, гьакIни жуьреба-жуьре халкьарин яшайиш меденият раижзава.

Экспорантрихъ галаз таниш жедай чIавуз Рамазан Абдулатипова музейдин къаюмвилин совет тешкилун чарасуз тирди къейдна. Аник вири динрин векилар, илимдинни культурадин гьуьндуьр дережадин деятелар кутаз жедай.

.

Лезги Газет

.

Мумкин я ваз килигиз кIан хьун:

Анатолий Къарибоваз “Дагъустан Республикадин вилик лайихлувилерай” орден ганва. Мубаракрай!

Дербент - пуд диндин шегьер

Дагъустандин намусдин азадвилинни, динрин тешкилатрихъ галаз кIвалах тухунин рекьяй Комитетдин коллегия кьиле фена

Гьикьван гзаф чIалар чир хьайитIа, гьакьван чун Гафунин деринра гьахьзава...

Сергьятар гегьеншарзава

Къейдер (0)