Мамед Абасов: "Терроризмдиз акси яз къуватар сад ийин"
Хел: 
15-февралдиз Дагъустанда, Дербент райондин кеферпата авай Жемикентдин постунин патав чандилай гъил къачунвай са касди машин хъиткьинарна. Нетижада кьве полицейский телеф хьана.
Им алай хъуьтIуьз хьайи ихьтин жуьредин кьвед лагьай дуьшуьш я. Сифте нубатда заз чпин къуллугъдин везифаяр тамамардайла — шак физвай машин ахтармишдайла телеф хьайи ДПС-дин къуллугъчияр тир Д.Фатахован ва Ю.Вяткинан багърийриз, мукьва-кьилийриз башсагълугъвал гуз кIанзава.
Квехъ галаз санал чи садвал таъминарзавай полициядин къуллугъчияр гзаф дуьшуьшра террористрин къурбандар жезва. И тахсиркарвилин гьерекат кьиле тухунай жавабдарвал террориствилин организация тир ИГИЛ-ди вичин хивез къачунва. Кеферпатан Кавказда авай бандитрин кьилди-кьилдин са жерге дестейрини чеб а тешкилатдиз вафалу тирди къалурзава.
Полицияди ва махсус къуллугъри гьикьван еке чалишмишвилер ийизватIани, чавай чи уьлкведин территорияда мусибатдин завал тир терроризмдал гьелелиг эхир эцигиз хьанвач. Террориствилин ихьтин гьерекатри ният къени вири инсанрин патай анжах ажугълувал, нифрет арадал гъизвайди я.
За умуд кутазвайвал, Дагъустандин агьалияр мадни гзаф тупламиш жеда ва саналди тир чалишмишвилералди чалай чи республика террористрикай михьи ийиз ва чи чилел мягькем гьалар ва хатасузвал таъминариз алакьда.
Дайджест
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Яран сувар кефер патан меркезда
Джемикентда хьайи терактдикай азабар хьайибурузни кьейибурун хизанриз гьукуматди куьмекда
Къейд эцигун