Террордиз "ВАЪ" лугьузва!
Хел: 
Алай йисан 14-ноябрдин йифиз Франциядин кьилин шегьер тир Парижда кьиле фейи террордин вакъиайри вири дуьнья къарсурна. Кьвед лагьай дуьньядин дяведилай кьулухъ Франциядин кьилел им тахьана ихьтин мусибат атайди тушир. ИГИЛ-дин гъилибанри а юкъуз шегьердин са шумуд чкадал ивияр экъична. Bataclan концертдин залда абуру гзаф инсанар есирда кьуна.
Идалай гъейри Шарон ва Вольтер бульварра, гьакIни Фонтен-о-Руа ва Алибер куьчейрани динж агьалийриз гуьлле гана, ивияр авадарна. Франциядин ва Германиядин командаяр футбол къугъвазвай Stade de France стадиондин патавни хъиткьинагар падна. Стадионда инсанар кичIела футбол къугъвазвай майдандал кIватI хьана, садбур кьил туькIвей патахъ катна. Са гафуналди, террористри агъзурралди инсанрин чанда кичI туна.
Динж агьалийрин кьилел ихьтин мусибат гъайи ирид террористдикай ругуда юкьва хъиткьинагар аваз чеб падна, сад полицияди яна кьена. Эхиримжи делилрив кьадайвал, террордин нетижада 129 инсан кьена, 350 касдал залан хирер хьана. И вакъиайрихъ авсиятда Франциядин Президент Франсуа Олланда уьлкведа акьалтIай гьал малумарна.
Гила дуьньядин гзаф гьукуматрин чIехибур террористрихъ галаз санал женг чIугуна кIанзавайдан, сифте яз и месэла къарагъарай Россиядин Президент В.Путин гьахълу тирдан гъавурда акьунва. И гьукуматар Сирияда ИГИЛ санал кукIвариз гьазур жезва. Францияди вичин Евросоюздик квай амадагривай военный рекьяй куьмек тIалабнава ва террористрихъ галаз женгерик кьил кутунва.
Алай йисан 15-16-ноябрдиз Туьркиядин Анталия шегьерда кьиле фейи «ЧIехи къадан» (G 20) мярекатдал вири гьукуматрин чIехибуру террордиз лянет авуна ва къуватар санал кIватIна и бала арадай акъудун герек тирди къейд авуна. Им гьисятда вири дуьньядин вилик акъвазнавай сад лагьай везифа я. И везифа кьилиз акъудун патал геждал вегьин тавуна герек тир тедбирар авуна кIанзава.
Чпин кар-кеспидал алай динж агьалийрин ивияр экъичзавай къаддар террористрин аксина вири дуьньяди женг чIугуна кIанзава. ТахьайтIа и чIулав кIуватри маса уьлквейрални вегьеда. Ахпа и баладин вилик пад кьан генани четин жеда. Исятда гзаф уьлквейрин вилик-кьилик квай инсанри террористрихъ галаз женгиниз гьа сад хьиз эвер гузва: «Терроризм чIехи бала я, адан вилик пад кьуна кIанзава! Чаз къиргъинар ваъ, ислягьвал кIан я!» Гьакъикъатдани, дявейрикайни террордин вакъиайрикай инсанрин чан туьтуьниз атанва. Вири уьлквейрин динж агьалийриз анжах ислягьвал кIан я. Ислягьвал ва мад гъилера ислягьвал!
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Дуьньядин культурайрин, динрин тарихдин музей Дербентда ачухна
Къейд эцигун