Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Лезги мектеб Москвадин юкьва

 

8-й ноябрдиз Лезги миллетдинни медениятдин федерациядин дережадин автономиядин идарада лезги мектеб ахъай хьана. Автономиядин цIийи къастунин къалурун ийидайвал къведай кIелдайбуруз, гьабурун диде-бубайриз, дустариз-мугьманриз эверна.

Мектеб ахъаюнин къаст фадлай авайди тир, амма арадал гъиз четинзавай. ГьикI хьайитIани, эхирни ЛММФДАдин чIехибуру къаст кьабулна, цIийи кьилдин кIвал туькIуьрна жуьреба-жуьре тарсар тухудайвал. Ина аялриз кхьидай кьулни («доска») ава, чIехи экран эцигнава. КIвалин са пипIе яваш-яваш лезги музей туькIуьрзава, исятда инал къапар, кварар, тIурар, масса затIар эцигнава, килигайла хуш жедайвал.

Мектебдин чIехиди язва ЛММФДАдин медениятдинни кIелунрин къастарин хелин («департамент») кьил Абидат Эюбова. КIелунрин кIатIалдик квазва хайи чIални эдебият, лезги адетарни меденият, тарих.

Мярекат ЛММФДАдин чIехидан куьмекхъан Амиль Саркарова ахъайна. Ада вири тешкилатдин маджлисдин патай атайбуруз сагърай лагьана, агалкьунрихъ агакьун тIалабна, тешкилатдикай квай вирибуруз меркездавай лезгияр джемятдин уьмуьрдик дериндаказ акахьунин умуд авайди лагьана. Мадни Саркарова хайи чIаланни медениятдин мектеб хайи дигедилай яргъа патара, масса миллетрин арада  вичи вич хуьнин рекье сад лагьай кам тирди къейдна.

Мектеб ахъаюниз Лезги автономиядин дуст, Масквадин талышрин миллетдинни медениятдин автономиядин чIехиди Адиль Насировни атанвай, гьада вичин патайни гаф лагьана. Ада виридаз мадни еке дережайрихъ агакьун тIалабна, Лезги автономиядиз пара сагърай лагьана. «Ихьтин кIвалахар ийиз четин ятIани, эхирни ам кьилиз акъудуни къалурзава, гьикьван гзаф зегьмет чIугунватIа», - лагьана Насирова.

Идалай кьулухъ гаф Абидат Эюбовади къачуна. Ада цIийи мектебди гьикI квалахдатIа, гьи йикъара тарсар фидатIа, абур квекай жедатIа, ахъайна.

Ахпа ЛММФДАдин исполкомдин чIехида Гусен Шахпазова кIватI хьайибуруз лезги халкьдин тарихдикайни медениятдикай, тIвар-ван авай лезгийрикай куьруьдаказ ахъайна.

Эхир кьиляй Абидат Эюбовади мектебди кIвалахдай сятерикайни маса акъвазнавай суалрикай лагьана. Тарсар физва гьар кишни гьяд юкъуз сятдин цIикьведалай пудал кьван Лезги автономиядин кьилин идарада физва.
 
Ам авай чка язва Масква,Старая Басманная куьче, кIвал I9, пай I2, 3-й мертеба.

Мурад Шихахмедов

.

Корреспондентский корпус ФЛНКА

Мумкин я ваз килигиз кIан хьун:

Амазма лезгияр Нева вацIал

Ярославлдин лезгийри къуват къачузва

ЦIийи йисан мярекат лезги къайдада

Дагъустан цIийи хъувур кас

«Сулейманан вахт къвезва…»

Къейдер (0)