Вири дуьньядиз чир хьана
Хел: 
Алай йисан 12-28-июндиз Бакуда I Европадин Къугъунар кьиле фена. Чи уьлкведин, гьакIни къецепатан уьлквейрин газетри кхьизвайвал, Азербайжанди и мярекат гзаф тешкиллувилелди арадал гъана. Гьам спортсменар, гьамни туристар Къугъунар тешкил авунал, Бакудал, чи республикадин агьалийрин мугьманпересвилел гьейран хьана.
I Европадин Къугъунрин вахтунда вири дуьньядиз сейли хьайи Азербайжандиз 50 уьлкведай 6000-далай гзаф спортсменар атана. Абуру спортдин 20 хиляй гьуьжетарна. И къугъунра 164 медаль къачур Россиядин командади 50 уьлкведин арада сад лагьай, Азербайжандин командади кьвед лагьай чка кьуна. Им лугьуз тежедай кьван чIехи агалкьун я. Чи уьлкведин спортсменри 21 къизил, 15 гимиш ва 20 буьруьнж медаль, санлай 56 медаль къачуна. Абурукай Расул Жунаеван, Илгьам Закиеван, Фирдовси Ферзалиеван, Рафаэл Агъаеван, Тогърул Аскерован, Мария Стадникан ва масабурун агалкьунар иллаки рикIел аламукьдайбур хьана.
Азербайжандин командада азербайжанвийрихъ галаз санал маса миллетрин векилри, гьабурукай яз лезги спортсменрини гъалибвал патал женг чIугвазвай. Абурукай боксдай къизил медаль къачур Алберт Селимов, таеквондодай сад лагьай чка кьур Абдурагьим (Радик) Исаев, гимиш медаль къачур Фарида Азизова, самбодай гимиш медаль къачур Васиф Сефербегов, вич буьруьнж медалдиз лайихлу хьайи парадзюдоист Закир Мислимов къугъунриз килигзавайбурун рикIел хъсандиз аламукьна.
КцIарви тават Фарида Азизовади виликан йисара Европадин ва дуьньядин чемпионвилин тIварар къачунай. Вичин тIвар «Самур» газетдин кIелзавайбуруз гила чир хьайи Абдурагьим (Радик) 1990-йисуз Дагъустандин Ахцегь райондин Ухул хуьре дидедиз хьана. Ам Азербайжандин командадик кваз пуд йис я.
Дуьньядин уьлквейрин газетри кхьизвайвал, Олимпиядин Къугъунар лагьайла гьикI Греция рикIел хквезватIа, инлай кьулухъ Европадин Къугъунар лагьайлани Азербайжан рикIел хкведа. Къецепатан уьлквейрай атай вири пешекарри Къугъунар тешкилунай чи республикадиз разивал къалурна. И рекьяй Азербайжан Республикадин Президент Илгьам Алиева, Европадин Къугъунрин Тешкилат Комитетдин седри Мегьрибан Алиевади чIугур зегьметар иллаки чIехиди я.
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Россиядин чIехи гражданин кьена
Лезги Газет: Европарламентда - лезгийрин месэла
Къейд эцигун