Ахцегь райондин хипер хъуьтIуьн къишлахрал куьчарна
Хел: 
Малум тирвал, алай вахтунда Дагъустанда
4,5 миллиондив агакьна куьлуь карч алай гьайванар ава. Абурукай гъилевай зулуз
1 миллионни 700 агъзурдав агакьна лапагар гатун яйлахрай хъуьтIуьн къишлахриз
куьчарзава.
Росстатистикадин 1-октябрдин делилралди, Ахцегь райондин вири жуьре майишатра санлай 105 агъзур лапаг ва 20 агъзурдав агакьна къарамалар (абурукай 10 агъзур - ацазвай калер) хуьзва.
19-ноябрдиз Гъурун кIамалай Чеперин хуьруьн Фатахован тIварунихъ галай ва "Хизан” СПК-рин кьуд "КамАЗ-да” авай хипер Кочубей зонадин хъуьтIуьн къишлахрал рекье хтуналди Ахцегь районада цIи хипер куьчарунин кампания бегьем хьана.
Машинриз хипер язавай чкадал чун райондин ветеринарный управленидин начальник Вагьидин АБДУЛГЬАЛИМОВАХЪ ва кьилин духтур Зиядхан КЕРИМОВАХЪ галаз фена.
- Гьакъикъатдани, гьайванар куьчарзавай вахт хипехъанар ва ветеринарный къуллугъчир патал виридалайни жавабдар ва четинди я. ЦIи иллаки хиперин, цIегьерин азар пайда хьуникди чна вахтунда вири гьайванрин гьал ахтармишна ва хаталу азарин вилик пад кьадай серенжемар кьиле тухвана: садакай-садак акатдай сибирдин язва, ящур, бруцеллёз, ШТАМ-82 азаррикай хуьдай рапар яна; ккIламрикайни (клещ) нет-чIутдикай михьдай ваннаяр тешкилна. Ахпа, 3-ноябрдилай 19-ноябрдалди 30 агъзур лапаг ва 600 къарамал Кочубейдин ва 40 агъзурдив агакьна гьайванар Дербентдин зонадин къишлахрал рекье туна. Гьа са вахтунда чи гуьзчивилик кваз къишлахра ятахарни чубанрин кIвалер дезинфекция авунва, чарасуз кьадар алафар гьазурнава. Шазан йисав гекъигайла, цIи гатуз кьурагьвилер хьуникди чуьлда хъсан векь авач. Гила зулун марфарикди, умудлу я, къаз ахкьалтда, -лагьана Вагьидин Нейфеловича.
- Чи бригадада 900 гьайван ава, - шикаятдин тегьерда башламишна чпин ихтилат "Фатахован” СПК-дин (председатель Аким РИЗАЕВ) хиперин бригададин бригадир Араз АДИЛХАНОВАНИ адан чубан Ибрет ГЬАЖИЕВА. - Намуслу зегьметдин нетижада цIи абурукай чна 120 % сагълам дул къачуна. Амма чубандин кIвалах пара четинди я ва эхиримжи йисара, лугьурвал, хам табагъуникни квач. Вучиз лагьайтIа, сарин кило 15 манатдай маса гузва, хамар гадарзава, нек саки ахцазмач. Къазанжи алверчийривни арачийрив ужуздаказ вахкуниз мажбур жезва.
Гьакъисуздаказ раб-риб язавай са ветеринариядин къуллугъдилай ва гьар са диде
хипен кьилиз йиса гузвай 110 манатдилай гъейри, гьукуматдин патай мад са
жуьрединни куьмекар чаз авач. Гьич тахьайтIа сарин рабатвал ийиз хьанайтIа ажеб
тир...
Хъсан чилер авай Кочубейдин зонадилай артух райондин майишатрин гьайванар цIи Дербент райондин Сыртычдин къишлахрал куьчарунин себеб вуч я лагьай суалдиз ингье райондин ветуправленидин начальникдин жаваб:
- Куьрелди лагьайтIа, кьилин себеб рекьерин харжара ава. ИкI, къе 4 "КамАЗ” рекье тун "Фатахован” ва "Хизан” СПК-риз 140 агъзур манатдай (гьар са машин - 35 агъзур манат) акъвазнава. Ва эхиримжи кьве йисан рекьерин гьакъи гьукуматди эвез хъувунвач. Кьвед лагьайди, дугъри я, Кочубейдин къишлахрин ери Сыртычдинбурулай гьайванар патал хъсан ятIани, чубанризни абурун хизанриз тешкилнавай яшайишдин шартIар къулайбур туш. Чилерин иесийриз гьайванрин кьадардилай 10 процент чилин гьакъи гузватIани (чилин налог гьа Кочубейдани артух хьанва), патав гвай Дербент райондин зонада кьуьд акъудиз регьят я.
Дашдемир Шерифалиев
Лезги Газет, N 48 (10693) хемис 26-ноябрь, 2015-йис
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Шалбуздагъдин макьамарни везинар
Лезги хуьрер цIийи рекьералди сад ийида
Къейд эцигун