Лезги театрдин 80 йисан чIехи юбилей
Хел: 
24-декабрдиз Дербентда Гьукуматдин Стlал Сулейманан тlварунихъ галай Лезги муздрамтеатрдин юбилей къейдна.
И чlехи шадвилерик Дагъустан Республикадин Гьукуматдин Председателдин Сад лагьай заместитель Анатолий Къарибова, Кьиблепатан территориальный округда РД-дин Кьилин патай тамам ихтиярар ганвай векил Али Хасбулатова, Дагъустан Республикадин культурадин министр Зарема Бутаевади, Дербент шегьердин кьил Малик Баглиева, Сулейман-Стальский райондин кьил Нариман Абдулмуталибова, Хив, Кьурагь, Докъузпара, Ахцегь районрин администрацийрин векилри, Бакудай атанвай писатель Музаффер Меликмамедова, Дагъустандин театральный искусстводин машгьур деятелри, шаирри, писателри, шегьердин бюджетдин идарайрин регьберри иштиракна.
Мярекатда иштиракиз атанвай мугьманар зуьрнечийрини театрдин директор Алибег Мусаева, кьилин режиссер Мирзабег Мирзабегова къаршиламишна.
Мярекат башламишдалди мугьманри театрдин дараматдин вилик квай багъда авай Дагъустандин халкьдин шаир Стlал Сулейманан гуьмбетдал цуьквер эцигна. Зуьрнейрин авазрикди вири залдиз хтайла, сегьнедиз Анатолий Къарибов хкаж хьана. Тамашачийрихъ ва театрдин актеррихъ элкъвена, ада лагьана: "Лезгийрин театрди вич сад лагьай драматург, коллективдин руководитель хьайи ахцегьви Идрис Шамхалова Ахцегьа тешкилай театрдин кружокдилай бине къачуна. Гьанлай инихъ Гьукуматдин Стlал Сулейманан тlварунихъ галай Лезгийрин муздрамтеатрди лезги ва маса халкьарин тарихдинни культурадин ирс хуьнин карда къайгъударвилелди зегьмет чlугвазва.
Ватандин Чlехи дяведин йисарани ада фронт патал, гъалибвал патал кlвалахна, яратмишунрин коллективриз, оборонадин фондуниз куьмекарна. 1948-йисуз Лезгийрин театр Ахцегьай Дербентдиз хкана. А вахтарилай инихъ актерринни режиссеррин са шумуд несилар дегиш хьанва.
Абурун арадай А.Къарибова РСФСР-дин халкьдин артистар Мурадхан Къухмазован, Шамси-жагьан Къухмазовадин, Россиядин Федерациядин лайихлу артист Абдулкъадир Сайдумован, РД-дин халкьдин артистар Сефербег Агъабалаеван, Эмиркъули Эмиржанован, Садедин Велиханован, Къумбай Рамазанован, РД-дин лайихлу артистар тир Зуьгьре Рамазановадин, Халисат Буржалиевадин ва Зулейха Давудовадин тlварар кьуна.
— Театрдин тарихда РФ-дин лайихлу артист Багъиш Айдаева режиссервал авур йисар виридалайни бегьерлубур хьана. А йисара театрдин репертуарда дуьньядин ва урус классикрин пьесайри важиблу чка кьазвай: ("Женитьба” Гоголан, "Скупой” ва "Проделки Скапена” Ж-Б.Мольеран, "Намус” А.Ширванзадедин, "Коварство и любовь” Ф.Шиллеран, "Ашукь Къариб” З.Гьажибегован). Къе Лезгийрин театрдин коллективдивай жуьреба-жуьре жанрайрин репертуар тамашачийрин вилик гъиз жезва, гьа жигьетдай аялар патални. Яратмишунрин межлисар тухун, актерар жегьилрихъ ва хуьрерин тамашачийрихъ галаз гуьруьшмиш хьун театрдин хъсан адетдиз элкъвенва. Театрда чи уьлкведин лап хъсан вузар акьалтlарнавай актерар кlватl хьанва. Абуру тамашачийрин патай чlехи авторитет ва гьуьрмет къазанмишнава, — давамарна А.Къарибова.
Ада гьакlни театрдин коллективдиз РД-дин Кьил Рамазан Абдулатипова ракъурнавай Тебрикдин чарни раиж авуна. Кьилди къачуртlа, ана Лезги театрдикай лезги халкьдин театральный искусство вилик тухузвай центр ва театрдин классикадин пропагандист хьанвайди къейднавай.
Трибунадихъ экъечlай Зарема Бутаевади театрдин вири коллективдиз юбилей мубарак авуналди, цlийи кукlушрихъ хкаж хьун, яратмишунрин проектар, хъсан гастролар, гьакlни рикl чIехи ва гъавурда гьатдай тамашачияр хьун алхишна. "Лезгийрин театрдин коллективда гьам классикадин ва гьамни алай аямдин драматургиядихъ галаз кlвалахдай вичин адетар арадал атанва. 60-йисара бажарагълу режиссер Багъиш Айдаева эцигай "Къазимегьамед”, "Къалабулух квай гатфар” тамашаяр Дагъустандин театральный уьмуьрдин чIехи вакъиадиз элкъвенай, Къияс Межидован "Урусатдин цуьк” тамаша Москвада къалурнай ва ам СССР-дин Культурадин министерстводинни СССР-дин писателрин Союздин премийриз лайихлу хьанай. 1964 ва 1972- йисара театрдин коллектив театральный институтрин актеррин студияр акьалтlарна хтай артистралди артмиш, гьа икl театрдиз вилик фидай цlийи мумкинвилер ачух хьана.
Анал рахай Малик Баглиева театрдин коллективдиз юбилей тебрик авуналди, жегьилриз руьгьдинни ахлакьдин тербия гунин рекье театрди ва интеллигенцияди важиблу роль къугъвазвайди къейдна.
Сегьнедал РФ-дин халкьдин артист, РД-дин театррин деятелрин Союздин председатель Айгум Айгумов экъечlна: "Къе гуьзел Лезги театрдиз Гьукуматдин театр лагьай тIвар гана 80 йис хьанва. Театр — им жуван халкьдин гуьзгуь я. Театр чна гьамиша жуван алатай тарих рикlел хкизвай, гележегдикай хияларзавай жуван халкьдин кафедра я. Иниз килигна, ам кlан хьун, адаз къимет гун ва аниз тамашиз фин герек я”.
Кьиблепатан Дагъустандин районрин кьилерин ва вичин патай анал тебрикдин гафар Нариман Абдулмуталибов рахана:
— Гьуьрметлу дустар, актерар, мугьманар! Гьуьрметлу Алибег Штибегович ва амадагар, ихтияр це лезги халкьдин театрдин 110 йисан юбилей мубаракдай. Театрдин коллективди ва театрдал рикl алай лезги халкьди къе театр арадал атана 110 йисан, Гьукуматдин театр лагьана тlвар гана 80 йисан баркаллу юбилей яз къейдзава. Им чlехи тарих я. И тарихда театрдиз хъсанвилерни хьана, агалкьунарни, гьелбетда, четин вахтарни. Театр вилик финин тарих халкьдин тарихдихъ галаз сих алакъада ава. 110 йисан девирда театрдин устадри тамашачийриз халкьдин яшайиш, гьар са девирдин хъсанвилерни татугайвилер къалурзавай, руьгь кутадай тамашаяр — драмаяр, трагедияр, къемедаяр эцигна къалурзава. Вири вахтара театрди халкьдин гъил, муниципалитетрин куьмек гьисс авуна. Алай девир четинди хьанватlани, муниципалитетри театрдиз куьмекдин гъил яргъи ийидайдахъ зун инанмиш я. Квез чlехи юбилей мубаракрай! Яратмишунрин рекье квехъ зурба агалкьунар хьурай!
Вичин нубатдай, анал рахай Алибег Мусаева Дагъустандин центральный государственный архивди Лезгийрин театрдин тарихдин патахъай ганвай делилар авай справка раижна, ахпа театрдин яратмишунрин рекьин тарихдикай гегьенш доклад авуна.
Адани театрдин кьилин режиссер Мирзабег Мирзабегова театрдин юбилейдихъ галаз алакъалу шадвал пайиз атанвай виридаз рикlин сидкьидай сагърай лагьана.
Гьихьтин юбилей ва я сувар савкьатар галачиз жеда? Икl, РД-дин Кьилин Указдалди Дагъустандин гзаф миллетрин культура хуьник ва вилик тухуник чlехи пай кутунай ва гзаф йисара гьакъисагъвилелди зегьмет чlугунай Шейх-Абдуллагь Закарьяеваз "Дагъустан Республикадин халкьдин артист” лагьай Гьуьрметдин тlвар, Агъахан Агъахановаз Гьуьрметдин грамота гана.
РД-дин Культурадин министерстводин Гьуьрметдин грамотайриз Сейфуллагь Эмирбегов, Гьамзабег Эмиралиев, Руслан Мирзоев, Эльмира Мегьамедова, Амалия Керимова, Эльмира Къараханова, Замира Жарулаева ва Эсли Аливердиева лайихлу хьана.
Дербент шегьердин кьилин къарардалди гьуьрметдин грамотаяр Абдуллагь Гьабибоваз, Казбек Думаеваз ва Рагьман Къазиеваз гана.
Шад мярекат "Мамнунан чирагъ” (автор Абдуселим Исмаилов, режиссер Мирзабег Мирзабеков) цlийи тамаша къалуруналди акьалтlарна. Тамаша Дагъустандин зурба алим-тарихчи ва просветитель Алкьвадар Гьасан эфендидин уьмуьрдикайни яратмишунрикай я.
Лагьана кlанда, "Мамнунан чирагъ” тамашачийри лап хушдиз кьабулна.
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Шалбуздагъдин макьамарни везинар
Дербент - 2000. Вири къуватар желб ийин
Къейд эцигун