ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

Кьурагьиз шегьре рехъ ачухна

РД-дин Кьилин ва Гьукуматдин Администрациядин пресс-къуллугъдин ва информациядин управлениди хабар гузвайвал, 4-февралдиз республикадин метлеб авай Кьасумхуьр-Кьурагь шегьре рехъ шадвилин гьалара ачухна.

Рехъ ишлемишиз вахкун лишанламишзавай яру лент республикадин Кьил Рамазан Абдулатипова атIана.
Республикадин Кьилихъ галаз санал Кьурагь райондиз РД-дин Халкьдин Собранидин Председателдин заместитель Сейфулагь Исакьов, РД-дин Гьукуматдин Председателдин заместитель — РД-дин экономикадин ва территорияр вилик тухунин министр Раюдин Юсуфов, Кьиблепатан территориальный округда Дагъустан Республикадин Кьилин патай тамам ихтиярар ганвай векил Али Хасбулатов, РД-дин хуьруьн майишатдин министр Мусафенди Велимурадов, РД-дин рекьерин майишатдин Агентстводин руководитель Загьид Хучбаров ва маса официальный ксар мугьман хьанвай.

"Эхиримжи пуд йисуз республикада рекьер тухунин, ремонт авунин, цIийи хъувунин жигьетдай чIехи кIвалах кьилиз акъуднава. И мукьвара аэропортуниз кьван цIийи рехъ ачухнава. Ам Каспийскдай яна тухванва, ана лазим тир къайда тунва. Махачкъаладай Дербентдиз кьван физвай рекьин ери хъсанарнава. Дербент шегьердин вини кьиле авай туннелни къайдадиз гъанва. Вири и крариз чи Президент Владимир Путина ва Гьукуматдин Председатель Дмитрий Медведева хъсан къимет гана.
Чна чи районар аваданламишун, жуван адетар хуьн герек я. Районда гадарнавай хуьрер аваз хьунизни рехъ гана кIандач. Чна неинки рекьериз, гьакIни образование ва культура вилик тухунин месэлайризни фикир гузва”, — лагьана Рамазан Абдулатипова.

РД-дин рекьерин майишатдин Агентстводин кьил Загьид Хучбарова къейд авурвал, пуд йис идалай вилик уьлкведин автомобилрин рекьерин лап хъсан 10 майишатдин жергедик экечIунин везифа вилик эцигайди тир, чна и везифа кьилизни акъудна. З.Хучбарова цIийи рекьи райондиз хийир гана кIанзавайвилин хуш келимаяр лагьана.

Кьурагь райондин кьил Замир Азизова къад йис идалай вилик гъиле кьур рехъ тухвана куьтягьунин патахъай кIевивал авунай, Рамазан Абдулатиповаз, гьакIни Загьид Хучбароваз, рекьер туькIуьрай устIарриз сагърай лагьана.

Рекьерин майишатдин тафаватлу хьайи работникриз республикадин Кьилин тIварунихъай рикIел хуьдай сятер гана, ахпа рехъ ачухун яз шадвилин гьалара лент атIана, анай виридалайни вилик пар чIугвадай чIехи машинар ахмиш хьана, гьа икI рехъ ишлемишиз вахкана.

Мугьманвиле авай чIавуз Рамазан Абдулатипов Кьурагь райондин поликлиникадиз ва больницадизни фена. Санлай къачурла, ам и идараяр авай гьалдал рази яз амукьна, ада азарлуйрихъ, духтуррихъ галаз суьгьбетарна, дарманар бес жезвани, авачни ахтармишна, абур азарлуйриз гьакъисуздаказ гузватIани чирна.

Гуьгъуьнлай республикадин Кьил Кьурагьрин гзаф везифаяр тамамардай центрадиз килигна. И идарадин къуллугъчийри мугьманрин вири суалриз кьил-кьилел алай жавабар гана. Региондин Кьили МФЦ агьалийрин арада машгьур авуниз эвер гана: "Инсанриз гзаф везифаяр тамамардай центрайри, чиновникрихъ галаз алагъ-салагъда гьат тавуна, манийвилер галачиз са куьруь вахтунда герек тир документар къачудай мумкинвал гузвайди чир хьун герек я”, — къейдна ада.

Рамазан Абдулатипов КIирийрин хуьре бажарагъ авай аялар патал ачухнавай 320 ученикдиз чкаяр авай спортдин школа — интернатдизни фена. РикIел хкин, и идара республикадин руководителди 2013-йисан августдиз райондиз мугьманвилиз фейи чIавуз шадвилин гьалара ачухайди тир.

Республикадин тайин мурадрихъ элкъуьрнавай программадин сергьятра аваз эцигнавай и школади кьуд йисан девирда Кьиблепатан Дагъустандин вири пипIерай аялар кьабулна. Кьве мертебадин алай аямдин дараматда спортзал, столовой, 50 чкадин общежитие, майишатдин блок ава. Къвалав кьезил атлетикадал машгъул жедай майдан гва, идалай гъейри, дагъдин шартIара багъманчивал вилик тухудай мумкинвални ава.

Школа-интернатдин ученикри тешкилнавай Женгинин баркалладин пипIени РД-дин Кьилин фикир желбна. Аялрихъ галаз гуьруьшмиш хьайидалай гуьгъуьниз Рамазан Абдулатирова педколлективдиз, акьалтзавай несил тербияламишуниз, ам чи культурадал рикI алаз вердишаруниз гзаф фикир гуниз эверна.

Гуьгъуьнлай райондин администрацияда чкадин активдихъ галаз гуьруьшмиш хьайи чIавуз республикадин Кьили къейд авурвал, са тIимил вахтар идалай вилик газдиз талукь месэла гьялна, къе районда автомобилрин цIийи рехъни ачухнава. "Дагъустанда гьалар хъсанвилихъ дегиш жез пуд лагьай йис я.

Идалай вилик хейлин крар гъиляй вегьей гьалда авай. Сифте нубатда образованидикай ва здравоохраненидикай икI лугьун лазим я. Чина ЕГЭ гьикI тухузвайтIа, гьа кардин шагьидар куьнни я. Заз дагъустанвийрин къанажагъдив ихьтин келимаяр агакьариз кIанзава: "Чун виликдай яшамиш хьайивал, яшамиш хъхьана виже къведач. Им намусдик хкIун лагьай чIал я. Чна виликдай кIвалахай жуьреда кIвалах хъувуна виже къведач”, — къейдна региондин руководителди.
Рамазан Абдулатипова образованидин ери хкажунин барадай учебный заведенийрин вилик чIехи везифа акъвазнавайди рикIел хкана, здравоохраненидин идараяр авай гьалдикайни суьгьбетна. "Чна 22 кас кьилин духтурар дегишарна, гьеле 2012-йисуз республикада виниз тир технологийрал бинелу яз гьич са операцияни кьиле тухваначир, 2015-йисуз ахьтин 3 агъзур операция авуна. Чахъ начагъбур дуьзгуьндаказ сагъар хъувун патал вири шартIар ава”, — лагьана республикадин Кьили.

ГУП-рин кIвалахда къайда тунин, чилер менфятлудаказ ишлемишунин, субсидияр паюнин, малдарвал ва набататчивал вилик тухунин месэлайрал кьилди акъвазна.

Ахпа Рамазан Абдулатипов ва адахъ галай ксар Сулейман-Стальский райондин центрада алишверишдин са жерге объектриз килигна.

Вичин рахунра Рамазан Абдулатипова рекьер туькIуьруналди, хуьрерин районрин къурулушар вилик тухуналди, яшайишдин жигьетдай къулайвилер авуналди, государстводи халкьдин патахъай къайгъу чIугвазвайдал кIватI хьанвайбурун — хуьруьн агьалийрин, Кьурагь райондин администрациядин къуллугъчийрин, РД-дин рекьерин майишатдин агентстводин работникрин, райондин мугьманрин — фикир желбна.

"Уьмуьрда виридалайни кар алайди рехъ я, виридалайни кьилин рехъ лагьайтIа, кIвалихъ тухузвай рехъ я. Экономика, культура, инсанрин алакъаяр вилик тухун патал, са шакни алачиз, рекьи лап чIехи роль къугъвазва. Къе чна цIийи рехъ ачухзава. Лагьана кIанда хьи, им республикадин Гьукуматди къайгъударвал авунин, чи районрин центрайриз хъсан рекьер тухузвай, чаз виридаз акьван герек кIвалах бажармишзавай чи рекьерин майишатдин зегьметчийрин чалишмишвилерин нетижада мумкин хьанвай кар я”, — лагьана Рамазан Абдулатипова.

Дагъустан Республикадин Кьили рикIел хкайвал, Дагъустанда санлай къачурла, автомобилрин саки 23 агъзур километрдин рекьер ава. Абурукайни 5 агъзур километрдин рекьер федеральный, саки 15 агъзур километрдин рекьер чкадин метлеб авайбур я.

Лезги Газет

Дайджест