ЧIехи Гъалибвилин 70 йис Тркалрин хуьряй Берлиндиз кьван
Хел: 
Мирзоев Гьажи Керимович 1911-йисуз Тркалрин хуьре (Хив район) дидедиз хьана. Ам аялзамаз диде-бубадикай магьрум хьана ва кьил хуьн патал жегьилди Дербентда фяле яз жуьреба-жуьре кIвалахар тамамарна. Советрин гьукуматди ихьтин жегьилриз кьетIен фикир гузвай. КIвалахдивай къерех тахьана Гьажиди Дербент шегьердин рабфакдин нянин школани куьтягьна.
1932-йисуз Дагсовпартшкола агалкьунар аваз акьалтIарай Гь.Мирзоев Хив райисполкомдин военный инспекторвилиз рекье туна. И къуллугъдал ада 1939-йисалди кIвалахна ва гуьгъуьнлай ам Хив райвоенкомдин 2-отделдин начальниквиле тайинарна. Вагьшивилелди душманди Ватандал гьужумайла, Гь.Мирзоев гуьгьуьллудаказ фронтдиз фена. Ада 863-З ПВО-дин, 868-З ПВО-дин дивизийрин жергейра взводдин командир яз, Кавказдилай Берлиндиз кьван душманар терг ийиз, рекьер атIана. Четин, бедбахтвилерив ацIанвай дяведин рекьера Гьажи Мирзоева ва адахъ галаз женгера иштиракай аскерри еке гьунарар къалурнай...
Гь.Мирзоева дяведа къалурай игитвилин са вакъиадикай Расул Гьамзатова 1971-йисан апрелдин вацра акъатай "Дагъустандин правда” газетда икI кхьизва: "...Мирзоев Гьажи вичин частунихъ галаз санал Моздокдив агакьна. Ина душмандин гзаф кьадар яракьар, кудай шейэр, тупар, минаяр хуьзвай складар авай. И складар хъиткьинарунин ва душман яракьрикай магьрумна, абурал гъалибвал къачун чарасуз тир.
Штабдин начальник Петрова и важиблу кIвалах Гьажи Мирзоевал ва Валентин Кузьминал тапшурмишна.
Йиф гзаф мичIи, секинди тир. Гьажи, чилелай галчIур жез-жез, складдиз мукьва хьана. Душмандин складар хуьзвай къаравулди гагь вилик, гагь кьулухъ камар къачузвай. Гьажи лагьайтIа, автоматни гваз чилел алкIанвай ва ада къаравул секин хьун гуьзлемишзавай. Ингье а легьзе мукьва хьана: Гьажиди кьулухъай фена, автоматдин къундахдалди къаравулдин кьил яна. Ам гьасятда ярх хьана. Складдик хъиткьинардай минаяр, гранатар кутуна, дирибаш дагъви кьулухъ элкъвена. Са арадилай кьуд пад зурзана, мичIи йиф цIай кьуна кузвай шейэри, хъиткьинзавай яракьри ишигълаван авуна. Чи аскерри "Ура! Ура!” - лугьуз виликди гьерекатна. Тапшуругъ викIегьдаказ тамамарнай. Гьажиди ихьтин викIегьвилер гзаф авуна. Душман Ватандай чукурна, Европадин уьлквеярни фашистрикай азадна. Гъалибвал лагьайтIа, Берлинда къаршиламишна...”
Дяведа къалурай игитвилерай Гьажи Керимович Ватандин дяведин сад лагьай дережадин ордендиз, Жукован, Кавказ, Европа азад авунай, Германиядал гъалибвал къачунай ва ЧIехи Гъалибвилин вири медалриз лайихлу хьана. 1945-йисан 25-сентябрдиз ам хайи хуьруьз хтана. Ада Тркалрин III Интернационалдин тIварунихъ галай колхоздин председатель ва клубдин директор яз кIвалахнай.
.
Сайтдин халисан уртах хьун патал регистрация авун кIан я.
Мумкин я ваз килигиз кIан хьун:
Россиядин чIехи гражданин кьена
Къейд эцигун