Rus Eng Az Lz

ЛЕЗГИ МИЛЛЕТДИННИ МЕДЕНИЯТДИН
ФЕДЕРАЦИЯДИН ДЕРЕЖАДИН АВТОНОМИЯ

“Ахъа тир бюджет”

Махачкъала жемятдин финансар идара авунин порталдиз талукьарнавай “элкъвей стол” кьиле фена

И мукьвара Махачкъаладин Р. Гьамзатован тIварунихъ галай библиотекадин чIехи залда "элкъвей стол” кьиле фена. Ам общественный финансар идара авунин "Ачух бюджет” портал кардик кутуниз ва адахъ авай гележегдиз талукьарнавай. Мярекатда республикадин жуьреба-жуьре министерствойрин ва идарайрин, общественный тешкилатрин векилри иштиракна. 

"РД-дин финансрин министерстводи гьеле 2013-йисуз тешкилнавай общественный финансар идара авунин "Ачух бюджет” интернет-портал бюджетдин ачухвал артухарунин важиблу алат я лагьайтIа жеда”, - малумарна мярекат ачухай финансрин министрдин сад лагьай заместитель АнтонинаИдрисовади.

Ихьтин сайт арадал гъунин макьсад, ада гьисабзавайвал, Дагъустан Республикадин финансрин къурулушдин, государстводин властдин органрин ва идарайрин кIвалах алцифди ва агьалийривай ахтармишиз жедайди авун таъминарун я. 


А.Идрисовади рикIел хкайвал, портал республика вилик тухунин кар алай "Государство нетижалудаказ идара авун” проектдин сергьятда аваз тешкилнай. 2014-йисуз "Ачух бюджет” сайт авайдалай къулайди ва тамамди авунин, ина чапзавай делилрин кьадар ва ери хкажунин кIвалахар тухванва. ИкI, "Ачух бюджет” сайтдай республикадин ва муниципальный бюджетар тамамаруниз талукь, гьакIни нормативный ва куьмекдин малуматар жагъида. 

"Бюджет агьалияр патал ачухди хьун лазим я. Порталда республикадин бюджет пландик кутуниз ва тамамаруниз, РД-дин Кьилин тапшуругъар, гьа жергедай яз "майдин” указар кьилиз акъудзавай жуьредиз талукь делилар ава. И сайтдикай неинки финансрин рекьяй пешекарривай, гьакIни адетдин агьалийривай регьятдаказ менфят къачуз жезва”, - лагьана министрдин заместителди. 

Сайт гьихьтин паярикай ибарат ятIа ва ада гьи къайдада кIвалахзаватIа, гьадакай кIватI хьанвайбуруз РД-дин Минфиндин информациядинни технологийрин ва программированидин отделдин начальник Александр Карапаца лагьана. 

Ада хабар гайивал, графический ва текстерин чIехи пай делилар порталда гьакъикъи вахтунин къайдада акъатзава, яни  абур РД-дин финансрин министерстводин делилрин базада тунихъ галаз сад хьиз сайтдизни акъатзава. 

Порталда республикадин ва кIватIалнавай бюджетар тамамарзавай къайда, налогрилай къвезвай къазанжийрин кьадар ва къурулуш, гьар жуьре хилериз бюджетдай ийизвай харжияр, государстводин буржунин къурулуш ва кьадар къалурзавай онлайн-графикар ава. 

Сайтда гьакIни Дагъустан Республикадин интерактивный карта ава. ИкI, и ва я маса шегьердин, райондин бюджетдай ийизвай харжийриз, къазанжийриз талукь делилар ахтармишиз кIанзаватIа, ам картадал жагъурна ва адал курсор эцигна кIанда, са герендилай делилар ачух жеда.

ЧIехи мад са пай кар алай программайриз талукьди я. Ина  Дагъустан Республикадин государственный программаяр гьазурунин ва уьмуьрдиз куьчуьрмишунин нормативно-правовой актар, госпрограммайрин важиблу редакцияр, и программаяр кьилиз акъудзавай жуьредикай баянар галай малуматар ава. И пай ацIурдай делилар Дагъустан Республикадин экономикадин ва территорияр вилик тухунин министерстводи агакьарзава. 

"Ачух бюджет” сайтда общественный приемныйни ава, ина рикIик квай месэладикай хабар кьаз, РД-дин Минфиндин гьар гьи хьайитIани къуллугъчидиз герек суал гуз жеда. 

Сайтда, агьалийри веревирд авун патал республикадин инвестицийрин программадин проект, 2015-йис ва 2016-2017-йисарин пландик квай девир патал РД-дин бюджетрин проектар  ава.

Инлай кьулухъ сайтда мадни гзаф нормативно-правовой актариз чка гун, бюджетдин гьерекатриз талукь яз пешекаррин баянар, макъалаяр чап авун фикирда ава. ГьакIни делилар агакьардай технический маса мумкинвилерни ишлемишда. Идалайни гъейри, Карапаца хабар гайивал, "Агьалияр патал бюджет” тIвар алай электронный ктаб гьазурдайвал я. Ина адетдин агьалияр патал гъавурда гьатдай жуьреда 2015-йисуз республикадин бюджетдикай суьгьбетда. 

"Эгер куь патай теклифар аватIа, хабар це, гьикI лагьайтIа,чи пландик порталда авай информация агьалияр патал жезмай кьван асантди, сайт ишлемишунин кIвалах къулайди авун ква”, - алава хъувуна ада.

Жасмина Саидова

Лезги Газет

.

Мумкин я ваз килигиз кIан хьун:

Дагъустандин намусдин азадвилинни, динрин тешкилатрихъ галаз кIвалах тухунин рекьяй Комитетдин коллегия кьиле фена

Дуьньядин культурайрин, динрин тарихдин музей Дербентда ачухна

Виликди фена кIанда шегьерарни районар

Фияви уьлкведин майданра

РФ-дин Общественный палатада - лезги чIал Милли чIалар хуьн

Къейдер (0)